Gɔd in Kiŋdɔm ɔlrɛdi de rul. I nɔ go te igen, i go mek big chenj dɛn na di wɔl. Lɛ wi tɔk bɔt sɔm pan di gud tin dɛn we wi de wet fɔ si ɔnda di Kiŋdɔm.

1. Aw Gɔd in Kiŋdɔm go mek pis ɛn jɔstis de bak na di wɔl?

Jizɔs, we na di Kiŋ fɔ Gɔd in Kiŋdɔm, go dɔnawe wit wikɛd pipul dɛn ɛn gɔvmɛnt dɛn di tɛm fɔ Amagɛdɔn. (Rɛvɛleshɔn 16:​14, 16) Da tɛm de, di Baybul prɔmis we se: “Smɔl bit mɔ, yu nɔ go si di bad man igen” go rili apin. (Sam 37:​10) Jizɔs go yuz di Kiŋdɔm fɔ mek shɔ se pis ɛn jɔstis de ɔlsay na di wɔl.​—Rid Ayzaya 11:​4.

2. Aw layf go tan lɛk we wetin Gɔd want go bi na di wɔl?

Di tɛm we Gɔd in Kiŋdɔm go rul, “di wan dɛn we de du wetin rayt go gɛt di wɔl, ɛn dɛn go de de sote go.” (Sam 37:​29, NWT) Imajin aw layf go tan lɛk na wɔl usay ɔlman de du wetin rayt ɛn ɔlman lɛk Jiova ɛn dɛn lɛk dɛnsɛf! Nɔbɔdi nɔ go sik, ɛn ɔlman go de sote go.

3. Wetin Gɔd in Kiŋdɔm go du afta dɛn dɔn dɔnawe wit di wikɛd wan dɛn?

Afta dɛn dɔn dɔnawe wit di wikɛd wan dɛn, Jizɔs go rul as Kiŋ fɔ 1,000 ia. Insay da tɛm de, in ɛn di 144,000 pipul dɛn we go rul wit am go ɛp mɔtalman dɛn we go de na di wɔl fɔ pafɛkt ɛn nɔ sin. Bay di tɛm we di 1,000 ia go dɔn, di wɔl go tɔn to fayn fayn Paradays ɛn i go ful-ɔp wit pipul dɛn we gladi we go bɛnifit bikɔs dɛn de obe Jiova in lɔ dɛn. Dɔn Jizɔs go an ova di Kiŋdɔm bak to in Papa, Jiova. Da tɛm de, ɔlman go tek Jiova in “nem as sɔntin we oli” pas ɛni ɔda tɛm. (Matyu 6:​9, 10) Ɔlman go dɔn no se Jiova na gud Rula we bisin bɔt in pipul dɛn. Dɔn Jiova go dɔnawe wit Setan, di dimɔn dɛn, ɛn ɛni ɔda pɔsin we disayd fɔ tɔn agens di we aw i de rul. (Rɛvɛleshɔn 20:​7-​10) Di fayn fayn tin dɛn we Gɔd in Kiŋdɔm go kam wit go de sote go.

 LAN MƆ

4. Gɔd in Kiŋdɔm go dɔnawe wit mɔtalman gɔvmɛnt dɛn

“Mɔtalman dɔn sɔprɛs in kɔmpin ɛn mek i sɔfa.” (Ɛkliziastis 8:​9, NWT) Jiova go yuz in Kiŋdɔm fɔ mek dis nɔ apin igen.

Rid Daniɛl 2:​44 ɛn 2 Tɛsalonians 1:​6-8, dɔn una tɔk bɔt dɛn kwɛstyɔn dɛn ya:

• Wetin Jiova ɛn in Pikin, Jizɔs, go du to mɔtalman gɔvmɛnt dɛn ɛn di wan dɛn we de sɔpɔt dɛn?

• Aw wetin yu dɔn lan bɔt Jiova ɛn Jizɔs mek yu biliv se dɛn go du tin tret ɛn fia wan?

5. Jizɔs na di bɛst Kiŋ

As Kiŋ fɔ Gɔd in Kiŋdɔm, Jizɔs go du bɔku tin dɛn fɔ bɛnifit di wan dɛn we go de na di wɔl. Ple di VIDIO fɔ si aw Jizɔs dɔn ɔlrɛdi sho se i rili want fɔ ɛp pipul dɛn, ɛn Gɔd dɔn gi am di pawa fɔ du dat.

We Jizɔs bin de na di wɔl, i bin du tin dɛn we sho wetin di Kiŋdɔm go du. Uswan pan di blɛsin dɛn we de dɔŋ ya we yu rili want fɔ si? Rid di skripchɔ dɛn we de nia de we go ɛp yu fɔ lan mɔ bɔt dɛn blɛsin dɛn de.

6. Gɔd in Kiŋdɔm go mek wi ɛnjɔy fayn fayn tin dɛn tumara bambay

 WETIN YU DƆN LAN?

Gɔd in Kiŋdɔm go du wetin Gɔd want am fɔ du. I go chenj di wan ol wɔl ɛn mek i bi Paradays we ful-ɔp wit gud pipul dɛn we go wɔship Jiova sote go.

Rivyu

• Aw Gɔd in Kiŋdɔm go mek Jiova in nem oli?

• Wetin mek wi biliv se Gɔd in Kiŋdɔm go du wetin di Baybul bin dɔn prɔmis?

• Wetin Gɔd in Kiŋdɔm go du tumara bambay we yu rili want fɔ si?