Mayka 1:1-16
1 Dis na di mɛsej we Jiova gi to Mayka,* we kɔmɔt na Morɛshɛt, insay wan vishɔn bɔt Sameria ɛn Jerusɛlɛm. Dis apin insay Jotam, Eaz, ɛn Ɛzikaya dɛn tɛm, we na bin kiŋ dɛn na Juda:
2 “Una ɔl lisin!
Lɛ di wan ol wɔl ɛn ɔl wetin de insay de pe atɛnshɔn,Jiova de na in oli tɛmpul,Ɛn lɛ Jiova di Masta We De Rul Ɔlman bi witnɛs agens una.
3 Luk! Jiova de kɔmɔt na di ples we i de;I go kam dɔŋ ɛn waka na di ay ples dɛn na di wɔl.
4 Di mawntin dɛn go mɛlt ɔnda in fut,Ɛn di vali* dɛn go plitLɛk waks we de bifo faya,Lɛk wata we dɛn tɔn na say we na rɔndɔŋ.
5 Ɔl dis na bikɔs Jekɔp tɔn in bak pan Gɔd,Ɛn na bikɔs ɔf Izrɛl in pikin dɛn sin dɛn.
Wetin mek Jekɔb tɔn in bak pan Gɔd?
Nɔto Sameria?
Ɛn udat fɔ blem fɔ di ay ples dɛn na Juda?
Nɔto Jerusɛlɛm?
6 A go mek Sameria bi pwɛl pwɛl tin dɛn we payl na fil,A go mek i bi ples fɔ plant vayn gadin dɛn;A go trowe in ston dɛn dɔŋ di vali,Ɛn a go mek dɛn si in fawndeshɔn dɛn.
7 A go nyamanyama ɔl di imej dɛn we i kav;Ɛn ɔl di gift dɛn we i gɛt as pemɛnt,* a go bɔn dɛn na faya.
A go pwɛl ɔl in aydɔl dɛn.
Bikɔs i gɛt dɛn frɔm di pe we dɛn de pe am fɔ in rare wok,Ɛn dɛn go bi pemɛnt bak fɔ raregal dɛn.”
8 Bikɔs ɔf dis, a go kray lawd lawd wan;A go waka biafut ɛn nekɛd.
A go kray lawd wan lɛk jakal* dɛn,Ɛn a go kray lɛk ɔstrich dɛn.
9 In wund nɔ de wɛl;I dɔn rich te Juda.
Di pɔnishmɛnt dɔn rich to mi pipul dɛn get na Jerusɛlɛm.
10 “Una nɔ anawns am na Gat;Una nɔ kray atɔl.
Lɛ di pipul dɛn na Bɛt-afra rol na dɔti.
11 E di pipul dɛn na Shefia, una krɔs oba nekɛd wan ɛn shemful wan.
Di pipul dɛn na Zeanan nɔ bin kɔmɔt na do.
Dɛn go kray lawd wan na Bɛt-izɛl, ɛn i nɔ go sɔpɔt una igen.
12 Di pipul dɛn na Merɔt bin de wet fɔ gud tin,Bɔt na bad tin Jiova dɔn mek apin na di get na Jerusɛlɛm.
13 E di pipul dɛn na Lekish, una tay di chariɔt dɛn to di ɔs dɛn.
Na una mek di pipul dɛn na Zayɔn sin,Na una mek di pipul dɛn na Izrɛl tɔn dɛn bak pan Gɔd.
14 So yu go gi gift to Mɔrɛshɛt-gat we i de go.
Di pipul dɛn na Akzib lay to di kiŋ dɛn na Izrɛl.
15 E di pipul dɛn na Marisha, a go briŋ di wan we go kɔnka una.
Di glori na Izrɛl go rich te Adɔlam.
16 Una mek toloŋ ɛn pul ɔl una ia fɔ una pikin dɛn we una lɛk.
Una mek toloŋ lɛk yuba,*Bikɔs dɛn dɔn kɛr una pikin dɛn go.”
Futnot Dɛn
^ Dis na di shɔt we fɔ kɔl Maykɛl ɔ Maykaya, we min “Udat Tan Lɛk Jiova?”
^ Ɔ “flat land.”
^ Ɔ “ɔl di pe we dɛn de pe am fɔ in rare wok.”
^ Na animal we tan lɛk dɔg.
^ Di Ibru wɔd kin min bak igul.
