LƐSIN 21

Aw Wi De Prich di Gud Nyuz?

PLE

I nɔ go te igen, Jiova go yuz in Kiŋdɔm fɔ pul ɔl wi prɔblɛm dɛn. Dis na gud nyuz we wi nɔ go ebul kip to wisɛf. Jizɔs bin want mek in disaypul dɛn tɛl ɔlman dis mɛsej! (Matyu 28:19, 20) Aw Jiova Witnɛs dɛn de du wetin Jizɔs bin se?

1. Aw Matyu 24:14 de apin tide?

Jizɔs bin tɔk se: “Dɛn go prich dis gud nyuz bɔt di Kiŋdɔm na di wan ol wɔl.” (Matyu 24:14) Jiova Witnɛs dɛn gladi fɔ du dis impɔtant wok. I dɔn pas 1,000 langwej dɛn we wi de prich di gud nyuz ɔlsay na di wɔl! Wi rili nid fɔ wok tranga wan ɛn ɔganayz wisɛf fɔ ebul du dis big wok. Wi nɔ go ebul du am if Jiova nɔ ɛp wi.

2. Wetin-ɛn-wetin wi kin du fɔ ebul prich to pipul dɛn?

Wi de prich ɛnisay we wi si pipul dɛn. Lɛk di fɔstɛm Kristian dɛn, wi de prich frɔm “os to os.” (Akt 5:42) Dis kayn we aw wi de prich, de mek wi ebul fɔ prich to bɔku bɔku pipul dɛn ɛni ia. Bikɔs pipul dɛn nɔ kin de na os ɔltɛm, wi de prich bak na bɔku pɔblik ples dɛn. Wi de luk fɔ ɛni chans we wi go gɛt fɔ tɛl pipul dɛn bɔt Jiova ɛn wetin i want.

3. Udat dɛn gɛt di wok fɔ prich di gud nyuz?

Ɔl tru Kristian dɛn gɛt di wok fɔ tɛl ɔda pipul dɛn bɔt di gud nyuz. Wi de tek dis wok as siriɔs tin. Wi de du ɔl wetin wi ebul du fɔ prich bikɔs wi no se di prichin wok de sev pipul dɛn layf. (Rid 1 Timoti 4:16.) Dɛn nɔ de pe wi fɔ du dis wok, bikɔs di Baybul se: “Una gɛt am fri, so una gi fri.” (Matyu 10:7, 8) Nɔto ɔlman kin gri fɔ lisin to wi mɛsej. Bɔt wi de kɔntinyu fɔ prich bikɔs di prichin wok na pat pan wi wɔship, ɛn i de mek Jiova gladi.

LAN MƆ

Lan mɔ bɔt wetin Jiova Witnɛs dɛn de du fɔ prich ɔlsay na di wɔl, ɛn si aw Jiova de ɛp wi.

Wi de prich ɔlsay na di wɔl: (A) Kosta Rika, (B) Amɛrika, (C) Bɛnin, (D) Tayland, (E) Yap, (F) Swidin

4. Wi de wok tranga wan fɔ prich to ɔlman

Jiova Witnɛs dɛn de tray tranga wan fɔ prich to pipul dɛn ɔlsay. Ple di VIDIO, dɔn una tɔk bɔt di kwɛstyɔn we de dɔŋ.

VIDIO: Dɛn De ‘Prich Ɔlɔbɔt Na Di Wɔl’ (7:33)

Wetin yu rili lɛk bɔt di we aw Jiova Witnɛs dɛn de tray tranga wan fɔ prich to pipul dɛn?

Rid Matyu 22:39 ɛn Romans 10:13-15, dɔn una tɔk bɔt dɛn kwɛstyɔn dɛn ya:

Aw wi prichin wok de sho se wi lɛk wi neba dɛn?
Aw Jiova de fil bɔt di wan dɛn we de prich di gud nyuz?—Rid vas 15.

5. Wi na Gɔd in kɔmpin wokman dɛn

Bɔku ɛkspiriɛns dɛn dɔn sho se na Jiova de dayrɛkt wi wok. Fɔ ɛgzampul, na Nyu Ziland wan brɔda we nem Pɔl bin mit wan uman we i de prich frɔm os to os wan aftanun. Da mɔnin de, di uman pre to Gɔd, i yuz Gɔd in nem Jiova, ɛn beg am fɔ mek sɔmbɔdi kam prich to am. Pɔl se: “Afta tri awa, a kam na in domɔt.”

Rid 1 Kɔrintians 3:9, dɔn una tɔk bɔt dis kwɛstyɔn:

Aw di ɛkspiriɛns frɔm Nyu Ziland sho se Jiova de dayrɛkt di prichin wok?

Rid Akt 1:8, dɔn una tɔk bɔt dis kwɛstyɔn:

Wetin mek wi nid Jiova in ɛp fɔ ebul du di prichin wok?

Yu bin no?

We wi de gɛt mitin insay di wik, wi kin gɛt trenin we de ɛp wi fɔ prich. If yu dɔn atɛnd ɛniwan pan dɛn mitin dɛn de, wetin yu tink bɔt di trenin we wi kin gɛt?

6. Wi de obe Gɔd in lɔ fɔ prich

Insay di fɔstɛm Kristian dɛn tɛm, sɔm pipul dɛn bin de tray fɔ stɔp Jizɔs in disaypul dɛn fɔ lɛ dɛn nɔ prich. Di fɔstɛm Kristian dɛn bin tinap tranga wan ɛn “yuz di lɔ fɔ gɛt rayt fɔ prich di gud nyuz.” (Filipians 1:7) Jiova Witnɛs dɛn de du di sem tin tide. a

Ple di VIDIO.