Ibruz 5:1-14
5 Ɛni mɔtalman ay prist we dɛn pik, dɛn pik am fɔ mɔtalman fɔ lɛ i de oba di tin dɛn we gɛt fɔ du wit Gɔd, so dat i go gi gift dɛn ɛn mek sakrifays dɛn fɔ dɛn sin.
2 I ebul fɔ sho se i de sɔri fɔ* di wan dɛn we nɔ no wetin rayt ɛn we de sin,* bikɔs insɛf gɛt say dɛn we i wik,
3 so i fɔ mek sakrifays dɛn fɔ in yon sin dɛn jɔs lɛk aw i de mek fɔ di pipul dɛn.
4 Nɔbɔdi nɔ de mek insɛf ay prist, pas Gɔd kɔl am, jɔs lɛk aw i kɔl Erɔn.
5 Semweso, Krays nɔ gi insɛf glori bay we i bi ay prist, bɔt na di Pɔsin we tɛl am se: “Yu na mi pikin; tide a dɔn bi yu papa,” na in gi am da glori de.
6 Jɔs lɛk aw i tɔk na wan ɔdasay se, “Yu na prist sote go jɔs lɛk Mɛlkizidɛk.”
7 Di tɛm we Krays bin de na di wɔl, i bin de tɔk lawd wan ɛn kray we i de rili beg ɛn aks di Wan we ebul fɔ sev am mek i nɔ day, fɔ ɛp am, ɛn Gɔd bin yɛri am bikɔs i bin de fred Gɔd.
8 Pan ɔl we in na Gɔd in Pikin, di sɔfa we i sɔfa mek i lan aw fɔ obe.
9 Afta i dɔn pafɛkt, i ebul mek ɔl di wan dɛn we de obe am sev sote go,
10 bikɔs Gɔd dɔn pik am fɔ bi ay prist jɔs lɛk Mɛlkizidɛk.
11 Wi gɛt bɔku tin fɔ tɔk bɔt am, ɛn i at fɔ ɛksplen, bikɔs una nɔ de yɛri fa igen.
12 Pan ɔl we bay naw una fɔ bi ticha dɛn, una stil nid pɔsin fɔ tich una di pikin pikin tin dɛn bɔt Gɔd in mɛsej frɔm di biginin, ɛn naw una nid milk bak, nɔto ɛvi fud una nid.
13 Ɛnibɔdi we kɔntinyu fɔ drink milk nɔ no Gɔd in wɔd we de tich wi wetin rayt, bikɔs in na smɔl pikin.
14 Bɔt ɛvi fud na fɔ di wan dɛn we machɔ, dat na, di wan dɛn we dɔn tren dɛn maynd bay we dɛn de yuz am, so dat dɛn go ebul no wetin rayt ɛn wetin rɔng.
