Daniɛl 10:1-21
10 Insay di tɔd ia we Kiŋ Sayrɔs na Pashia de rul, Gɔd gi wan mɛsej to Daniɛl we dɛn de kɔl Bɛltishaza; di mɛsej na tru, ɛn di mɛsej gɛt fɔ du wit wan big big fɛt. I ɔndastand di mɛsej ɛn dɛn mek i ɔndastand wetin i dɔn si.
2 Dɛn tɛm dɛn de mi, Daniɛl, mi at bin pwɛl fɔ tri wiks.
3 A nɔ it ɛni rich fud, a nɔ put bif ɔ wayn na mi mɔt, ɛn a nɔ rɔb ɔyl pan misɛf fɔ tri wiks.
4 Di de we mek 24 insay di fɔs mɔnt, we a bin de nia di gret riva we nem Taygris,*
5 a luk ɔp ɛn a si wan man we wɛr linin klos, ɛn na in midul i bin tay wan bɛlt we dɛn mek wit gold we kɔmɔt Yufaz.
6 In bɔdi bin tan lɛk krisolayt, in fes bin tan lɛk laytin, in yay dɛn bin tan lɛk tik dɛn we gɛt faya pan dɛn,* in an dɛn ɛn fut dɛn bin tan lɛk kɔpa we de shayn, ɛn in vɔys bin tan lɛk we bɔku pipul dɛn de tɔk.
7 Na mi, Daniɛl, nɔmɔ si di vishɔn; di man dɛn we bin de wit mi nɔ si di vishɔn. Bɔt dɛn bin de trimbul bad bad wan, ɛn dɛn rɔnawe ɛn ayd.
8 Dɔn na mi wangren lɛf, ɛn we a si dis gret vishɔn, a nɔ bin gɛt pawa igen ɛn mi fes rili pel ɛn a nɔ bin gɛt trɛnk igen.
9 Dɔn a yɛri in vɔys we i de tɔk; bɔt we a yɛri we i de tɔk, dip dip slip kam pan mi ɛn mi fes bin de na grɔn.
10 Bɔt wan an tɔch mi, ɛn i mek a bigin fɔ grap, bɔt mi an dɛn ɛn mi ni dɛn bin stil de na grɔn.
11 Dɔn i tɛl mi se:
“E Daniɛl, yu na man we rili gɛt valyu, pe atɛnshɔn to wetin a de kam tɛl yu. Tinap usay yu bin de, bikɔs dɛn dɔn sɛn mi to yu.”
We i tɛl mi dɛn tin ya, a tinap, bɔt a bin de trimbul.
12 Dɔn i tɛl mi se: “E Daniɛl, nɔ fred, Gɔd dɔn yɛri di tin dɛn we yu tɔk frɔm di fɔs de we yu mek-ɔp yu maynd fɔ ɔndastand ɛn fɔ put yusɛf dɔŋ bifo yu Gɔd, ɛn a dɔn kam bikɔs ɔf di tin dɛn we yu tɔk.
13 Bɔt di prins na di Pashian kiŋdɔm bin de agens mi fɔ 21 dez. Bɔt Maykɛl,* we na wan pan di men prins dɛn,* kam ɛp mi; ɛn a bin lɛf de wit di kiŋ dɛn na Pashia.
14 A dɔn kam fɔ mek yu ɔndastand wetin go apin to yu pipul dɛn insay di las dez, bikɔs di vishɔn na fɔ tumara bambay.”
15 We i tɛl mi dɛn wɔd ya, a butu mi fes na grɔn ɛn a nɔ bin ebul fɔ tɔk natin.
16 Dɔn pɔsin we tan lɛk mɔtalman tɔch mi lip dɛn, ɛn a opin mi mɔt ɛn tɛl di wan we tinap bifo mi se: “Mi masta, a de trimbul bikɔs ɔf di vishɔn, ɛn a nɔ gɛt ɛni trɛnk igen.
17 So aw mi, we na mi masta in savant, go tɔk to mi masta? Bikɔs naw a nɔ gɛt ɛni trɛnk igen, ɛn a nɔ ebul blo bɛtɛ.”
18 Di pɔsin we tan lɛk mɔtalman tɔch mi igen ɛn gi mi trɛnk.
19 Dɔn i tɔk se: “E man we rili gɛt valyu, nɔ fred. Mek yu gɛt pis. Tek kɔrej, na fɔ gɛt maynd.” As i de tɔk to mi, nain a gɛt trɛnk ɛn a tɔk se: “Lɛ mi masta tɔk bikɔs yu dɔn mek a gɛt trɛnk.”
20 Dɔn i aks mi se: “Yu no wetin mek a kam to yu? Naw a de go bak fɔ go fɛt di prins na Pashia. We a go, di prins na Gris go kam.
21 Bɔt a go tɛl yu di tin dɛn we rayt insay di buk we dɛn de rayt tru tin dɛn. No ɔda pɔsin nɔ de we de rili sɔpɔt mi pan dɛn tin ya pas Maykɛl we na una prins.
Futnot Dɛn
^ Insay Ibru, “Idikɛl.”
^ Dat na, tik dɛn we dɛn kin yuz as layt.
^ I min “Udat Tan Lɛk Gɔd?”
^ Ɔ “wan prins we de na di fɔs rank.”
