Rɛvɛleshɔn 12:1-17
12 Dɔn a si wan wɔndaful sayn na ɛvin: Wan uman bin wɛr di san lɛk klos, ɛn di mun bin de ɔnda in fut dɛn, ɛn wan krawn we gɛt 12 sta dɛn bin de na in ed,
2 ɛn i bin gɛt bɛlɛ. Ɛn i bin de fil pen ɛn kray bikɔs i want fɔ bɔn.
3 A si wan ɔda sayn na ɛvin. A si wan dragɔn we in kɔlɔ tan lɛk faya, i gɛt sɛvin ed ɛn tɛn ɔn ɛn pan in ed dɛn i gɛt sɛvin tin dɛn we tan lɛk krawn;*
4 ɛn in tel drɛg wan pat pan di sta dɛn na ɛvin we yu sheb di sta dɛn to tri pat, ɛn i ib dɛn na di wɔl. Ɛn di dragɔn kɔntinyu fɔ tinap bifo di uman we bin want fɔ bɔn, so dat we i bɔn, di dragɔn go swɛla in pikin.
5 Ɛn di uman bɔn bɔypikin we go bi shɛpad fɔ ɔl di neshɔn dɛn ɛn na rɔd we dɛn mek wit ayɛn go de na in an. Ɛn dɛn tek in pikin kwik kwik wan ɛn kɛr am go to Gɔd ɛn in tron.
6 Ɛn di uman rɔnawe go na di wildanɛs,* usay Gɔd bin dɔn rɛdi ples fɔ am ɛn usay dɛn go fid am fɔ 1,260 dez.
7 Ɛn wɔ fɔdɔm na ɛvin: Maykɛl* ɛn in enjɛl dɛn fɛt di dragɔn, ɛn di dragɔn ɛn in enjɛl dɛn fɛt
8 bɔt dɛn nɔ win, ɛn ples nɔ bin de igen fɔ dɛn na ɛvin.
9 So dɛn ib di dragɔn dɔŋ, di orijinal snek, di wan we dɛn de kɔl Dɛbul ɛn Setan, we de ful di wan ol wɔl; dɛn ib am dɔŋ na di wɔl, dɛn ib am dɔŋ wit in enjɛl dɛn.
10 A yɛri wan lawd vɔys na ɛvin se:
“Naw Gɔd dɔn mek we fɔ mek pipul dɛn sev, i dɔn sho in pawa, i dɔn mek in Kiŋdɔm, ɛn Krays dɔn bigin yuz in pawa, bikɔs dɛn dɔn ib di wan we de fɛn fɔlt pan wi brɔda dɛn go dɔŋ, di wan we de fɛn fɔlt pan dɛn de ɛn nɛt bifo wi Gɔd!
11 Ɛn dɛn win am bikɔs ɔf di Yɔŋ Ship in blɔd ɛn bikɔs ɔf di mɛsej we dɛn de prich, ɛn dɛn nɔ lɛk dɛn layf* ivin if dɛn go day.
12 Bikɔs ɔf dis, mek di wan dɛn we de na ɛvin gladi! Bɔt trɔbul go de na di wɔl ɛn di si, bikɔs di Dɛbul dɔn kam dɔŋ to una, ɛn i vɛks bad bad wan, bikɔs i no se na smɔl tɛm i gɛt.”
13 We di dragɔn si se dɛn dɔn ib am dɔŋ na di wɔl, i mek di uman we bɔn di bɔypikin sɔfa.
14 Bɔt dɛn gi di uman di big igul in tu wiŋ dɛn, so dat i go flay go na in ples na di wildanɛs,* usay dɛn go fid am fɔ wan tɛm, tu tɛm, ɛn af tɛm* usay di snek nɔ go si am.
15 Ɛn di snek pul bɔku bɔku wata na in mɔt we tan lɛk riva biɛn di uman, so dat di uman go drawn insay di riva.
16 Bɔt di grɔn ɛp di uman, ɛn di grɔn opin in mɔt ɛn swɛla di riva we di dragɔn bin pul na in mɔt.
17 So di dragɔn vɛks bad bad wan pan di uman, ɛn i go fɔ fɛt wɔ wit di uman in ɔda pikin dɛn we lɛf, we de obe Gɔd in lɔ dɛn ɛn we gɛt di wok fɔ prich bɔt Jizɔs.
Futnot Dɛn
^ Ɔ “kiŋ edban.”
^ Rid Baybul Wɔd dɛn Minin.
^ I min “Udat Tan Lɛk Gɔd?”
^ Ɔ “sol.” Rid Baybul Wɔd dɛn Minin.
^ Rid Baybul Wɔd dɛn Minin.
^ Dat na, tri ɛn af tɛm.
