2 Tɛsalonians 1:1-12
1 Mi, Pɔl, a de wit Silvanɔs* ɛn Timoti. A de rayt to di kɔngrigeshɔn na Tɛsalonayka we gɛt wanwɔd wit Gɔd, we na wi Papa, ɛn wit Masta Jizɔs Krays:
2 Lɛ Gɔd, we na di Papa, ɛn Masta Jizɔs Krays gi una pis ɛn mek dɛn spɛshal gudnɛs* de pan una.
3 Wi brɔda dɛn, wi nid fɔ de tɛl Gɔd tɛnki ɔltɛm fɔ una. Wi fɔ du dat, bikɔs una fet de strɔng mɔ ɛn mɔ, ɛn una ɔl de lɛk una kɔmpin dɛn mɔ ɛn mɔ.
4 Na dat mek wi kin gladi fɔ tɔk bɔt una na Gɔd in kɔngrigeshɔn dɛn bikɔs ɔf di bia we una de bia ɛn di fet we una gɛt pan ɔl we una de sɔfa* we tin tranga fɔ una* ɛn we dɛn de mek una sɔfa.
5 Dis de sho se Gɔd de jɔj di rayt we, ɛn bikɔs ɔf dis Gɔd dɔn si am se una fit fɔ de na in Kiŋdɔm, we una de rili sɔfa fɔ.
6 Fɔ tru, na di rayt tin Gɔd go du we i go mek di wan dɛn we de mek una sɔfa, dɛnsɛf sɔfa.
7 Bɔt una we de sɔfa go gɛt kolat wit wi di tɛm we Masta Jizɔs go sho insɛf to pipul dɛn, we i go kɔmɔt na ɛvin wit in pawaful enjɛl dɛn.
8 I go kam insay faya we de kech fɔ kam pɔnish di wan dɛn we nɔ no Gɔd ɛn di wan dɛn we nɔ de obe di gud nyuz bɔt wi Masta Jizɔs.
9 Di Masta go jɔj dɛn sem wan ya. I go pɔnish dɛn bay we i go dɔnawe wit dɛn kpatakpata, ɛn dɛn nɔ go de bifo am igen, ɛn i nɔ go yuz in pawa fɔ ɛp dɛn igen.
10 Dis go apin di tɛm we di Masta go kam fɔ gɛt glori wit in oli wan dɛn ɛn fɔ mek ɔl di wan dɛn we de sho se dɛn gɛt fet kɔle pan am da de de, bikɔs una gɛt fet pan di tin dɛn we wi tɛl una.
11 So na dat mek wi de pre fɔ una ɔltɛm, fɔ lɛ wi Gɔd go si am se una fit fɔ lɛ i kɔl una ɛn fɔ lɛ i yuz in pawa fɔ du ɔl di gud tin dɛn we fayn na in yay ɛn fɔ lɛ i dɔn ɔl wetin una fet dɔn mek una de du.
12 Dis na fɔ lɛ una mek Masta Jizɔs in nem gɛt glori ɛn lɛ una gɛt wanwɔd wit am, akɔdin to wi Gɔd ɛn akɔdin to Masta Jizɔs Krays dɛn spɛshal gudnɛs.*
Futnot Dɛn
^ In ɔda nem na Saylas.
^ Rid Baybul Wɔd dɛn Minin.
^ Ɔ “bia.”
^ Ɔ “una gɛt prɔblɛm dɛn.”
^ Rid Baybul Wɔd dɛn Minin.
