1 Timoti 2:1-15
2 Fɔs, a de beg ɔlman fɔ de pre fɔ ɔda pipul dɛn, fɔ de rili beg Gɔd, fɔ de pre, ɛn tɛl Gɔd tɛnki fɔ ɔlkayn pipul dɛn,
2 fɔ kiŋ dɛn ɛn ɔl di wan dɛn we gɛt ay pozishɔn,* so dat wi go kɔntinyu fɔ siriɔs, gɛt kolat, liv kwayɛt layf, ɛn rili fetful to Gɔd.
3 Dis na sɔntin we fayn na wi Seviɔ, we na Gɔd, in yay ɛn na sɔntin we i gri wit.
4 I want mek ɔlkayn pipul dɛn sev ɛn no di kɔrɛkt tin bɔt di trut.
5 Na wan Gɔd de, ɛn na wan midulman de bitwin Gɔd ɛn mɔtalman, dat na di man, Krays Jizɔs,
6 we gi insɛf ɛn pe di ɛgzakt prayz fɔ fri ɔlman*—na dis dɛn go tɔk bɔt we di rayt tɛm rich.
7 Na dis mek Gɔd pik mi fɔ prich ɛn bi apɔsul—na tru a de tɔk, nɔto lay a de lay—fɔ tich pipul dɛn na ɔda neshɔn dɛn bɔt fet ɛn di tru tin.
8 So a want mek di man dɛn kɔntinyu fɔ pre ɛnisay, lɛ dɛn de es dɛn an dɛn we oli ɔp, lɛ dɛn nɔ de vɛks ɛn agyu.
9 Semweso, di uman dɛn fɔ mek dɛnsɛf fayn bay we dɛn drɛs di rayt we,* bay we dɛn nɔ de du tin pasmak wan ɛn bay we dɛn du tin wit sɛns; nɔto bay di kayn ia stayl we dɛn de mek ɛn wit gold ɔ pal ɔ wit klos dɛn we dia pasmak,
10 bɔt dɛn fɔ du am di we we uman dɛn we de tɔk se dɛn de wɔship Gɔd wit ɔl dɛn at fɔ du am, dat na, bay we dɛn de du gud tin dɛn.
11 Lɛ di uman dɛn nɔ tɔk* we dɛn de lan, ɛn dɛn fɔ rili put dɛnsɛf dɔŋ.
12 A nɔ gi uman rayt fɔ tich ɔ fɔ de oba man; i nɔ fɔ tɔk.*
13 Na Adam fɔs Gɔd mek, dɔn i mek Iv.
14 Ɛn dɛn nɔ bin ful Adam, bɔt dɛn bin rili ful di uman ɛn i sin.
15 Bɔt i go sef we i de bɔn pikin, dat na if i* kɔntinyu fɔ gɛt fet, lɔv, i oli, ɛn du tin wit sɛns.
Futnot Dɛn
^ Ɔ “di wan dɛn we gɛt pawa.”
^ Ɔ “ɔlkayn pipul dɛn.”
^ Ɔ “di we we de sho se dɛn gɛt rɛspɛkt.”
^ Ɔ “kwayɛt.”
^ Ɔ “i fɔ kwayɛt.”
^ Insay Grik, “dɛn.”
