Sam 81:1-16
To di wan we de dayrɛkt; di Gitit.* Esaf in siŋ.
81 Siŋ wit gladi-at bifo Gɔd we de gi wi trɛnk.
Ala lawd wan wit gladi-at bifo Jekɔp in Gɔd.
2 Bigin di myuzik ɛn tek tamborin,Tek ap we gɛt fayn sawnd wit instrumɛnt we gɛt string.
3 Blo di ɔn di de fɔ di nyu mun,Blo di ɔn di de fɔ di ful mun we na di de fɔ wi fɛstival.
4 Bikɔs na lɔ fɔ Izrɛl,Na kɔmandmɛnt frɔm Jekɔp in Gɔd.
5 I bin mek am fɔ mɛmba JosɛfWe i bin pas na Ijipt.
A bin yɛri vɔys* we a nɔ sabi:
6 “A pul di lod na in sholda;A pul di baskɛt na in an.
7 We yu bin kɔl mi di tɛm we yu gɛt prɔblɛm, a sev yu;A ansa yu frɔm di tik klawd.*
A tɛst yu usay di wata dɛn de na Mɛriba.* (Sila)
8 Mi pipul dɛn, una pe atɛnshɔn, ɛn a go tɔk agens una.
E Izrɛl, if nɔmɔ yu go lisin to mi.
9 Yu nɔ go gɛt no strenj gɔd,Ɛn yu nɔ go butu to ɔda neshɔn dɛn gɔd.
10 Mi, Jiova, na yu Gɔd,Na mi pul yu na Ijipt.
Opin yu mɔt big wan, ɛn a go ful-ɔp am.
11 Bɔt mi pipul dɛn nɔ lisin to mi vɔys;Izrɛl nɔ put insɛf ɔnda mi.
12 So a alaw dɛn fɔ fala dɛn at we trangayes;Dɛn du wetin dɛn tink se rayt.*
13 If nɔmɔ mi pipul dɛn go lisin to mi,If nɔmɔ Izrɛl go du wetin a se!
14 A go mek dɛn ɛnimi dɛn put dɛnsɛf dɔŋ kwik kwik wan;A go pɔnish di wan dɛn we de agens dɛn.
15 Di wan dɛn we et Jiova go trimbul ɛn fred bifo am,Ɛn di bad tin we go apin to dɛn go bi sote go.
16 Bɔt i go fid yu wit di wit* we fayn pas ɔl,Ɛn i go mek yu satisfay wit ɔni we dɛn pul na rɔk.”
Futnot Dɛn
^ Rid Baybul Wɔd dɛn Minin.
^ Ɔ “langwej.”
^ Insay Ibru, “usay di tɛnda ayd.”
^ I min “Plaba.”
^ Insay Ibru, “Dɛn fala dɛn yon advays.”
^ Wit na tin we pipul dɛn de it.
