Prɔvabs 26:1-28
26 Jɔs lɛk sno insay dray sizin tɛm ɛn ren we de kam avɛst tɛm,Na so pɔsin we ful nɔ fit fɔ gɛt ɔnɔ.
2 Jɔs lɛk we bɔd gɛt rizin fɔ rɔnawe ɛn swalo bɔd gɛt rizin fɔ flay,Na so swɛ nɔ de fɔdɔm fɔ no gud rizin.*
3 Wip de fɔ ɔs, braydul* de fɔ dɔnki,Ɛn ken de fɔ fulman dɛn bak.
4 Nɔ ansa fulman lɛk se yusɛf na fulman,So dat yu nɔ go put yusɛf na in lɛvul.*
5 Ansa fulman di we we de sho se in na fulman,So dat i nɔ go tink se i gɛt sɛns.
6 Ɛnibɔdi we de gi fulman wok fɔ du,Tan lɛk pɔsin we de mek insɛf kripul ɛn du bad to insɛf.
7 Di parebul we ful pipul dɛn de tɔk,Tan lɛk kripul pɔsin in wik wik fut dɛn.
8 Fɔ prez pɔsin we ful,Tan lɛk we yu de tay ston pan sling.*
9 Di parebul we ful pipul dɛn de tɔk,Tan lɛk chukchuk plant we de na pɔsin we drɔnk in an.
10 Pɔsin we de aya fulman ɛn di wan dɛn we de pas,Tan lɛk pɔsin we de yuz bo ɛn aro we de wund pipul dɛn ɛni aw.*
11 Pɔsin we ful de ripit in fulishnɛs,Jɔs lɛk dɔg we de go bak to in vɔmit.
12 Yu dɔn si pɔsin we tink se i gɛt sɛns?
Pɔsin we ful gɛt mɔ op pas am.
13 Pɔsin we lezi de tɔk se: “Yɔŋ layɔn de na rod,Layɔn de na di pɔblik ples!”*
14 Jɔs lɛk domɔt we de tɔn tɔn na in injisNa so pɔsin we lezi de tɔn tɔn na in bed.
15 Pɔsin we lezi de put in an insay bol fɔ it,Bɔt i kin taya pasmak fɔ es in an ɛn put am na in mɔt.
16 Pɔsin we lezi tink se i gɛt sɛnsPas sɛvin pipul dɛn we ansa wit sɛns.
17 Pɔsin we de vɛks fɔ* plaba we nɔto in yonTan lɛk pɔsin we ol dɔg in yes.
18 Kresman we de shut wɛpɔn dɛn we gɛt faya, ɛn aro dɛn we de kil, tan lɛk
19 Pɔsin we de ple trik pan in neba ɛn tɔk se, “A bin jɔs de jok!”
20 Usay wud nɔ de, faya de ɔt,Ɛn usay pɔsin we de pwɛl ɔda pɔsin in nem nɔ de, plaba de dɔn.
21 Lɛk aw chakol de mek faya nɔ ɔt, ɛn wud de mek faya kech,Na so pɔsin we lɛk agyumɛnt kin kam wit plaba.
22 Di tin dɛn we pɔsin we de pwɛl sɔmbɔdi in nem de tɔk tan lɛk cham cham we swit;*Pipul dɛn kin swɛla am go rayt dɔŋ insay dɛn bɛlɛ.
23 Di swit wɔd dɛn we pɔsin we gɛt badat de tɔk,Tan lɛk we dɛn rɔb silva pan sɔntin we dɛn mek wit kle.
24 Pɔsin we et ɔda pipul dɛn de kɔba am bay aw i de tɔk,Bɔt insay in at na soso lay lay.
25 Pan ɔl we i de tɔk fayn fayn wɔd dɛn, nɔ biliv am,Bikɔs sɛvin tin dɛn we rili bad de insay in at.
26 Pan ɔl we i de yuz lay fɔ ayd di et we i et pɔsin,Ɔlman go no bɔt di bad tin dɛn we i de du.
27 Di wan we de dig ol go fɔdɔm insay de,Ɛn ɛnibɔdi we de rol ston, di ston go kam bak pan am.
28 Pɔsin we de lay, et di wan dɛn we i de lay pan,Ɛn pɔsin we de tɔk tin dɛn fɔ mek ɔda pɔsin in ed big de kɔz trɔbul.
Futnot Dɛn
^ Ɔ i kin bi, “Na so swɛ we pɔsin nɔ fit fɔ gɛt nɔ go apin.”
^ Dat na, bɛlt ɔ sɔntin we dɛn de put na dɔnki ɔ ɔs dɛn ed fɔ kɔntrol dɛn.
^ Ɔ “So dat yu ɛn in nɔ go ikwal.”
^ Dis na sɔntin we dɛn de yuz fɔ sɛn ston.
^ Ɔ “we de wund ɔlman.”
^ Rid Baybul Wɔd dɛn Minin.
^ Ɔ i kin bi, “de put mɔt pan.”
^ Ɔ “lɛk tin dɛn we dɛn kin swɛla kwik kwik wan.”
