Wan man bin de liv na Ɔz we bin de wɔship Jiova. In nem na Job. In na bin jɛntriman we bin gɛt wan big famili. In na bin gud man. I bin de ɛp po pipul dɛn, uman dɛn we dɛn man dɛn dɔn day, ɛn pikin dɛn we nɔ gɛt mama ɛn papa. Fɔ se Job nɔ go ɛva gɛt prɔblɛm dɛn, bikɔs i bin de du wetin rayt?

Job nɔ bin no se Setan de wach am. Jiova tɛl Setan se: ‘Yu dɔn si mi savant Job? Nɔbɔdi nɔ tan lɛk am na di wɔl. I de lisin to mi ɛn i de du wetin rayt.’ Setan tɔk se: ‘Na tru, Job de obe yu. Yu de protɛkt ɛn blɛs am. Yu gi am land ɛn animal dɛn. If yu tek ɔl dɛn tin dɛn ya na i an, i go lɛf fɔ wɔship yu.’ Jiova tɛl am se: ‘Yu kin tɛst Job. Bɔt yu nɔ fɔ kil am.’ Wetin mek Jiova bin alaw Setan fɔ tɛst Job? Na bikɔs i bin biliv se Job nɔ go kɔmɔt biɛn am.

Setan bigin fɔ tɛst Job wit bɔku bɔku prɔblɛm dɛn. Fɔs, i bin sɛn pipul dɛn we dɛn kɔl di Sabian dɛn fɔ tif Job in kaw ɛn dɔnki dɛn. Dɔn faya bin kil Job in ship dɛn ɔl. Ɛn wan ɔda grup we dɛn kɔl di Kaldian dɛn bin tif in kamɛl dɛn. Dɛn bin kil in savant dɛn we bin de wach in animal dɛn. Afta dat, di wɔs prɔblɛm bin apin. Job in pikin dɛn ɔl bin day we di os usay dɛn bin de it ɛn drink fɔdɔm pan dɛn. Job in at bin rili pwɛl bɔt dat nɔ bin mek in lɛf fɔ sav Jiova.

Setan bin want Job fɔ sɔfa pas dat, so i bin mek bwɛl dɛn kɔmɔt  ɔlsay na in bɔdi. Job bin de rili fil pen. I nɔ bin no wetin mek ɔl dɛn tin dɛn ya bin de apin to am. Bɔt stil, Job bin de wɔship Jiova. Gɔd bin si ɔl dis ɛn i bin rili gladi wit Job.

Setan bin sɛn tri man dɛn fɔ go tɛst Job. Dɛn bin tɛl Job se: ‘Yu go mɔs dɔn sin ɛn yu de tray fɔ ayd am. Na Gɔd de pɔnish yu.’ Job tɛl dɛn se: ‘A nɔ du ɛni bad tin.’ Bɔt i bin bigin fɔ tink se na Jiova de mek ɔl dɛn prɔblɛm dɛn ya de mit am, ɛn i bin tɔk se Gɔd nɔ de trit am fia wan.

Wan yɔŋman we nem Ilayu bin de tek tɛm lisin to wetin dɛn bin de tɔk. Dɔn i tɛl dɛn se: ‘Wetin una ɔl dɔn tɔk nɔ kɔrɛkt. Wi nɔ ebul ɔndastand Jiova. I nɔ go ɛva du ɛnitin we bad. I de si ɔl wetin de apin, ɛn i de ɛp pipul dɛn we gɛt prɔblɛm dɛn.’

Dɔn Jiova bin tɔk to Job. I tɛl am se: ‘Usay yu bin de we a mek di ɛvin ɛn di wɔl? Wetin mek yu se a nɔ de du tin fia wan? Yu de tɔk bɔt yu nɔ no wetin mek tin dɛn de apin.’ Job gri se i dɔn mek mistek ɛn i tɔk se: ‘A bin rɔng. A bin dɔn yɛri bɔt yu bɔt na naw a rili no yu. Natin nɔ de we yu nɔ ebul fɔ du. A sɔri fɔ wetin a bin tɔk.’

We di tɛst bin dɔn Jiova bin mek Job gɛt wɛlbɔdi bak, ɛn i bin gi am bɔku tin dɛn pas wetin i bin gɛt fɔs. Job bin liv fɔ lɔng tɛm ɛn i bin gladi. Jiova bin blɛs Job fɔ we i lisin to am pan ɔl we i nɔ bin izi fɔ am. Yu go falamakata Job fɔ kɔntinyu fɔ wɔship Jiova ilɛk wetin apin?