YU NO wetin mek dis man de chɛr in klos af-af? Na Jiova tɛl am fɔ chɛr am. Dis man na Gɔd in prɔfɛt we nem Aija. Yu no udat na prɔfɛt? Prɔfɛt na pɔsin we Jiova de tɛl wetin gɛt fɔ apin tumara bambay.

Na Aija de tɔk to Jɛroboam so na di pikchɔ. Jɛroboam na wan impɔtant man we de wok fɔ Sɔlɔmɔn. We Aija ɛn Jɛroboam mit ɔp na rod, Aija du sɔntin. I pul di nyu klos we i bin wɛr pantap, ɛn i chɛr chɛr am to twɛlv pat. Dɔn i tɛl Jɛroboam se: ‘Tek tɛn pat fɔ yusɛf.’ Yu no wetin mek Aija tɛl Jɛroboam fɔ tek tɛn pat?

Aija tɔk se Jiova de kam pul di kiŋdɔm na Sɔlɔmɔn in an. I se Jiova go gi tɛn trayb to Jɛroboam. Dis min se na tu trayb nɔmɔ Sɔlɔmɔn in pikin we nem Rɛoboam go rul.

We Sɔlɔmɔn yɛri wetin Aija tɛl Jɛroboam, i vɛks bad. I tray fɔ kil Jɛroboam. Bɔt Jɛroboam rɔnawe go na Ijipt. Afta sɔm tɛm, Sɔlɔmɔn day. I bin dɔn rul fɔ 40 ia. Naw na Rɛoboam de rul. We Jɛroboam yɛri se Sɔlɔmɔn dɔn day, i kam bak na Izrɛl.

Rɛoboam na bad kiŋ. I bin de trit di pipul dɛn bad pas aw in papa bin de trit dɛn. So Jɛroboam ɛn ɔda bigman dɛn go to Kiŋ Rɛoboam ɛn tɔk to am fɔ trit di pipul dɛn fayn. Bɔt Rɛoboam nɔ lisin. I bigin trit di pipul dɛn bad pas aw i bin de trit dɛn fɔs. So di pipul dɛn mek Jɛroboam bi kiŋ fɔ tɛn trayb. Bɔt Rɛoboam stil bi kiŋ fɔ tu trayb. Di tu trayb na Bɛnjamin ɛn Juda.

Jɛroboam nɔ want mek in pipul dɛn go na Jerusɛlɛm fɔ go wɔship na di tɛmpul. So i mek tu kaw pikin dɛn wit gold, ɛn i mek di pipul dɛn we de na in kiŋdɔm wɔship dɛn. I nɔ tu te, di pipul dɛn bigin du bad bad tin dɛn ɔlsay na di land.

Trɔbul bin de bak na di kiŋdɔm we gɛt tu trayb. I nɔ rich fayv ia frɔm we Rɛoboam bi kiŋ, na in di kiŋ na Ijipt kam fɛt Jerusɛlɛm. I kɛr bɔku jɛntri we bin de na di tɛmpul. So di tɛmpul nɔ de igen lɛk aw i bin de fɔs.