Sam 27:1-14
Devid in siŋ.
27 Jiova na mi layt, ɛn na in de sev mi.
Udat a fɔ fred?
Jiova tan lɛk sef ples we de protɛkt mi layf.
Udat a fɔ fred?
2 We wikɛd pipul dɛn atak mi fɔ dɔnawe wit mi,Na di wan dɛn we et mi, ɛn mi ɛnimi dɛn bin staga ɛn fɔdɔm.
3 Pan ɔl we sojaman dɛn go sɔrawnd mi,A nɔ go fred.
Pan ɔl we dɛn go kam fɔ fɛt mi,A go stil gɛt kɔnfidɛns.
4 Wan tin we a dɔn aks Jiova fɔ,We a de luk fɔ,Na fɔ lɛ a de na Jiova in os te a day,Fɔ si Jiova in gudnɛsƐn fɔ kɔle we a de wach in tɛmpul.
5 I go ayd mi usay i de di tɛm we prɔblɛm de;I go ayd mi na di sikrit ples na in tɛnt,Ɛn i go put mi pantap rɔk usay a go sef.
6 Naw mi ed de rayt ɔp oba mi ɛnimi dɛn we sɔrawnd mi;A go ala wit gladi-at we a de mek sakrifays dɛn na in tɛnt;A go siŋ fɔ prez* Jiova.
7 E Jiova, yɛri mi we a kray to yu;Duya, sɔri fɔ mi ɛn ansa mi.
8 Mi at de mɛmba mi bɔt yu lɔ se:
“Luk fɔ mi.”
E Jiova, a go luk fɔ yu.
9 Nɔ ayd yu fes pan mi.
Nɔ drɛb yu savant we yu vɛks.
Na yu de ɛp mi;Mi Gɔd we de sev mi, nɔ tɔn yu bak pan mi ɔ lɛf mi.
10 Ilɛksɛf mi yon mama ɛn papa lɛf mi,Jiova go tek mi.
11 E Jiova, tich mi yu yon we,Mek lɛ a waka na di say usay dɛn de du wetin rayt bikɔs ɔf mi ɛnimi dɛn.
12 Nɔ an ova mi to mi ɛnimi dɛn,Bikɔs lay lay witnɛs dɛn dɔn kam agens mi,Ɛn dɛn de trɛtin fɔ du bad to mi.
13 Usay a go de if a nɔ gɛt fetSe a go si Jiova in gudnɛs na di land usay pipul dɛn we de alayv de?*
14 Abop pan Jiova;Gɛt maynd ɛn tinap tranga wan.
Fɔ tru, abop pan Jiova.
Futnot Dɛn
^ Ɔ “mek myuzik fɔ.”
^ Ɔ i kin bi, “Fɔ tru, a gɛt fet se a go si Jiova in gudnɛs na di land usay pipul dɛn we de alayv de.”
