FƆ ƐP wi fɔ no udat di Mɛsaya go bi, Jiova Gɔd mek in prɔfɛt dɛn rayt ɔltin bɔt am. Di say we dɛn go bɔn am, di tin dɛn we i go du, ɛn aw dɛn go kil am. Dɛn rayt bak se na in go bi di pɔsin we gɛt fɔ kam sev wi. Ɔltin we di prɔfɛt dɛn bin rayt bɔt am bin apin jɔs lɛk aw dɛn bin se. Fɔ mek yu go  ɔndastand dis mɔ, mek wi tɔk bɔt sɔm pan di tin dɛn we di prɔfɛt dɛn bin rayt bɔt di say we dɛn go bɔn di Mɛsaya ɛn wetin go apin to am we i smɔl.

Di prɔfɛt Ayzaya bin rayt se di Mɛsaya go bi Kiŋ Devid in gret-gret granpikin. (Ayzaya 9:​7) Ɛn fɔ tru Jizɔs na bin Devid in gret-gret granpikin.—Matyu 1:​1, 6-17.

 Wan ɔda prɔfɛt we na Mayka, insɛf bin tɔk se dis pikin go bi kiŋ ɛn dɛn go bɔn am na “Bɛtliɛm Ɛfrata.” (Mayka 5:​2) Di tɛm we dɛn bɔn Jizɔs, na tu tɔŋ dɛn bin de na Izrɛl we dɛn kɔl Bɛtliɛm. Wan bin de na di nɔt pat na di kɔntri ɛn di ɔda wan bin de nia Jerusɛlɛm insay Juda. Fɔstɛm, pipul dɛn bin de kɔl di Bɛtliɛm we de nia Jerusɛlɛm, Ɛfrata. Na Bɛtliɛm Ɛfrata dɛn bin bɔn Jizɔs jɔs lɛk aw di prɔfɛt bin dɔn tɔk!—Matyu 2:​1.

Di Baybul bin dɔn tɔk bak se Gɔd go kɔl in Bɔy Pikin fɔ “kɔmɔt na Ijipt.” We Jizɔs na bin smɔl pikin, dɛn bin kɛr am go na Ijipt. Bɔt dɛn briŋ am kam bak afta Ɛrɔd bin dɔn day. Dis sho se wetin di Baybul bin dɔn tɔk, bin apin.—Osea 11:​1, NW; Matyu 2:​15.

Insay di bɔks we de na  pej 200, yu go si skripchɔ dɛn ɔnda di say we se “Wetin dɛn bin tɔk?” Dɛn skripchɔ dɛn de gɛt tin dɛn we dɛn bin rayt bɔt di Mɛsaya. Duya, rid dɛn ɛn kɔmpia dɛn wit di wan dɛn we de ɔnda di say we se “Aw i apin?” Dat go ɛp yu fɔ biliv mɔ fɔ se di tin dɛn we Gɔd in Wɔd tɔk, na tru.

We yu de rid dɛn skripchɔ dɛn ya, na fɔ mɛmba se dɛn bin dɔn rayt dɛn lɔntɛm bifo dɛn bɔn Jizɔs. Jizɔs bin se: “Ɔltin we Mozis ɛn dɛn prɔfɛt bin rayt ɛn ɔl wetin dɛn rayt na di Sambuk bɔt mi, mɔs bi.” (Lyuk 24:​44) If yu de rid frɔm yu yon Baybul, yu go si se fɔ tru, ɔl dɛn tin ya bin apin.