Sam 38:1-22
Devid in siŋ fɔ mɛmba.
38 E Jiova, nɔ kɔrɛkt mi we yu vɛks,Nɔ gi mi kɔrɛkshɔn we yu at wam.
2 Yu aro dɛn dɔn go rayt insay mi bɔdi,Ɛn yu an de prɛs pan mi.
3 Mi wan ol bɔdi sik bikɔs yu vɛks.
A nɔ gɛt pis bikɔs ɔf mi sin.
4 Mi sin dɛn dɔn bɔku pasmak;Dɛn tan lɛk ɛvi lod, a nɔ ebul fɔ bia dɛn ɔl.
5 Mi wund dɛn de smɛl ɛn dɛn de prɛdBikɔs ɔf di fulish tin dɛn we a du.
6 Mi at pwɛl bad bad wan;A de waka wit pwɛlat ol de.
7 A de fil lɛk se faya de bɔn mi;Mi wan ol bɔdi sik.
8 A dɔn sɔfa pasmak, ɛn a nɔ de fil ɛnitin;Di pen we de na mi at de mek a pini lawd wan.
9 E Jiova, yu sabi ɔl di tin dɛn we a rili want,Ɛn yu sabi di sɔfa we a de sɔfa.
10 Mi at de bit, a nɔ gɛt trɛnk igen,A nɔ de si fayn igen.
11 Mi padi dɛn ɛn mi kɔmpin dɛn dɔn avɔyd mi bikɔs ɔf di prɔblɛm we a gɛt,Ɛn mi tayt padi dɛn de push fa frɔm mi.
12 Di wan dɛn we de tray fɔ kil mi de sɛt trap dɛn fɔ mi;Di wan dɛn we de tray fɔ du mi bad de tɔk bad bad tin dɛn;Dɛn de tɔk lay lay tin dɛn ol de.
13 Bɔt jɔs lɛk pɔsin we dɛf, a nɔ go yɛri dɛn,A nɔ go tɔk natin, lɛk pɔsin we na mumu.
14 A dɔn tan lɛk pɔsin we nɔ de yɛri,We nɔ gɛt natin fɔ se fɔ tɔk fɔ insɛf.
15 E Jiova, na yu a de wet fɔ,Ɛn yu dɔn ansa mi, E Jiova mi Gɔd.
16 A tɛl misɛf se: “Lɛ dɛn nɔ gladi bikɔs ɔf wetin de apin to miƆ es dɛnsɛf ɔp bikɔs a bɔk mi fut.”
17 A bin dɔn rɛdi fɔ fɔdɔm,Ɛn a bin de fil pen ɔltɛm.
18 A kɔnfɛs mi mistek;Mi sin de mek mi at pwɛl.
19 Bɔt mi ɛnimi dɛn pawaful* ɛn strɔng,Di wan dɛn we et mi fɔ no rizin dɔn rili bɔku.
20 Dɛn de pe mi wit bad fɔ di gud we a du;Dɛn de tray fɔ stɔp mi fɔ mek a nɔ kɔntinyu fɔ du wetin gud.
21 E Jiova, nɔ lɛf mi.
E Gɔd, nɔ kɔntinyu fɔ de fa frɔm mi.
22 Duya, mekes ɛp mi,E Jiova, di wan we de sev mi.
Futnot Dɛn
^ Insay Ibru, “de alayv.”
