Afta we Jizɔs bin dɔn prich fɔ lɛk wan ia siks mɔnt, i bin gɛt fɔ disayd wan impɔtant tin. Udat i go pik fɔ wok wit am? Udat i go tren fɔ de bifo na di Kristian kɔngrigeshɔn? Jizɔs bin want fɔ lɛ Jiova dayrɛkt am fɔ disayd dɛn tin dɛn ya. So i go ɔp wan mawntin usay in wangren go de, ɛn i pre ol nɛt. Na mɔnin, Jizɔs kɔl in disaypul dɛn, ɛn i pik 12 apɔsul dɛn. Uswan pan dɛn nem dɛn yu mɛmba? Dɛn nem dɛn na Pita, Andru, Jems, Jɔn, Filip, Batalomi, Tɔmɔs, Matyu, Jems we na Alfiɔs in bɔypikin, Tadiɔs, Saymɔn, ɛn Judas Iskariɔt.

Di 12 apɔsul dɛn bin de travul wit am. Afta we i dɔn fɔ tren dɛn, i sɛn dɛn fɔ go prich fɔ dɛnsɛf. Jiova gi dɛn pawa fɔ pul dɛbul pan pipul dɛn ɛn fɔ mɛn pipul dɛn we sik.

Jizɔs kɔl di 12 apɔsul dɛn in padi dɛn ɛn i bin trɔst dɛn. Di Faresi dɛn bin tink se di apɔsul dɛn nɔ lan bɛtɛ buk ɛn na ɔdinari man dɛn. Bɔt Jizɔs bin tren dɛn fɔ du dɛn wok. Dɛn  go de wit Jizɔs di tɛm we rili impɔtant na in layf, lɛk bifo i de day ɛn afta we i gɛt layf bak. Lɛk Jizɔs, bɔku pan di 12 apɔsul dɛn kɔmɔt na Galili. Sɔm pan dɛn bin mared.

Di apɔsul dɛn nɔ pafɛkt ɛn dɛn bin de mek mistek dɛn. Sɔntɛnde, dɛn bin de tɔk bifo dɛn tink ɛn disayd fɔ du di rɔng tin dɛn. Ɔda tɛm dɛn de we dɛn bin sho se dɛn nɔ peshɛnt. Dɛn bin ivin agyu bɔt udat impɔtant pas dɛn ɔl. Bɔt dɛn na bin gud pipul dɛn we lɛk Jiova. Dɛn go bi di fɔs pipul dɛn na di Kristian kɔngrigeshɔn afta we Jizɔs go.