MƆ TIN DƐN FƆ NO
Udat Na Maykɛl?
DI Baybul kɔl wan enjɛl Maykɛl. Bɔt i nɔ yuz dis nem bɔku tɛm. Ɛn ɛnitɛm we di Baybul tɔk bɔt am, i mɔs de du sɔntin. Wan buk na di Baybul we na Daniɛl, sho se Maykɛl bin de fɛt dɛn wikɛd enjɛl dɛn. Jud In Lɛta sho se in ɛn Setan bin de agyu; ɛn insay Rɛvɛleshɔn, i bin de fɛt bak wit Setan ɛn in dɛbul dɛn. Bikɔs Maykɛl de fɛt fɔ Jiova in rayt fɔ rul ɛn de fɛt Gɔd in ɛnimi dɛn, i sho se in nem fit am bikɔs in nem min “Udat Tan Lɛk Gɔd?” Bɔt udat na Maykɛl?
Sɔntɛnde, pipul dɛn kin gɛt pas wan nem. Fɔ ɛgzampul, Jekɔb in ɔda nem na Izrɛl, ɛn di apɔsul Pita in ɔda nem na Saymɔn. (Jɛnɛsis 49:1, 2; Matyu 10:2) Semweso, di Baybul sho wi se Maykɛl na Jizɔs Krays in ɔda nem. I bin gɛt da nem bifo i kam na di wɔl ɛn i stil gɛt am we i go bak na ɛvin. Lɛ wi tɔk bɔt sɔm skripchɔ dɛn we mek wi se so.
Di enjɛl dɛn chif. Gɔd in Wɔd se Maykɛl na “dɛn enjɛl dɛn chif.” (Jud In Lɛta 9) Insay dis skripchɔ, yu go si se di Baybul nɔ se Maykɛl na wan pan dɛn enjɛl dɛn chif dɛn, bɔt i se Maykɛl na dɛn enjɛl dɛn chif. Dis sho se dis kayn enjɛl, na in wangren de. Infakt, ɛnitɛm we di Baybul tɔk bɔt “dɛn enjɛl dɛn chif,” na wan pɔsin i de tɔk bɔt. Apat frɔm dat, di Baybul sho se Jizɔs gɛt di sem pawa we di enjɛl dɛn chif gɛt. Insay Fɔs Lɛta Fɔ Tɛsalonayka 4:16, dɛn tɔk bɔt Jizɔs de se: “Dɛn go yɛri di edman fɔ ɔl di enjɛl dɛn in vɔys . . . , ɛn di Masta insɛf go kɔmɔt na ɛvin kam dɔŋ.” Insay dis skripchɔ, dɛn se Jizɔs in vɔys tan lɛk di edman fɔ ɔl di enjɛl dɛn in vɔys. So dis skripchɔ de sho se na Jizɔs insɛf na Maykɛl we na dɛn enjɛl dɛn chif.
Di lida fɔ di ami na ɛvin. Di Baybul se: “Maykɛl ɛn in enjɛl dɛn go fɛt di dragɔn . . . wit in yon mɛsenja dɛn.” (Na wi mek am italiks; Rɛvɛleshɔn 12:7) So Maykɛl na di Lida fɔ di sojaman dɛn na ɛvin. Di Baybul buk we nem Rɛvɛleshɔn tɔk bɔt aw Jizɔs na Lida fɔ di sojaman dɛn we de na ɛvin. (Rɛvɛleshɔn 19:14-16) Ɛn di apɔsul Pɔl bin tɔk bak bɔt “Masta Jizɔs” ɛn “in enjɛl dɛn we gɛt pawa.” (Sɛkɛn Lɛta Fɔ Tɛsalonayka 1:7) So di Baybul tɔk bɔt Maykɛl ɛn “in enjɛl dɛn” ɛn bɔt Jizɔs ɛn “in enjɛl dɛn.” (Matyu 13:41; 16:27; 24:31; Pita In Fɔs Lɛta 3:22) Bikɔs nɔsay nɔ de na di Baybul we dɛn se di fetful enjɛl dɛn gɛt tu ami na ɛvin, usay Maykɛl de lid di wan ɛn Jizɔs de lid di ɔda wan, so wi go se Maykɛl nɔto no ɔda pɔsin bɔt na Jizɔs. *
^ par. 6 If yu want fɔ no mɔ fɔ se Maykɛl na di ɔda nem fɔ Gɔd in Pikin, na fɔ rid wan buk we dɛn kɔl Insight on the Scriptures, Vɔlyum 2 frɔm pej 393 to pej 394. Na Jiova Witnɛs dɛn mek dis buk.
