Ɔl wetin di Faresi dɛn bin de du, na fɔ mek pipul dɛn kɔle pan dɛn. If dɛn du ɛni gud tin, na fɔ mek ɔda pipul dɛn si dɛn. Dɛn bin de pre na ples dɛn usay bɔku pipul dɛn kin de so dat ɔlman go si dɛn. Di Faresi dɛn bin de kram lɔng prea dɛn ɛn tɔk di sem tin ɔltɛm na di sinagɔg ɛn na di kɔna dɛn na di men strit dɛn usay bɔku pipul dɛn go yɛri dɛn. So di pipul dɛn bin sɔprayz we Jizɔs tɛl dɛn se: ‘Una nɔ pre lɛk di Faresi dɛn. Dɛn tink se Gɔd kin kɔle we dɛn de yuz bɔku wɔd dɛn, bɔt dat nɔto tru. We yu de pre, i fɔ de bitwin yu ɛn Jiova. Nɔ tɔk di sem tin dɛn ɛnitɛm we yu de pre. Jiova want fɔ mek yu tɛl am aw yu de rili fil.

‘Na so una fɔ pre: “Wi Papa we de na ɛvin, lɛ ɔlman tek yu nem as sɔntin we oli. Lɛ yu Kiŋdɔm kam. Lɛ wetin yu want, bi na  dis wɔl lɛk aw i de bi na ɛvin.”’ Jizɔs bin tɛl dɛn bak fɔ pre fɔ mek dɛn gɛt wetin dɛn go it fɔ di de, fɔ mek Gɔd fɔgiv dɛn sin dɛn, ɛn bɔt ɔda prɔblɛm dɛn we dɛn gɛt.

Jizɔs tɔk se: ‘Una nɔ ɛva stɔp fɔ pre. Una kɔntinyu fɔ aks Jiova fɔ gud tin dɛn. Mama ɛn papa dɛn want fɔ gi dɛn pikin dɛn gud tin dɛn. If yu bɔypikin aks yu fɔ mek yu gi am bred, yu go gi am ston? If i aks yu fɔ mek yu gi am fish, yu go gi am snek?’

Dɔn Jizɔs ɛksplen di lɛsin, i se: ‘If una no aw fɔ gi fayn gift to una pikin dɛn, una nɔ tink se una Papa, Jiova, go gi oli spirit to una? Ɔl wetin yu nid fɔ du na fɔ aks.’ Yu de fala Jizɔs in advays? Uskayn tin dɛn yu kin pre bɔt?