Sam 50:1-23
Esaf in siŋ.
50 Jiova, di Gɔd fɔ ɔl gɔd dɛn,* dɔn tɔk;I kɔl ɔl di pipul dɛn na di wɔlFrɔm usay di san de kɔmɔt te to usay i de go dɔŋ.*
2 Gɔd de shayn na Zayɔn
We fayn te i nɔ gɛt wan bɔt.
3 Wi Gɔd go kam, ɛn i nɔ go sɛt in mɔt.
Faya we de kech de bifo am,Ɛn big big briz de rawnd am.
4 I kɔl ɔlman we de ɔp na ɛvin ɛn na di wɔlSo dat i go jɔj in pipul dɛn:
5 “Una kam to mi, una we nɔ de kɔmɔt biɛn mi;Di wan dɛn we de yuz sakrifays fɔ mek agrimɛnt wit mi.”
6 Di ɛvin de tɔk bɔt aw i de du wetin rayt.Gɔd insɛf sɛf na Jɔj. (Sila)
7 “E mi pipul dɛn, una lisin, ɛn a go tɔk;Izrɛl, a go bi witnɛs agens yu.
Mi na Gɔd, yu Gɔd.
8 A nɔ de kɔrɛkt yu bikɔs ɔf yu sakrifays dɛn,Ɔ bikɔs ɔf yu wan ol bɔn ɔfrin dɛn we de bifo mi ɔltɛm.
9 A nɔ nid fɔ tek man kaw na yu os,Ɔ tek yu got* dɛn.
10 Na mi gɛt ɔl di wayl animal dɛn we de na di fɔrɛst,Ivin di wayl animal dɛn we de na bɔku bɔku mawntin dɛn.
11 A sabi ɔl di bɔd dɛn we de na di mawntin dɛn;Na mi gɛt ɔl di bɔku bɔku animal dɛn we pɔsin nɔ ebul fɔ kɔnt we de na bush.
12 If a angri, a nɔ go tɛl yu.Na mi gɛt di wɔl ɛn ɔltin we de de.
13 Fɔ se a go it man kaw dɛn flɛsh ɛn drink got dɛn blɔd?
14 Lɛ di tɛl we yu de tɛl Gɔd tɛnki bi yu sakrifaysƐn gi di tin dɛn we yu dɔn vaw fɔ gi to di Wan We De Pantap Ɔlman.
15 Kɔl mi di tɛm we yu gɛt trɔbul.
A go sev yu, ɛn yu go ɔnɔ mi.”
16 Bɔt Gɔd go tɛl di wikɛd wan se:
“Us rayt yu gɛt fɔ tɔk bɔt mi lɔ dɛnƆ fɔ tɔk bɔt mi agrimɛnt?
17 Yu et kɔrɛkshɔn,*Ɛn yu dɔn tɔn yu bak pan wetin a de se.*
18 We yu si tifman, yu de gladi fɔ am,*Ɛn yu de kip kɔmpin wit di wan dɛn we nɔ fetful to dɛn man ɔ dɛn wɛf dɛn.
19 Yu de yuz yu mɔt fɔ tɔk wetin bad,Ɛn na lay lay tɔk dɛn de na yu tɔŋ.
20 Yu de sidɔm de tɔk agens yu yon brɔda;Yu de mek ɔlman no bɔt di fɔlt dɛn we yu mama in bɔypikin gɛt.
21 We yu bin du dɛn tin dɛn ya, a bin sɛt mi mɔt,So yu bin tink se a go tan lɛk yu.
Bɔt naw a go kɔrɛkt yu,Ɛn a go tɔk bɔt mi kes we a gɛt agens yu.
22 Duya una tink bɔt dis, una we de fɔgɛt Gɔd,So dat a nɔ go chɛr chɛr una ɛn nɔbɔdi nɔ go de fɔ sev una.
23 Di wan we de tɛl mi tɛnki as in sakrifays, de ɔnɔ mi,Ɛn as fɔ di wan we de kɔntinyu fɔ du wetin rayt,A go mek i si we a go sev am.”
Futnot Dɛn
^ Ɔ “Jiova, Gɔd, di pawaful wan.”
^ Ɔ “Frɔm ist to wɛst.”
^ Insay Ibru, “man got.”
^ Ɔ “di tin dɛn we a de tɛl yu.”
^ Insay Ibru, “trowe mi wɔd dɛn biɛn yu.”
^ Ɔ i kin bi, “yu de jɔyn am.”
