Sam 90:1-17
Mozis, we na di tru Gɔd in savant, in prea.
90 E Jiova, yu dɔn bi wi ples fɔ ayd frɔm jɛnɛreshɔn to jɛnɛreshɔn.
2 Yu bin dɔn de bifo di mawntin dɛn,Ɛn ivin bifo yu mek di wɔl ɛn di grɔn.Yu na Gɔd we nɔ gɛt biginin, ɛn yu nɔ gɛt ɛndin.
3 Yu mek mɔtalman go bak na dɔti;Yu tɔk se: “Una mɔtalman dɛn, una go bak.”
4 We wan tawzin ia pas, i kin jɔs tan lɛk yɛstade na yu yay,Lɛk tu-tri awa na nɛt.
5 Yu de pul dɛn jɔs lɛk dat; dɛn kin tan lɛk slip;Na mɔnin dɛn kin tan lɛk gras we bɔs.
6 Na mɔnin i de pul flawa ɛn frɛsh,Bɔt ivintɛm i de wida ɛn dray.
7 Yu wamat dɔn dɔnawe wit wi,Ɛn di vɛks we yu vɛks pan wi dɔn mek wi fred.
8 Yu put wi mistek dɛn bifo yu;*Di layt we de kɔmɔt na yu fes de pul wi sikrit dɛn na do.
9 Wi layf de dɔn bikɔs ɔf yu wamat;Wi de day kwik kwik wan lɛk we pɔsin de blo kam dɔŋ.
10 Wi kin liv fɔ 70 ia,Ɔ 80 if pɔsin rili strɔng.
Insay da tɛm de, wi kin gɛt bɔku trɔbul ɛn pwɛlat;Di tɛm kin pas kwik kwik wan, ɛn wi kin flay go.
11 Udat ɔndastand di kayn wamat we yu gɛt?
Yu gɛt wamat bad bad wan,
Ɛn wi fɔ fred yu bad bad wan.
12 Tich wi aw fɔ yuz wi layf di rayt we,So dat wi go gɛt sɛns.
13 E Jiova, kam bak! Aw lɔng dis go bi?
Sɔri fɔ yu savant dɛn.
14 Na mɔnin, mek wi satisfay wit yu lɔv we nɔ de chenj,So dat wi go siŋ lawd wan
Ɛn gladi ɔl di tɛm we wi de alayv.
15 Mek di tɛm we wi de gladiIkwal to di tɛm we yu dɔn mek wi sɔfa,
Lɛ wi gladi fɔ lɔng tɛm jɔs lɛk aw wi dɔn sɔfa fɔ lɔng tɛm.
16 Mek yu savant dɛn si wetin yu de du,Ɛn mek dɛn bɔypikin dɛn si yu glori.
17 Mek Jiova wi Gɔd gladi fɔ wi;Lɛ yu mek bɛtɛ fala wi pan wetin wi de du.
Yɛs, lɛ bɛtɛ fala wi pan wetin wi de du.
Futnot Dɛn
^ Ɔ “Yu no bɔt wi mistek dɛn.”
