1 Kɔrintians 16:1-24
16 Naw we i kam pan di kɔlɛkshɔn fɔ di oli wan dɛn, una kin du wetin a tɛl di kɔngrigeshɔn dɛn na Galeshya.
2 Di fɔs de insay ɛni wik, ɔlman fɔ put sɔntin na kɔna akɔdin to wetin i gɛt, so dat una nɔ go gɛda kɔlɛkshɔn we a kam.
3 Bɔt we a rich de, a go sɛn di man dɛn we una bin dɔn pik na una lɛta fɔ kɛr una gift dɛn go na Jerusɛlɛm.
4 Bɔt if nid de fɔ mek misɛf go de, a go go de wit dɛn.
5 Bɔt a go kam to una we a pas na Masidonia, bikɔs a plan fɔ pas de;
6 ɛn sɔntɛm a go de wit una fɔ sɔm tɛm ɔ ivin te di kol sizin dɔn, so dat una go go lɛf mi smɔl usay a de go.
7 A nɔ jɔs want fɔ si una we a de pas, bikɔs a want fɔ spɛn sɔm tɛm wit una, if Jiova* alaw dat.
8 Bɔt a go lɛf na Ɛfisɔs te di Pɛntikɔst Fɛstival,
9 bikɔs wan big domɔt dɔn opin bifo mi we go mek a ebul du bɔku tin, bɔt bɔku pipul dɛn de agens mi.
10 If Timoti kam, una mek shɔ se natin nɔ fɔ mek i fred we i de wit una, bikɔs na Jiova* in wok i de du, jɔs lɛk mi.
11 So lɛ nɔbɔdi nɔ tɛkɛ am. Una mek i kam bak sef wan to mi, bikɔs mi ɛn di brɔda dɛn de wet fɔ am.
12 As fɔ wi brɔda Apɔlɔs, a rili beg am fɔ kam to una wit di brɔda dɛn. I nɔ bin plan fɔ kam naw, bɔt i go kam we i gɛt chans.
13 Una nɔ slip, una kɔntinyu fɔ gɛt strɔng fet, una go de du tin lɛk man,* ɛn una fɔ pawaful.
14 Una du ɔltin wit lɔv.
15 Naw a de beg una, mi brɔda dɛn: Una no se di pipul dɛn na Stɛfanas in os na di fɔs disaypul dɛn na Akeya, jɔs lɛk di fɔs tin we dɛn avɛst, ɛn dɛn de yuz ɔl dɛn tɛm fɔ wok fɔ di oli wan dɛn.
16 Una go de put unasɛf ɔnda dɛn kayn pipul dɛn de ɛn ɔl di wan dɛn we de jɔyn an ɛn wok tranga wan.
17 Bɔt a gladi fɔ si Stɛfanas, Fɔtyunetɔs, ɛn Akeikɔs bikɔs na dɛn dɔn tek una ples we una nɔ de ya.
18 Dɛn dɔn mek mi ɛn una fil fayn. So una rɛspɛkt dɛn kayn man dɛn de.
19 Di kɔngrigeshɔn dɛn na Eshia de grit una. Akwila ɛn Priska wit di kɔngrigeshɔn we de na dɛn os, we una ɔl de fala di Masta, de grit una wit ɔl dɛn at.
20 Ɔl di brɔda dɛn de grit una. Una grit una kɔmpin dɛn wit oli kis.
21 Mi, Pɔl, de rayt mi yon gritin wit mi yon an.
22 If ɛnibɔdi nɔ lɛk di Masta, lɛ swɛ de pan am. E wi Masta, kam!
23 Lɛ di Masta Jizɔs in spɛshal gudnɛs* de pan una.
24 A lɛk una ɔl we gɛt wanwɔd wit Krays Jizɔs.
Futnot Dɛn
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Ɔ “gɛt maynd.”
^ Rid Baybul Wɔd dɛn Minin.
