1, 2. (a) Wetin mama kin du we in pikin de kray? (b) Us filin de we pas di sɔri-at we mama gɛt fɔ in pikin?

WAN yɔŋbebi de kray midul nɛt. Wantɛm wantɛm, in mama wek. Frɔm we i bɔn in pikin, i nɔ de slip fayn fayn wan lɛk aw i bin dɔn yus fɔ slip. I dɔn kam fɔ ɔndastand di difrɛn kray dɛn we in pikin kin kray. So i kin ebul fɔ no if in pikin want fɔ it, if in pikin want mek i bayo bayo am, ɔ atɛnd to am. Bɔt ilɛk wetin na di rizin we mek di pikin de kray, in mama de du sɔntin. Di lɔv we i gɛt fɔ in pikin de mek i nɔ jɔs lɛf am so, bɔt i de du sɔntin fɔ ɛp am.

² Di sɔri-at we mama gɛt fɔ in pikin we i bɔn, na wan pan di bɛst we we mɔtalman de sho aw dɛn de fil fɔ dɛn kɔmpin. Bɔt wan filin de we pas dis filin fa fawe, dat na di sɔri-at we wi Gɔd, Jiova, gɛt. We wi tɔk bɔt dis fayn fayn kwaliti, i kin ɛp wi fɔ kam nia Jiova. Lɛ wi tɔk bɔt wetin na sɔri-at ɛn aw wi Gɔd de sho sɔri-at.

3. Wetin di Ibru vab rakam min?

³ Insay di Baybul, sɔm Ibru ɛn Grik wɔd dɛn minin gɛt fɔ du wit sɔri-at, lɛk di Ibru vab rakam. Wan buk ɛksplen se di vab rakam “min we pɔsin rili gɛt sɔri-at. Na di kayn sɔri-at we pɔsin kin fil we i si pɔsin we i lɛk ɔ we nid in ɛp wik ɔ i de sɔfa.” Dis Ibru wɔd we Jiova yuz fɔ tɔk bɔt insɛf gɛt sɔntin fɔ du wit di wɔd “wumb” ɛn i kin min di “sɔri-at we mama gɛt.” *—Ɛksodɔs 33:​19; Jɛrimaya 33:​26.

4, 5. Aw di we we di Baybul tɔk bɔt di filin we mama gɛt fɔ in pikin de tich wi bɔt di kayn sɔri-at we Jiova gɛt?

 ⁴ Di Baybul de yuz di filin we mama gɛt fɔ in pikin fɔ mek wi ɔndastand di kayn sɔri-at we Jiova gɛt. Ayzaya 49:​15 se “Kombra go fɔgɛt in pikin we de sɔk bɔbi, we i nɔ go sɔri fɔ di bɔypikin we kɔmɔt nain bɛlɛ? Dɛn sɛf kin fɔgɛt, bɔt mi, nɔ go fɔgɛt yu.” Dis vas sho di kayn we aw Jiova rili gɛt sɔri-at fɔ in pipul dɛn. Wetin mek wi se so?

⁵ I at fɔ biliv se mama go fɔgɛt fɔ fid ɛn kia fɔ in pikin we de sɔk bɔbi. Mɔ so we yɔŋbebi nɔ ebul fɔ ɛp insɛf; de ɛn nɛt yɔŋbebi nid in mama in atɛnshɔn ɛn lɔv. Bɔt i sɔri fɔ no se, wi dɔn yɛri se sɔm mama dɛn nɔ kin kia fɔ dɛn pikin dɛn, mɔ so insay dis tɛm we ‘tin tranga ɛn bad’ ɛn we pipul dɛn nɔ “lɛk dɛn kɔmpin mɔtalman.” (2 Timoti 3:​1, 3) “Bɔt” Jiova in se, a “nɔ go fɔgɛt yu.” Di sɔri-at we Jiova gɛt fɔ in savant dɛn nɔ go ɛva dɔn. Dis we aw Jiova de fil fɔ in savant dɛn pas ɛni filin we yu kin imajin ɛn wi nɔ go ivin kɔmpia am to di sɔri-at we mama kin gɛt fɔ in yɔŋbebi. Wi nɔ go sɔprayz we wan man tɔk bɔt Ayzaya 49:​15 se, “Dis na di bɛst we, ɔ wan pan di bɛst we dɛn we dɛn tɔk bɔt Gɔd in lɔv na di Ol Tɛstamɛnt.”

6. Aw bɔku pipul dɛn de tink bɔt pɔsin we gɛt sɔri-at? Bɔt wetin Jiova mek wi no?

⁶ Yu tink se we pɔsin gɛt sɔri-at dat min se i wik? Bɔku pipul dɛn de tink da we de. Fɔ ɛgzampul, wan man na Rom we nem Sɛnika, we bin de insay Jizɔs in tɛm, we lɛk mɔtalman sɛns ɛn we bin de bifo pan buk lanin na Rom, bin tich se “we pɔsin fil sɔri fɔ ɔda pɔsin, dat min se i wik.” Sɛnika bin de sɔpɔt di stoik pipul dɛn we bin de tich bɔt pis we pɔsin kin gɛt we i nɔ de sho  wan filin. Sɛnika bin tɔk se pɔsin we gɛt sɛns kin ɛp di wan dɛn we dɛn at pwɛl, bɔt i nɔ fɔ fil sɔri fɔ dɛn bikɔs da filin de go mek i nɔ gɛt pis. Dis kayn we aw pipul dɛn de tink we de sho se dɛn jɔs bisin bɔt dɛnsɛf de mek dɛn nɔ gɛt wan sɔri-at. Bɔt nɔto so Jiova tan atɔl! Jiova mek wi no insay in Wɔd, di Baybul, se i “rili lɛk wi ɛn i gɛt sɔri-at.” (Jems 5:​11) Wi si se sɔri-at nɔ min se pɔsin wik, bɔt na kwaliti we rili impɔtant. Lɛ wi si aw Jiova sho dis kwaliti jɔs lɛk mama ɔ papa we lɛk in pikin dɛn.

7, 8. Aw di Izrɛlayt dɛn bin de sɔfa na Ijipt? Wetin Jiova bin du fɔ ɛp dɛn?

⁷ Wi si klia wan se Jiova gɛt sɔri-at bay di we aw i bin trit di Izrɛlayt dɛn. Tink bɔt di tɛm we bɔku bɔku Izrɛlayt dɛn bin de na Ijipt as slev dɛn, ɛn dɛn bin de mek dɛn sɔfa bad bad wan. Di Ijipshian dɛn bin de “fos dɛn fɔ de miks mɔta blɔk ɛn fɔ du ɔlkayn traŋa wok . . . Dɛn mek dɛn layf traŋa.” (Ɛksodɔs 1:​11, 14) Di sɔfa we di Izrɛlayt dɛn bin de sɔfa mek dɛn beg Jiova fɔ ɛp dɛn. Wetin di Gɔd we gɛt sɔri-at bin du?

⁸ Dɛn bin tɔch Jiova in at. Jiova bin tɔk se: “A dɔn si aw mi pipul dɛn de sɔfa na Ijipt. A dɔn yɛri we dɛn de kray fɔ kɔmɔt ɔnda dɛn slev masta dɛn ɛn a bisin bɔt wetin de apin to dɛn. A no ɔl bɔt aw dɛn de sɔfa.” (Ɛksodɔs 3:​7) I nɔ pɔsibul fɔ mek Jiova nɔ fil am fɔ in pipul dɛn we i si dɛn de sɔfa ɔ we dɛn kray to am fɔ mek i ɛp dɛn. Wi si na Chapta 24 se Jiova na Gɔd we de fil fɔ pɔsin. Fɔ fil fɔ pɔsin gɛt sɔntin fɔ du wit  sɔri-at. Bɔt Jiova nɔ bin jɔs fil fɔ in pipul dɛn nɔmɔ; i bin du sɔntin fɔ ɛp dɛn. Ayzaya 63:​9 se: “Na wit lɔv ɛn di sɔri we i de sɔri fɔ dɛn mek i ridim dɛm.” Jiova bin sev di Izrɛlayt dɛn ɛn pul dɛn na Ijipt wit “strɔng an.” (Dyutɔrɔnɔmi 4:​34, NWT) Afta dat, i pafɔm mirekul fɔ gi dɛn fud ɛn kɛr dɛn go na di land we i bin dɔn prɔmis dɛn.

9, 10. (a) Wetin mek bɔku tɛm Jiova bin sev di Izrɛlayt dɛn afta dɛn dɔn go na di lan we i bin prɔmis dɛn? (b) Insay Jɛfta in tɛm, wetin Jiova bin sev di Izrɛlayt dɛn frɔm? Wetin mek i bin du dat?

⁹ Jiova in sɔri-at nɔ stɔp de. We di Izrɛlayt dɛn bin de na di land we Gɔd bin dɔn prɔmis dɛn, dɛn bin de sin agens Gɔd bɔku tɛm ɛn dat bin mek dɛn sɔfa. Dɔn, dɛn kin kam fɔ no se dɛn dɔn rili sin ɛn beg Jiova. Bɔku tɛm Jiova bin de sev dɛn. Wetin mek? Di Baybul tɛl wi se na “bikɔs i gɛt sɔri at fɔ in pipul dɛm.”—Sɛkɛn Kronikul 36:​15; Di Jɔj Dɛm 2:​11-16.

¹⁰ Tink bɔt wetin bin apin insay Jɛfta in tɛm. We di Izrɛlayt dɛn stat fɔ wɔship lay lay gɔd dɛn, Jiova bin alaw di Amonayt dɛn fɔ mek dɛn sɔfa fɔ 18 ia. Leta, di Izrɛlayt dɛn bin ripent. Di Baybul tɛl wi se: “Di Izrɛlayt dɛn trowe di fɔrin gɔd dɛn ɛn bigin wɔship PAPA GƆD [“Jiova,” NWT], ɛn PAPA GƆD vɛks fɔ di we we i si dɛn de sɔfa.” (Di Jɔj Dɛm 10:​6-16) We Jiova si se in pipul dɛn dɔn rili ripɛnt, i nɔ bin ebul fɔ wach dɛn igen we dɛn de sɔfa ɛn nɔ du natin. So Gɔd we gɛt sɔri-at bin yuz Jɛfta fɔ sev di Izrɛlayt dɛn frɔm dɛn ɛnimi dɛn.—Di Jɔj Dɛm 11:​30-33.

11. Wetin wi lan bɔt sɔri-at frɔm di we aw Jiova bin trit di Izrɛlayt dɛn?

¹¹ Wetin wi lan bɔt sɔri-at frɔm di we aw Jiova bin trit di Izrɛlayt dɛn? Wi si se di sɔri-at we Jiova gɛt nɔ  min se i de si pipul dɛn de sɔfa, dɔn i jɔs fil am fɔ dɛn. Tink bɔt da ɛgzampul bɔt da mama we in sɔri-at mek i du sɔntin we i si in yɔŋbebi de kray. Semweso, Jiova de du sɔntin we i si in pipul dɛn de kray to am. Di sɔri-at we i gɛt de mek i du sɔntin fɔ lɛ dɛn lɛf fɔ sɔfa. Apat frɔm dat, di we aw Jiova bin trit di Izrɛlayt dɛn tich wi se we pɔsin gɛt sɔri-at dat nɔ min se i wik, bikɔs dis fayn kwaliti bin mek Gɔd du sɔntin fɔ sev in pipul dɛn. Bɔt fɔ se Jiova de sho sɔri-at fɔ in savant dɛn nɔmɔ we dɛn de as grup?

12. Aw di Lɔ bin sho se Jiova gɛt sɔri-at fɔ ɔl in savant dɛn wan bay wan?

¹² Di Lɔ we Gɔd bin gi di Izrɛlayt dɛn bin sho se i gɛt sɔri-at fɔ dɛn ɔl wan bay wan. Fɔ ɛgzampul, i bin bisin bɔt di po wan dɛn. Jiova bin no se sɔntin we pɔsin nɔ de ɛkspɛkt go apin to wan Izrɛlayt we go mek i po. Aw dɛn fɔ trit di wan dɛn we po? Jiova bin tɔk klia wan se: ‘If ɛni wan pan dɛn we na Izrɛlayt nɔ gɛt bɛtɛ tin, dɛn nɔ fɔ mek traŋa at pan am. Dɛn fɔ gi am wetin i want wit ɔl dɛn at; nɔto fɔ mek traŋa at ɛn ipokrit we dɛn de gi am ɛnitin bikɔs na fɔ dɛn kayn tin dɛn de go mek Jiova go blɛs ɛnitin we dɛn put dɛn an pan.’ (Ditarɔnɔmi 15:​7, 10) Jiova bin tɛl dɛn bak se dɛn nɔ fɔ avɛst ɔl di tin dɛn we gro na di ej pat na dɛn fam dɛn ɔ pik di wan dɛn we fɔdɔm fɔdɔm na grɔn. Dɛn fɔ lɛf am fɔ di wan dɛn we po. (Lɛvitikɔs 23:​22; Ruth 2:​2-7) We di Izrɛlayt dɛn bin de obe dis lɔ, di wan dɛn we po nɔ bin nid fɔ beg fɔ fud. Dis nɔ sho se Jiova gɛt sɔri-at?

13, 14. (a) Aw di wɔd dɛn we Devid tɔk mek wi biliv tranga wan se Jiova rili bisin bɔt wi ɔl wan bay wan? (b) Us ɛgzampul yu go yuz fɔ sho se Jiova de nia ɔl “udat fil se i dɔn dɔn fɔ am” ɔ “udat fil se bɛtɛ nɔ de fɔ am igen”?

 ¹³ Tide sɛf, wi Gɔd we lɛk wi rili bisin bɔt wi ɔl wan bay wan. Wi fɔ biliv tranga wan se i de si di sɔfa we wi de sɔfa. Devid bin rayt se: “PAPA GƆD [“Jiova,” NWT] de wach ɔl udat de du tin tret wan ɛn de yɛri we dɛn de kray. PAPA GƆD [“Jiova,” NWT] de nia ɔl udat fil se i dɔn dɔn fɔ am ɛn de ɛp udat fil se bɛtɛ nɔ de fɔ am igen.” (Sam 34:​15, 18) We wan man we bin de tɔk bɔt di Baybul bin tɔk bɔt di wan dɛn we dis vas de tɔk bɔt, i bin se: “Dɛn at pwɛl, dɛn dɔn put dɛnsɛf dɔŋ bikɔs ɔf dɛn sin, dɛn nɔ gɛt rɛspɛkt fɔ dɛnsɛf igen, dɛn nɔ tek dɛnsɛf mek natin, ɛn dɛn nɔ gɛt kɔnfidɛns pan dɛnsɛf igen.” Dɛn kayn pipul ya kin tink se Jiova de fa frɔm dɛn ɛn dɛn nɔ tu impɔtant fɔ mek Jiova kia fɔ dɛn. Bɔt nɔto so i bi. Di wɔd dɛn we Devid tɔk mek wi no se Jiova nɔ de lɛf di wan dɛn we “nɔ tek dɛnsɛf mek natin.” Wi Gɔd we gɛt sɔri-at no se na da tɛm de mɔ wi kin nid am, ɛn i kin de nia wi.

¹⁴ Mek wi tɔk bɔt wan ɛkspiriɛns. Wan mama na di Unaytɛd Stet rɔsh go wit in tu ia ol bɔypikin na ɔspitul bikɔs wan sik we nem krup we de mek i nɔ ebul blo fayn bin de mek i sɔfa. Afta we di dɔktɔ dɛn dɔn chɛk di bɔbɔ, dɛn tɛl in mama se di bɔbɔ fɔ admit na di ɔspitul te doklin. Usay in mama slip da nɛt de? I slip na wan chia na di ɔspitul rum we de nia in bɔypikin in bed! In bɔbɔ sik ɛn i jɔs gɛt fɔ de nia am. Fɔ tru, wi fɔ ɛkspɛkt se wi Papa we de na ɛvin we lɛk wi, go du mɔ pas dat! Afta ɔl, i mek wi lɛk aw i tan. (Jɛnɛsis 1:​26) Di fayn wɔd dɛn we de na Sam 34:​18 tɛl wi se we wi ‘fil se  ɔltin dɔn dɔn fɔ wi’ ɔ ‘bɛtɛ nɔ de fɔ wi igen,’ Jiova “de nia” wi jɔs lɛk papa we lɛk in pikin dɛn. I gɛt sɔri-at ɛn i rɛdi fɔ ɛp wi.

15. Us we dɛn Jiova de ɛp wi ɔl wan bay wan?

¹⁵ Aw Jiova de ɛp wi wan bay wan? I nɔ de pul di prɔblɛm we de mek wi de sɔfa. Bɔt Jiova dɔn gi wi bɔku tin dɛn fɔ ɛp di wan dɛn we de kray to am fɔ ɛp. In Wɔd, di Baybul, gɛt fayn advays dɛn we go ɛp wi wit wi prɔblɛm dɛn. Insay di kɔngrigeshɔn, Jiova dɔn gi wi ovasia dɛn we kwalifay ɛn we de tray fɔ falamakata di kayn sɔri-at we i gɛt we dɛn de ɛp dɛn kɔmpin kristian dɛn. (Jems 5:​14, 15) As di wan “we de ansa wi prea” i de gi “oli spirit to di wan dɛn we de aks am.” (Sam 65:​2; Lyuk 11:​13) Da oli spirit de de mek wi gɛt “pawa we pas mɔtalman in yon” so dat wi go bia te Gɔd in Kiŋdɔm pul ɔl di prɔblɛm dɛn we de mek wi sɔfa. (2 Kɔrintians 4:​7) Yu nɔ gladi fɔ ɔl dɛn tin ya we Gɔd de gi wi? Lɛ wi nɔ fɔgɛt se dɛn tin dɛn ya de sho se Jiova rili gɛt sɔri-at fɔ wi.

16. Wetin na di bɛst we aw Jiova dɔn sho se i rili gɛt sɔri-at? Aw dat afɛkt yu?

¹⁶ Di bɛst we aw Jiova sho se i rili gɛt sɔri-at na we i gi in Pikin we i lɛk pas ɔl fɔ fri wi. Dis sakrifays ya sho se Jiova gɛt lɔv ɛn i mek am pɔsibul fɔ mek wi sev. Mɛmba se dis tin we Jiova du na fɔ wi ɔl wan bay wan. Na dat mek Jɔn di Baptis in papa we na Zakaraya bin tɔk se dis gift we Jiova gi de sho fɔ tru tru se “Gɔd rili gɛt sɔri-at.”—Lyuk 1:​78.

17-19. (a) Aw di Baybul sho se Jiova in sɔri-at gɛt say we i stɔp? (b) Wetin mek Jiova stɔp fɔ sɔri fɔ in pipul dɛn?

¹⁷ Yu tink se wi fɔ imajin se Jiova in sɔri-at nɔ gɛt  say we i stɔp? Nɔ, di Baybul sho klia wan se Jiova nɔ de sho sɔri-at to di wan dɛn we de agens wetin wi se. (Ibruz 10:​28) Fɔ si wetin mek i de du so, lɛ wi tink bak bɔt di Izrɛlayt dɛn ɛgzampul.

¹⁸ Pan ɔl we bɔku tɛm Jiova bin de sev di Izrɛlayt dɛn frɔm dɛn ɛnimi dɛn, tɛm bin kam we i stɔp fɔ sho sɔri-at fɔ dɛn. Dɛn trangayes pipul dɛn de bin de wɔship aydɔl dɛn, ɛn dɛn bin ivin de kɛr dɛn dɔti aydɔl dɛn rayt insay Jiova in tɛmpul! Apat frɔm dat, di Baybul se: “Dɛn de moko pan PAPA GƆD in mɛsenja dɛm, luk dawn pan in wɔd dɛm, ɛn shumɔ pan in prɔfɛt dɛm, sote PAPA GƆD [“Jiova,” NWT] in at wam . . . we tɔnin bak nɔ de igen.” (Sɛkɛn Kronikul 36:​16) Di Izrɛlayt dɛn bin rich di pɔynt usay dɛn nɔ bin fit igen fɔ mek Jiova sɔri fɔ dɛn; dɛn gi Jiova gud rizin fɔ vɛks. Wetin bin apin?

¹⁹ Jiova nɔ bin de fil fɔ in pipul dɛn igen. I bin tɔk se: “A nɔ go fil am fɔ nɔbɔdi, a nɔ go lɛf nɔbɔdi ɔ sɔri fɔ ɛnibɔdi, we go mek a nɔ dɔnawe wit am.” (Jɛrimaya 13:​14) So dɛn pwɛl Jerusɛlɛm ɛn di tɛmpul we de de, dɔn dɛn kɛr di Izrɛlayt dɛn as slev dɛn na Babilɔn. I kin sɔri we mɔtalman trangayes te Gɔd stɔp fɔ sɔri fɔ dɛn!—Lamɛnteshɔn 2:​21.

20, 21. (a) Wetin go apin we Jiova stɔp fɔ sho sɔri-at insay wi yon tɛm? (b) Wetin na di bɛst we we Jiova de sho sɔri-at we wi go tɔk bɔt insay di nɛks chapta?

²⁰ We wi tide? Jiova nɔ de chenj. Bikɔs i gɛt sɔri-at, na dat mek i dɔn tɛl in Witnɛs dɛn fɔ prich di “gud nyuz bɔt di Kiŋdɔm” ɔlsay na di wɔl. (Matyu 24:​14) We pipul dɛn we want fɔ du wetin Gɔd want lisin, Jiova kin ɛp dɛn fɔ ɔndastand di mɛsej bɔt in Kiŋdɔm.  (Akt 16:​14) Bɔt dis wok nɔ go de sote go. Di sɔri-at we Jiova gɛt nɔ go mek i alaw dis wikɛd wɔl ɛn ɔl di bad tin dɛn we de apin insay de fɔ kɔntinyu sote go. We Jiova in tɛm rich fɔ stɔp fɔ sho sɔri-at, i go kam fɔ jɔj dis wikɛd wɔl. Ivin da tɛm de, na di sɔri-at we i gɛt go mek i du dat, dat na, di sɔri-at we i gɛt fɔ in “oli nem” ɛn fɔ in fetful savant dɛn. (Izikɛl 36:​20-23) Jiova go pul ɔl di bad tin dɛn we de apin ɛn mek nyu wɔl usay di wan dɛn we go de de go du wetin rayt. Jiova tɔk bɔt di wikɛd wan dɛn se: “Mi safyay nɔ go luk sɛf ɛn a nɔ go sɔri atɔl, a go mek dɛn pe bak fɔ ɔl di bad tin dɛn we dɛn dɔn du.”—Izikɛl 9:​10.

²¹ Te da tɛm de rich, Jiova go stil kɔntinyu fɔ sɔri fɔ pipul dɛn, ivin di wan dɛn we i gɛt fɔ dɔnawe wit. Di wan dɛn we rili ripɛnt go bɛnifit frɔm wan pan Jiova in bɛst we dɛn we i de sho sɔri-at, dat na, bay we i go fɔgiv dɛn. Insay di nɛks chapta, wi go tɔk bɔt sɔm fayn ɛgzampul dɛn insay di Baybul fɔ ɛp wi fɔ ɔndastand di kayn we aw Jiova de fɔgiv.