1 Pita 5:1-14
5 So, as una kɔmpin ɛlda we dɔn si di sɔfa we Krays sɔfa ɛn we go gɛt pan di glori we Gɔd go sho, a de gi dis advays to di ɛlda dɛn we de wit una:
2 Una mɛn Gɔd in ship dɛn we i lɛf gi una, una du una ovasia wok,* una nɔ du am lɛk dɛn de fos una, bɔt una du am wit ɔl una at bifo Gɔd; una nɔ du am bikɔs una want fɔ bɛnifit unasɛf nɔmɔ, bɔt una fɔ rɛdi fɔ du am;
3 una nɔ fɔ mek lɛk se una na masta fɔ di wan dɛn we na Gɔd in prɔpati, bɔt una bi ɛgzampul to di ship dɛn.
4 Ɛn we di chif shɛpad apia, una go gɛt di krawn we gɛt glori ɛn we nɔ de fed.
5 Semweso, una di yɔŋman dɛn fɔ put unasɛf ɔnda di man dɛn we dɔn ol.* Bɔt una ɔl fɔ put unasɛf dɔŋ to una kɔmpin dɛn bikɔs Gɔd de agens di wan dɛn we prawd, bɔt i de gi in spɛshal gudnɛs* to di wan dɛn we ɔmbul.
6 So una put unasɛf ɔnda Gɔd in pawaful an, so dat i go es una ɔp we di rayt tɛm rich,
7 as una de put ɔl wetin de wɔri una na in an, bikɔs i bisin bɔt una.
8 Una kɔntinyu fɔ de tink di rayt we, una go de wach! Una ɛnimi, di Dɛbul, de waka ɔp ɛn dɔŋ lɛk layɔn we de ala, de fɛn pɔsin fɔ swɛla.
9 Bɔt una fɔ de agens am ɛn una fɔ gɛt strɔng fet, bikɔs una no se di sem kayn tin dɛn we de mek una de sɔfa na dɛn bak de mek una brɔda dɛn ɔlsay na di wɔl de sɔfa.
10 Bɔt afta una dɔn sɔfa fɔ shɔt tɛm, di Gɔd we de gi ɔlkayn spɛshal gudnɛs* ɛn we kɔl una fɔ gɛt in glori we go de sote go bikɔs una gɛt wanwɔd wit Krays, insɛf sɛf go dɔn fɔ tren una. I go mek una tinap tranga wan, i go mek una strɔng, i go gi una strɔng fawndeshɔn.
11 Lɛ i gɛt di pawa sote go. Emɛn.
12 A yuz Silvanɔs,* we a tek as brɔda we fetful, fɔ rayt to una dis shɔt lɛta fɔ ɛnkɔrej una ɛn mek una no klia wan se dis na Gɔd in spɛshal gudnɛs* fɔ tru. Una ol am wit tu an.
13 Di uman we de na Babilɔn, we Gɔd pik lɛk una, de grit una, ɛn Mak sɛf, mi bɔypikin, de grit una.
14 Una grit una kɔmpin dɛn wit kis fɔ sho se una lɛk dɛn.
Mek una ɔl we gɛt wanwɔd wit Krays gɛt pis.
Futnot Dɛn
^ Ɔ “tek tɛm kia fɔ dɛn.”
^ Ɔ “di ɛlda dɛn.”
^ Rid Baybul Wɔd dɛn Minin.
^ Rid Baybul Wɔd dɛn Minin.
^ In ɔda nem na Saylas.
^ Rid Baybul Wɔd dɛn Minin.
