Neɔm 3:1-19
3 I go bad fɔ di siti we di wan dɛn we de insay de de kil pipul dɛn!
Tif tif ɛn lay lay biznɛs ful-ɔp insay de.
Ɔltɛm i gɛt pipul dɛn we i dɔn kech.
2 A yɛri di wip dɛn sawnd ɛn a yɛri di wil dɛn sawnd,Ɛn a si we di ɔs dɛn ɛn di chariɔt dɛn de rɔn.
3 A si man dɛn we sidɔm pantap ɔs,Sɔd dɛn we de shayn, ɛn spia dɛn we de glita,A si bɔku pipul dɛn we dɛn kil ɛn dedebɔdi dɛn we payl payl
—Di dedebɔdi dɛn bɔku te pɔsin nɔ de ebul fɔ kɔnt dɛn.
We dɛn de waka, dɛn de bɔk dɛn fut pan dedebɔdi dɛn.
4 Dis na bikɔs ɔf di rare layf we di raregal de liv,I fayn ɛn i izi fɔ lɛk, ɛn na mama pan juju biznɛs;I de yuz in rare layf fɔ sɛt trap fɔ neshɔn dɛn,
Ɛn i de yuz in juju biznɛs fɔ sɛt trap fɔ famili dɛn.
5 Jiova we gɛt bɔku bɔku sojaman dɛn tɔk se: “A de agens yu,*A go es yu skat kam ɔp yu fes;A go mek neshɔn dɛn si yu nekɛdnɛs,Ɛn a go mek kiŋdɔm dɛn si yu disgres wan.
6 A go trowe dɔti pan yu,Ɛn a go mek yu disgres;A go mek yu bi tin fɔ wach.
7 Ɛnibɔdi we si yu go rɔn ɛn tɔk se,‘Ninivɛ dɔn pwɛl!
Udat go sɔri fɔ am?’
Usay a go fɛn pipul dɛn we go kɔrej am?
8 Yu bɛtɛ pas No-emɔn,* we bin de nia di say dɛn we dɛn mek fɔ lɛ di Nayl wata pas?
Wata bin sɔrawnd am;In jɛntri na bin di si ɛn in wɔl na bin di si.
9 Itiopia ɛn Ijipt na dɛn bin de gi am trɛnk we nɔ de dɔn.
Pɔt ɛn di Libian dɛn na dɛn bin de ɛp yu.
10 Bɔt insɛf dɛn drɛb am na in land;Dɛn kapchɔ am.
Dɛn nyamanyama in pikin dɛn na ɔl di kɔna dɛn na di strit dɛn;
Dɛn balɔt fɔ ɔl in man dɛn we gɛt ɔnɔ,Ɛn dɛn dɔn tay ɔl in bigman dɛn wit chen.
11 Dɔn yusɛf go chak;Yu go ayd.
Yu go fɛn ples fɔ ayd pan yu ɛnimi dɛn.
12 Ɔl di tin dɛn we yu de yuz fɔ protɛkt yusɛf tan lɛk fig stik dɛn we jɔs bia dɛn fɔs frut;If dɛn shek dɛn, dɛn go fɔdɔm insay mɔt we go it dɛn.
13 Yu trup dɛn we de wit yu tan lɛk uman dɛn.
Di get dɛn na yu land go opin wayd wan fɔ yu ɛnimi dɛn.
Faya go bɔn yu get dɛn.
14 Drɔ wata fɔ di de we yu ɛnimi dɛn go sɔrawnd yu!
Mek di tin dɛn we yu de yuz fɔ protɛkt yusɛf strɔng mɔ ɛn mɔ.
Go fɛn kle dɔti, sok am, ɛn mas mas am;Dɔn mek blɔk.
15 Bɔt pan ɔl dat, faya go bɔn yu.
Dɛn go kil yu wit sɔd.
Dɛn go dɔnawe wit yu jɔs lɛk aw yɔŋ grasɔpa* dɛn kin dɔnawe wit plant dɛn.
Lɛ yu pipul dɛn bɔku lɛk yɔŋ grasɔpa dɛn!
Lɛ dɛn bɔku lɛk grasɔpa dɛn!
16 Yu dɔn gɛt bɔku biznɛsman dɛn we pas di sta dɛn we de na di skay.
Di yɔŋ grasɔpa de pul in kanda ɛn flay go.
17 Yu gaydman dɛn tan lɛk grasɔpa,Ɛn yu ɔfisa dɛn tan lɛk bɔku bɔku grasɔpa dɛn.
Dɛn de kamp na di ston wɔl dɛn di de we di ples kol,Bɔt we di san de shayn, dɛn de flay go;Ɛn nɔbɔdi nɔ no usay dɛn de.
18 E di kiŋ na Asiria, slip de na yu shɛpad dɛn yay;Yu bigman dɛn de na dɛn os dɛn.
Yu pipul dɛn skata na di mawntin dɛn,Ɛn nɔbɔdi nɔ de briŋ dɛn kam togɛda.
19 Yu nɔ go gɛt wan bloblo we yu trɔbul mit yu.
Yu wund nɔ de wɛl.
Ɔl di wan dɛn we yɛri di nyuz bɔt yu go klap;Udat de we nɔ dɔn sɔfa bikɔs ɔf di bad tin dɛn we yu de du ɔltɛm?”
