Taytɔs 3:1-15
3 Kɔntinyu fɔ mɛmba dɛn fɔ put dɛnsɛf dɔŋ ɛn fɔ obe di gɔvmɛnt dɛn ɛn di wan dɛn we gɛt pawa, fɔ mek dɛn rɛdi fɔ du ɔlkayn gud wok,
2 lɛ dɛn nɔ tɔk bad bɔt ɛnibɔdi, lɛ dɛn nɔ lɛk fɔ mek plaba, lɛ dɛn nɔ de pin, ɛn lɛ dɛn tek tɛm du tin wit ɔlman.
3 Tɛm bin de we wisɛf nɔ bin gɛt sɛns, we wi nɔ bin de obe, we dɛn bin de ful wi, we wi bin de du ɔlkayn tin we wi want ɛn ɛnjɔy wisɛf ɔlkayn we, we wi bin de du bad ɛn milɛ, we wi na bin pipul dɛn we rili bad, ɛn we wi bin et wi kɔmpin dɛn.
4 Bɔt we Gɔd, we na wi Seviɔ, sho in gudnɛs ɛn lɔv to mɔtalman
5 (nɔto bikɔs wi dɔn du tin dɛn we rayt, bɔt na bikɔs ɔf in sɔri-at), i sev wi bay we i was wi we mek wi gɛt layf ɛn bay we i yuz oli spirit fɔ mek wi bi nyu pipul dɛn.
6 I yuz Jizɔs Krays, we na wi Seviɔ, fɔ gi wi dis spirit bɔku bɔku wan,
7 so afta we i go dɔn yuz in spɛshal gudnɛs* fɔ tɔk se wi na pipul dɛn we de du wetin rayt, wi go gɛt di op fɔ gɛt layf we go de sote go we i bin dɔn prɔmis.
8 Dɛn wɔd ya na tru, ɛn a want mek yu kɔntinyu fɔ tɔk mɔ bɔt dɛn tin ya, so dat di wan dɛn we dɔn biliv Gɔd go put dɛn atɛnshɔn pan aw dɛn go kɔntinyu fɔ du fayn wok dɛn. Dɛn tin ya fayn ɛn dɛn go bɛnifit pipul dɛn.
9 Bɔt nɔ jɔyn pan dɛn fulish agyumɛnt dɛn ɛn tɔk dɛn we gɛt fɔ du wit dɛn gret gret granpa dɛn nem ɛn nɔ agyu bɔt di Lɔ, bikɔs dɛn tin ya nɔ gɛt wan bɛnifit ɛn dɛn nɔ mek sɛns.
10 Ɛnibɔdi we de mek grup we de tich difrɛn tin na fɔ avɔyd am afta yu dɔn wɔn am tu tɛm,
11 bikɔs da kayn pɔsin de dɔn lɛf fɔ waka na di rayt rod, ɛn i de sin ɛn i dɔn kɔndɛm insɛf.
12 We a sɛn Atɛmas ɔ Tikikɔs to yu, tray yu bɛst fɔ kam to mi na Nikɔpolis, bikɔs na de a dɔn disayd fɔ de insay di kol sizin.
13 Du ɔl wetin yu ebul fɔ ɛp Zinas, we sabi di Lɔ gud gud wan, ɛn Apɔlɔs wit wetin dɛn nid fɔ travul.
14 Bɔt lɛ wi pipul dɛn lan fɔ de du gud wok dɛn we go mek dɛn ɛp di tɛm we nid de fɔ du dat kwik kwik wan, so dat dɛn nɔ go lɛf fɔ du gud tin dɛn.
15 Ɔl di wan dɛn we de wit mi de grit yu. Grit di wan dɛn we lɛk wi ɛn we wi ɔl biliv di Masta.
Mek Gɔd in spɛshal gudnɛs* de pan una ɔl.
