Mwet nuhkewa luhngse in oasr kawuck suc pwacye ac suwohs. Jeova el luhngse pac mwet kawuck lal in pwacye ac suwohs. Tuhsruhktuh, upac in ahkkahlwemye ohiyen pwacye ac suwohs inmahsrlon mwet pucspucs suc tiac pwacye. Ma wo fuhkah tuhkuh ke kuht pwacye ac suwohs in ma nuhkewa?

1. Meac srihpac yohk emeet lasr pwacnacng kuht luhngse in pwacye ac suwohs?

Ke kuht pwacye nuh sin mwet sahyac uh, kuht ahkkahlwemye nuh sin Jeova lah kuht luhngse el ac suhnakuhnuhl. Nuhnkuh ma inge: Jeova el etuh ma nuhkewa ma kuht nuhnkuh ac oruh uh. (Hebrew 4:13) El liye ke kuht kwacfeacng in pwacye ac suwohs, ac el engan in liye ma inge. Kahs lal uh fahk: “Leum God El sruhnga mwet orekma koluk, a El insracelak nuh sin mwet suwohswohs.”​—Soakas 3:32.

2. Meac kuhtuh inkacnek tuh kuht in pwacye ac suwohs ke moul lasr lwen nuhkewa?

Jeova el luhngse kuht in “kahskahs in pwacye nuh sin sie sin sie.” (Zechariah 8:16, 17) Meac kalmen ma inge? Kuht tiac kahskahs kikiacp kuh fahk ma suhtuhuh ke kuht sramsram nuh sin sucu lasr, mwet suc wi kuht orekma, mwet lili wiyacsr, kuh nuh sin mwet kol ke government. Mwet pwacye ac suwohs uh tiac pihsrapasr kuh orek kuhtasrihk. (Riti Soakas 24:28 ac Ephesus 4:28.) Ac elos moli tax ma elos enenuh in moli. (Rome 13:5-7) Ke ohiyac inge ac ke kuhtuh pac ohiyac sahyac, kuht “kena tuh orekma lasr in suwohs pacl nuhkewa.”​—Hebrew 13:18.

3. Meac ma wo ma tuhkuh ke ohiyen pwacye ac suwohs?

Kuht fin etweyuck oacna mwet pwacye ac suwohs, mwet sahyac uh elos ac luhlahlfongi kuht. Kuht ac kahsruh in oasr inse mislac yurin mwet lili ke congregation, oacna sie sucu. Kuht engankihn sie nuhnak ac puhlakihn wo. Ohiyen pwacye lasr uh kuh pac in “nahwelah mwe luti ke God, Mwet Lango lasr,” ac oruh tuh mwet sahyac suc tiac wi ke congregation uh in luhngse etuh Jeova.​—Titus 2:10.

 AHKYOHKYE LUTLUT LOM

5. Pwacye ac suwohs in pacl nuhkewa

 6. Oasr ma wo ma ohiyen pwacye ac suwohs kuh in oruh nuh sesr

Kom kuh in sun kuhtuh ma upac kom fin pwacye ac suwohs. Tuhsruhktuh tukun kuhtuh pacl uh, kom ac sang kuloh mweyen kom sruokyac pwacye ac suwohs lom. Riti Psalm 34:12-16, ac tohkohyang sramsramkihn kihsen siyuck se inge:

• Meac ohiyen pwacye ac suwohs kuh in oruh nuhke moul lom?

1. Siacnyacn suc pwacye ac suwohs nuh sin sie sin sie kuh in ahkkweye moul in pahyuck lalos

2. Mwet suc la orekma uh luhlahlfongi mwet orekma suc pwacye ac suwohs

3. Mwet pwacye ac suwohs ac fah ohi ye muhtuhn mwet kol ke government

 MA KUHT LOTWELAH

Jeova el luhngse mwet kawuck lal in pwacye ac suwohs in ma nuhkewa elos fahk ac oruh.

Kalweni

• Meac kuhtuh inkacnek kuht kuh in ahkkahlwemye muh kuht pwacye ac suwohs?

• Efuh kuh tiac wo in nuhnkuh muh kuht kuh in okanlah ma pwacye?

• Efuh kom luhngse in pwacye ac suwohs in pacl nuhkewa?