DI FILISTIN dɛn dɔn kam bak fɔ fɛt di Izrɛlayt dɛn. Tri pan Devid in big brɔda dɛn dɔn jɔyn Sɔl in sojaman dɛn. So wan de, Jɛsi tɛl Devid se: ‘Go wit dɛn it ya to yu brɔda dɛn. Go luk aw dɛn de du.’

We Devid rich usay di sojaman dɛn de, i rɔn go luk fɔ in brɔda dɛn. Na de di Filistin dɛn jayant we nem Golaya, kam ɛn bigin provok di Izrɛlayt dɛn. Na so i bin de du mɔnintɛm ɛn ivintɛm, fɔ 40 dez. I ala lawd wan se: ‘Una pik pɔsin fɔ kam fɛt mi. If i kil mi, wi go bi una slev. Bɔt if a kil am, una go bi wi slev. If una gɛt maynd una pik pɔsin fɔ kam fɛt mi.’

Devid aks sɔm pan di sojaman dɛn se: ‘Wetin dɛn go gi di pɔsin we go kil dis Filistin ɛn pul di Izrɛlayt dɛn pan shem?’

Wan pan di sojaman dɛn se: ‘Sɔl go gi di pɔsin bɔku jɛntri, ɛn i go mek di pɔsin mared in gyal pikin.’

Bɔt ɔl di Izrɛlayt dɛn de fred Golaya bikɔs i gɛt ayt ɛn trɛnk bad. I tɔl pas 9 fut, ɛn na wan ɔda sojaman kin ol in shild. Shild na sɔntin we sojaman dɛn bin de ol fɔ blɔk bad tin we want mit dɛn.

Sɔm sojaman dɛn go tɛl Kiŋ Sɔl se Devid want fɔ fɛt Golaya. Bɔt Sɔl tɛl Devid se: ‘Yu nɔ go ebul fɛt Golaya. Yu na smɔl bɔbɔ, ɛn Golaya dɔn bigin fɛt frɔm we i smɔl.’ Bɔt Devid tɛl am se: ‘A dɔn kil bia ɛn layɔn we bin want it mi papa in ship. Ɛn na so bak a go du dis Filistin. Jiova go ɛp mi.’ So Sɔl tɛl am se: ‘Go, mek Jiova ɛp yu.’

Devid go na wan watasay ɛn pik fayv ston dɛn. I put di ston dɛn insay in bag. Dɔn i tek wan tin we dɛn kin yuz fɔ sɛn ston, ɛn go fɔ go fɛt Golaya. We Golaya si am, i nɔ biliv se na dis smɔl bɔbɔ de kam fɛt am. I fil se i go izi fɔ kil Devid.

Golaya se: ‘Yu kam nia mi nɔmɔ, a go mek dɛn bɔd ɛn ɔda animal dɛn it yu dedebɔdi.’ Bɔt Devid se: ‘Yu de kam fɛt mi wit sɔd ɛn spia, bɔt na Jiova a abop pan. Tide, Jiova go mek a kil yu.’

Na de Devid bigin rɔn go to Golaya. Dɔn i pul wan ston na in bag ɛn put am pan di tin we dɛn kin yuz fɔ sɛn ston. Na de i sɛn di ston wit ɔl in trɛnk. Di ston go rayt insay Golaya in ed. Na de Golaya fɔdɔm na grɔn ɛn day. We di Filistin dɛn si se Golaya dɔn day, dɛn bigin rɔnawe. Di Izrɛlayt dɛn rɔnata dɛn, ɛn win di fɛt.