Mak 4:1-41
4 I bigin fɔ tich bak nia di si ɛn bɔku bɔku pipul dɛn kam gɛda nia am. So i go sidɔm insay wan bot ɛn mek di bot go biɛn smɔl, bɔt di krawd bin de nia di si, na di bich.
2 Ɛn i bigin fɔ yuz ɛgzampul dɛn fɔ tich dɛn bɔku tin dɛn. We i bin de tich dɛn, i tɛl dɛn se:
3 “Una lisin. Wan fama bin go fɔ go plant.
4 As i de plant, sɔm sid dɛn fɔdɔm na di rod, ɛn bɔd dɛn kam it dɛn.
5 Ɔda wan dɛn fɔdɔm na say we rɔk dɛn de usay bɛtɛ dɔti nɔ de, ɛn dɛn bɔs wantɛm wantɛm bikɔs di dɔti nɔ bɔku.
6 Bɔt we di san bigin shayn, i wam dɛn pasmak, ɛn dɛn wida bikɔs dɛn nɔ gɛt ɛni rut.
7 Ɔda sid dɛn fɔdɔm midul chukchuk, ɛn di chukchuk gro ɛn chok dɛn, ɛn dɛn nɔ bia frut.
8 Bɔt ɔda wan dɛn fɔdɔm na fayn dɔti, ɛn dɛn gro big wan ɛn bigin fɔ bia frut. Sɔm bia 30, sɔm bia 60, ɛn sɔm bia 100 tɛm pas wetin i plant.”
9 Dɔn i tɔk se: “Lɛ di wan we gɛt yes fɔ lisin, lisin.”
10 We in wan bin de, di wan dɛn we bin de nia am ɛn di 12 apɔsul dɛn bigin fɔ aks am wetin di ɛgzampul dɛn min.
11 I tɛl dɛn se: “Gɔd dɔn alaw una fɔ ɔndastand di oli sikrit bɔt in Kiŋdɔm, bɔt a de yuz ɛgzampul dɛn fɔ tich di ɔda wan dɛn
12 so dat, pan ɔl we dɛn de luk, dɛn nɔ go si, ɛn pan ɔl we dɛn de yɛri, dɛn nɔ go ɔndastand ɔ tɔn bak to Gɔd mek i fɔgiv dɛn.”
13 Dɔn i aks dɛn se: “If una nɔ no dis ɛgzampul, aw una go ɔndastand ɔl di ɔda ɛgzampul dɛn?
14 “Di fama na di wan we de prich Gɔd in wɔd.
15 Di sid dɛn we fɔdɔm na di rod na pipul dɛn we yɛri Gɔd in wɔd; bɔt we dɛn yɛri am, i nɔ tu te Setan kam pul am kɔmɔt na dɛn at.
16 Semweso, di sid dɛn we fɔdɔm na say we rɔk dɛn de, na pipul dɛn we yɛri Gɔd in wɔd. As dɛn yɛri am so, dɛn gladi fɔ am.
17 Bɔt bikɔs Gɔd in wɔd nɔ go insay dɛn at gud gud wan, dɛn biliv fɔ sɔm tɛm, bɔt as prɔblɛm kam ɔ pipul dɛn mek dɛn sɔfa bikɔs ɔf Gɔd in wɔd, dɛn lɛf fɔ biliv.
18 Di wan dɛn we fɔdɔm midul chukchuk na pipul dɛn we dɔn yɛri Gɔd in wɔd,
19 bɔt di wɔri wɔri we de naw,* di ful we jɛntri kin ful pɔsin, ɛn di want we pɔsin kin want ɔltin kam na dɛn at ɛn chok Gɔd in wɔd, te Gɔd in wɔd tan lɛk plant we nɔ ebul bia frut.
20 Dɔn di wan dɛn we fɔdɔm na di fayn dɔti na pipul dɛn we lisin to Gɔd in wɔd, dɛn gladi fɔ yɛri am, ɛn dɛn tan lɛk plant we de bia frut. Sɔm bia 30, sɔm 60, ɛn sɔm bia 100 tɛm pas wetin i plant.”
21 I tɛl dɛn bak se: “Dɛn nɔ de layt lamp fɔ put am ɔnda baskɛt ɔ put am ɔnda bed, nɔto so? Dɛn de layt am ɛn put am pan stand fɔ put lamp, nɔto so?
22 Natin nɔ de we ayd we nɔ go kɔmɔt na do ɛn natin nɔ de we dɛn tek tɛm kip we nɔ go kɔmɔt na do.
23 Ɛnibɔdi we gɛt yes fɔ lisin, lɛ i lisin.”
24 I tɛl dɛn bak se: “Una pe atɛnshɔn to wetin una de yɛri. Aw una de mɛzhɔ fɔ ɔda pipul dɛn, na so dɛn go mɛzhɔ fɔ una, ɛn dɛn go ivin ad mɔ fɔ una.
25 Ɛnibɔdi we gɛt go gɛt mɔ, bɔt ɛnibɔdi we nɔ gɛt, ivin wetin i gɛt, nɔ go lɛf na in an.”
26 Ɛn i tɛl dɛn se: “Gɔd in Kiŋdɔm jɔs tan lɛk we pɔsin plant sid dɛn na grɔn.
27 We i de slip na nɛt ɛn wek na mɔnin, di sid bɔs ɛn gro, bɔt i nɔ no aw dat apin.
28 Na smɔl smɔl di grɔn de bia frut bay insɛf. Di smɔl tik we jɔyn di lif to di plant na in fɔs kin sho, dɔn di ed, ɛn leta di sid we de insay we dɔn rɛp.
29 Bɔt as di plant rɛp so, i de yuz sikul* fɔ kɔt am bikɔs avɛst tɛm dɔn kam.”
30 Ɛn i tɛl dɛn se: “Wetin wi go kɔmpia Gɔd in Kiŋdɔm wit, ɔ us ɛgzampul we wi go yuz fɔ ɛksplen am?
31 I tan lɛk mɔstad sid, we smɔl pas ɔl di ɔda sid dɛn na di wɔl di tɛm we dɛn plant am na grɔn.
32 Bɔt i kin gro ɛn big pas ɔl di ɔda plant dɛn we na vɛjitebul ɛn in branch dɛn kin big big ɛn di bɔd dɛn we de flay na di skay kin kam liv ɔnda in shed.”
33 I gi dɛn bɔku ɛgzampul dɛn lɛk dɛn wan ya we i de tɔk to dɛn, di we aw dɛn go ɔndastand.
34 Fɔ tru, i nɔ go tɔk to dɛn pas i yuz ɛgzampul, bɔt i kin ɛksplen ɔltin to in disaypul dɛn.
35 Da de de we ivintɛm kam, i tɛl dɛn se: “Lɛ wi krɔs go na di ɔdasay na di si.”
36 So afta dɛn dɔn mek di krawd go, dɛn go wit Jizɔs na di bot, ɛn ɔda bot dɛn bin de wit am.
37 Na de big big briz bigin blo, ɛn di swɛlin bin de kam insay di bot, i lɛf smɔl lɛ di bot ful-ɔp wit wata.
38 Bɔt i bin de biɛnsay na di bot, i le in ed pan pila* de slip. So dɛn wek am ɛn tɛl am se: “Ticha, yu nɔ si se na day wi de kam day so?”
39 So i grap ɛn tɔk pan di briz ɛn tɛl di si se: “Stɔp! Stɛdi!” Ɛn di briz stɔp, ɛn di ples rili kwayɛt.
40 Dɔn i tɛl dɛn se: “Wetin mek una de fred so? Te naw, una nɔ gɛt ɛni fet?”
41 Bɔt dɛn fred bad bad wan ɛn tɛl dɛn kɔmpin dɛn se: “Udat rili na dis man? Ivin di briz ɛn di si de obe am.”
Futnot Dɛn
^ Ɔ “dis tɛm.” Rid Baybul Wɔd dɛn Minin.
^ Dis na wan big nɛf we kɔv we dɛn kin yuz fɔ avɛst.
^ Ɔ “kushin.”
