Nɛimaya 9:1-38
9 Di de we mek 24 insay di mɔnt we mek sɛvin, di Izrɛlayt dɛn bin gɛda. Dɛn bin de fast ɛn dɛn wɛr klos we pipul dɛn de wɛr we dɛn at pwɛl ɛn dɛn put dɔst pan dɛnsɛf.
2 Di wan dɛn we na tru tru Izrɛlayt dɛn bin sɛpret dɛnsɛf frɔm ɔl di fɔrina dɛn. Dɔn dɛn tinap ɛn kɔnfɛs dɛn yon sin dɛn, ɛn dɛn papa dɛn sin dɛn.
3 Afta dat, dɛn tinap usay dɛn de ɛn rid lawd wan fɔ tri awa di buk we gɛt di Lɔ we Jiova dɛn Gɔd gi dɛn. Dɔn fɔ ɔda tri awa, dɛn bin de kɔnfɛs dɛn sin dɛn ɛn butu bifo Jiova dɛn Gɔd.
4 Jɛshwa, Benay, Kadmiɛl, Shɛbanaya, Bɔnay, Shɛrɛbaya, Benay, ɛn Kɛnenay tinap na di platfɔm we dɛn mek fɔ di Livayt dɛn, ɛn dɛn ala lawd wan to Jiova dɛn Gɔd.
5 Jɛshwa, Kadmiɛl, Benay, Ashabnaya, Shɛrɛbaya, Odaya, Shɛbanaya, ɛn Pata-aya, we na Livayt dɛn tɔk se: “Una tinap ɛn prez Jiova una Gɔd sote go. E Gɔd, lɛ dɛn prez yu wɔndaful nem we pas ɔl blɛsin ɛn prez we pipul dɛn kin gi.
6 “Na yu nɔmɔ na Jiova. Na yu mek di ɛvin, dat na, ɛvin we de rayt rayt ɔp ɛn ɔl di ami we de de, di wɔl ɛn ɔl di tin dɛn we de insay de, di si ɛn ɔl di tin dɛn we de insay de. Yu mek dɛn ɔl kɔntinyu fɔ de alayv, ɛn di ami na ɛvin de butu bifo yu.
7 Yu na Jiova di tru Gɔd, we pik Ebram ɛn pul am kɔmɔt na Ɔ usay di Kaldian dɛn de ɛn gi am di nem Ebraam.
8 Yu bin si se i fetful* to yu, so yu mek agrimɛnt wit am fɔ gi in ɛn in pikin dɛn di land usay di Kenanayt dɛn, di Itayt dɛn, di Amɔrayt dɛn, di Pɛrizayt dɛn, di Jɛbyusayt dɛn, ɛn di Gagashayt dɛn de, ɛn yu kip yu prɔmis bikɔs yu de du wetin rayt.
9 “Yu si di we aw wi gret gret granpa dɛn bin de sɔfa na Ijipt, ɛn yu yɛri we dɛn kray na di Rɛd Si.
10 Dɔn yu pafɔm sayn ɛn mirekul dɛn fɔ pɔnish Fɛro, ɔl in savant dɛn, ɛn ɔl di pipul dɛn na in land bikɔs yu bin no se dɛn mek yu pipul dɛn sɔfa. Yu mek nem fɔ yusɛf we de te tide.
11 Yu sheb di si fɔ lɛ dɛn pas, so dat dɛn go waka na dray grɔn fɔ krɔs di si, ɛn yu trowe di wan dɛn we de rɔnafta dɛn insay di si lɛk ston we dɛn trowe insay wata we rɔf.
12 Yu yuz klawd we tan lɛk pila fɔ lid dɛn santɛm ɛn na nɛt, yu yuz faya we tan lɛk pila fɔ mek dɛn gɛt layt fɔ si usay dɛn de go.
13 Yu kam dɔŋ na Mawnt Saynay ɛn yu tɔk wit dɛn frɔm ɛvin ɛn gi dɛn jɔjmɛnt dɛn we kɔrɛkt, tru tru lɔ dɛn, ɛn kɔmandmɛnt dɛn.
14 Yu mek dɛn no bɔt yu oli Sabat ɛn yu yuz yu savant Mozis fɔ gi dɛn kɔmandmɛnt dɛn, prinsipul dɛn, ɛn lɔ.
15 We dɛn angri yu gi dɛn it* frɔm ɛvin, ɛn we dɛn tɔsti yu mek wata kɔmɔt frɔm rɔk, ɛn yu tɛl dɛn fɔ go ɛn tek di land we yu bin dɔn swɛ* se yu go gi dɛn.
16 “Bɔt dɛn, dat na, wi gret gret granpa dɛn, bin du sɔntin we dɛn nɔ gɛt rayt fɔ du ɛn dɛn bin trangayes,* ɛn dɛn nɔ bin de lisin to yu kɔmandmɛnt dɛn.
17 Dɛn nɔ gri fɔ lisin, ɛn dɛn nɔ mɛmba di pawaful tin dɛn we yu du fɔ dɛn bɔt dɛn bin trangayes* ɛn pik edman fɔ go bak na Ijipt fɔ bi slev. Bɔt yu na Gɔd we rɛdi fɔ fɔgiv, yu gɛt sɔri-at, ɛn yu de sho masi, yu nɔ de vɛks kwik ɛn yu rili gɛt lɔv we nɔ de chenj, ɛn yu nɔ bin pul an pan dɛn.
18 Pan ɔl we dɛn mek mɛtal imej we tan lɛk kaw pikin fɔ dɛnsɛf ɛn tɔk se: ‘Dis na una Gɔd we pul una kɔmɔt na Ijipt,’ ɛn dɛn du bad bad tin dɛn we sho se dɛn nɔ gɛt wan rɛspɛkt,
19 ivin da tɛm de, yu nɔ pul an pan dɛn na di wildanɛs* bikɔs ɔf yu pasmak sɔri-at. Di klawd we tan lɛk pila nɔ bin kɔmɔt oba dɛn santɛm fɔ lid dɛn, ɛn di faya we tan lɛk pila nɔ bin kɔmɔt oba dɛn na nɛt fɔ sho dɛn di say we dɛn fɔ go.
20 Ɛn yu gi dɛn yu spirit fɔ mek dɛn gɛt sɛns ɛn yu nɔ lɛf fɔ fid dɛn wit yu mana ɛn yu gi dɛn wata we dɛn bin tɔsti.
21 Yu fid dɛn fɔ 40 ia na di wildanɛs.* Dɛn bin gɛt ɔl wetin dɛn nid. Dɛn klos dɛn nɔ bin pwɛl ɛn dɛn fut dɛn nɔ bin swɛl.
22 “Yu gi dɛn kiŋdɔm dɛn ɛn pipul dɛn. Yu sheb sheb dɛn gi dɛn so dat dɛn gɛt Sayɔn we na di kiŋ na Ɛshbɔn in land, ɛn Ɔg we na di kiŋ na Beshan in land.
23 Dɔn yu mek dɛn pikin dɛn bɔku lɛk di sta dɛn na di skay. Yu briŋ dɛn na di land we yu bin dɔn prɔmis dɛn gret gret granpa dɛn se dɛn go go, ɛn i go bi dɛn yon.
24 So dɛn pikin dɛn go tek di land. Yu kɔnka di Kenanayt dɛn we bin de na di land, ɛn yu gi dɛn di kiŋ dɛn ɛn di pipul dɛn na di land fɔ mek dɛn du to dɛn wetin dɛn want.
25 Dɛn kapchɔ strɔng siti dɛn ɛn land we fayn fɔ plant ɛn dɛn tek os dɛn we ful-ɔp wit ɔlkayn gud tin dɛn, sistɛn* dɛn we dɛn bin dɔn ɔlrɛdi mek, vayn gadin dɛn, ɔliv tik dɛn, ɛn bɔku bɔku tik dɛn we gɛt frut dɛn. So dɛn it ɛn satisfay ɛn bɔmp; dɛn ɛnjɔy frɔm yu gudnɛs.
26 “Bɔt dɛn mek trangayes pan yu ɛn nɔ obe yu, ɛn dɛn tɔn dɛn bak pan yu Lɔ.* Dɛn kil yu prɔfɛt dɛn we yu sɛn fɔ wɔn dɛn fɔ mek dɛn kam bak to yu, ɛn dɛn du bad bad tin dɛn we sho se dɛn nɔ gɛt wan rɛspɛkt.
27 Bikɔs ɔf dis, yu gi dɛn to dɛn ɛnimi dɛn we bin kɔntinyu fɔ mek dɛn sɔfa. Bɔt dɛn kin kray to yu di tɛm we dɛn de sɔfa, ɛn yu kin yɛri na ɛvin, ɛn bikɔs ɔf yu pasmak sɔri-at, yu kin gi dɛn pɔsin fɔ sev dɛn frɔm dɛn ɛnimi dɛn.
28 “Bɔt as dɛn lɛf fɔ sɔfa so, dɛn kin bigin bak fɔ du wetin bad na yu yay, ɛn yu kin pul an pan dɛn ɛn lɛf dɛn na dɛn ɛnimi dɛn an, we kin sɔprɛs dɛn.* Dɔn dɛn kin kam bak to yu ɛn kray fɔ ɛp, ɛn yu kin yɛri frɔm ɛvin ɛn sev dɛn bɔku bɔku tɛm bikɔs ɔf yu gret masi.
29 Pan ɔl we yu bin de wɔn dɛn fɔ lɛ dɛn obe yu Lɔ bak, dɛn mek prawd ɛn nɔ gri fɔ lisin to yu kɔmandmɛnt dɛn. Dɛn sin bay we dɛn nɔ fala yu prinsipul dɛn we go mek pɔsin liv. Bɔt dɛn mek trangayes ɛn tɔn dɛn bak pan yu ɛn stif dɛn nɛk, ɛn nɔ gri fɔ lisin to yu.
30 Bɔt yu kɔntinyu fɔ peshɛnt wit dɛn fɔ lɔng tɛm ɛn put yu spirit pan yu prɔfɛt dɛn fɔ wɔn dɛn, bɔt dɛn nɔ gri lisin. Faynali, yu gi dɛn to di pipul dɛn na di land.
31 Ɛn bikɔs ɔf yu pasmak sɔri-at, yu nɔ dɔnawe wit dɛn ɔ pul an pan dɛn, bikɔs yu na Gɔd we gud ɛn yu gɛt sɔri-at.
32 “So naw, E wi Gɔd, di Gɔd we gret, pawaful, we fit fɔ lɛ pipul dɛn fred ɛn rɛspɛkt, we de kip in agrimɛnt, ɛn we de sho lɔv we nɔ de chenj, duya nɔ ovaluk ɔl di sɔfa we wi, wi kiŋ dɛn, wi prins dɛn, wi prist dɛn, wi prɔfɛt dɛn, wi gret gret granpa dɛn, ɛn ɔl yu pipul dɛn dɔn sɔfa, frɔm di kiŋ dɛn na Asiria dɛn tɛm te to dis wi yon tɛm.
33 Yu dɔn du wetin rayt pan ɔl di bad tin dɛn we dɔn mit wi. Yu fetful bɔt na wi na di wan dɛn we dɔn du wikɛd tin dɛn.
34 Dɔn wi kiŋ dɛn, wi prins dɛn, wi prist dɛn, ɛn wi gret gret granpa dɛn, nɔ obe yu Lɔ ɛn dɛn nɔ pe atɛnshɔn to yu kɔmandmɛnt dɛn ɛn to di wɔnin dɛn we yu gi dɛn.
35 Dɛn bin de na dɛn kiŋdɔm de ɛnjɔy di bɔku gud tin dɛn we yu gi dɛn, ɛn yu gi dɛn land we big ɛn fayn fɔ plant. Pan ɔl dat, dɛn nɔ sav yu ɛn dɛn nɔ lɛf fɔ du bad tin dɛn.
36 Naw wi na slev dɛn; slev dɛn na di land we yu gi to wi gret gret granpa dɛn fɔ it di tin dɛn we i de bia ɛn di gud tin dɛn we de de.
37 Di bɔku tin dɛn we i de bia, de fɔ di kiŋ dɛn we yu dɔn put oba wi* bikɔs ɔf wi sin dɛn. Dɛn de rul oba wi ɛn wi animal dɛn lɛk aw dɛn want, ɛn wi at rili pwɛl.
38 “So bikɔs ɔf ɔl dɛn tin ya, wi de mek siriɔs agrimɛnt ɛn rayt am, ɛn wi prins dɛn, wi Livayt dɛn, ɛn wi prist dɛn go stamp am fɔ sho se wi gri.”
Futnot Dɛn
^ Insay Ibru, “in at fetful.”
^ Insay Ibru, “bred.”
^ Insay Ibru, “es yu an ɔp.”
^ Insay Ibru, “dɛn bin stif dɛn nɛk.”
^ Insay Ibru, “dɛn bin stif dɛn nɛk.”
^ I kin min ples we wanwan pipul dɛn ɔ plant de. Rid Baybul Wɔd dɛn Minin.
^ Rid Baybul Wɔd dɛn Minin.
^ I min “say we dɛn bil ɔnda grɔn fɔ kip wata.”
^ Insay Ibru, “dɛn put yu Lɔ biɛn dɛn bak.”
^ Ɔ “nyamanyama dɛn.”
^ Insay Ibru, “wi bɔdi dɛn.”
