MWE LUTLUT 17
Jesus El Kain In Mwet Fuhkah Se?
Ke kuht lotwelah ma Jesus el fahk ac oruh ke pacl el oasr fin facluh, kuht kuh in liye ohiyac wo pucspucs lal. Ke srihpac se inge, ma inge ahkfototoye kuht nuh sel, ac oacyacpac nuh sin Pahpah tuhmwacl, Jeova. Meac kuhtuh sin ohiyac wowo inge? Ac kuht ac etahi Jesus fuhkah ke moul lasr sifacna?
1. Ke inkacnek pucspucs fuhkah Jesus el oacna Pahpah tuhmwacl?
Jesus ac Pahpah tuhmwacl elos tuhkweni nuh sie inkuhsrao ke lusen billion yac. Pwacnacng, el lotwelah ac etahi na pwacye Jeova. Pwacye lah nuhnak lalos, puhla lalos ac orekma lalos oacna sie. (Riti John 5:19.) Ke srihpen Jesus el etahi na pwacye ohiyac wowo luhn Pahpah tuhmwacl, pwacnacng el fahk: “Kuhtwena mwet suc liyeyuc tari el liyacl pac Pahpah.” (John 14:9) Ke kom lutlutkihn ohiyac wowo lal Jesus, kom ac fah etwacllah na pwacye Jeova. Ke sie mwe puhpuhlyuck, ohiyen pahkotwen lal Jesus nuh sin mwet uh ahkkahlwemye nuhnak luhn Jeova keim.
2. Jesus el ahkkahlwemye fuhkah lah el luhngse Jeova?
Jesus el fahk: “Tuhsruhktuh facluh enenuh in etuh lah nga luhngse Pahpah, pa pwacnacng nga oruh ma nuhkewa El sapkihn ngan oruh.” (John 14:31) Ke pacl se ma Jesus el muhta fin facluh, el ahkkahlwemye luhngse yohk lal nuh sin Pahpah tuhmwacl ke el ahksol finne ke pacl upac. Oacyacpac, Jesus el luhngse na pwacye in sramsram nuh sin mwet ke Pahpah tuhmwacl ac in kahsruh mwet sahyac in ahkkweye sie fototo wo nuh Sel.—John 14:23.
3. Jesus el ahkkahlwemye fuhkah lah el luhngse mwet uh?
Bible uh fahk lah Jesus el arlac luhngse “mwet suc muhta fin facluh.” (Soakas 8:31) El ahkkahlwemye kain in luhngse inge ke el ahkkweye ac eisaclosyang sifacna in kahsruh mwet uh. Mwenmwen ma el oraclah uh ahkkahlwemye kuh lal, oacyacpac pahkotwen lal. (Mark 1:40-42) El ahkkahlwemye kuhlwacng ac tiac srisri mwet. Kahs lal sang mwe ahkkweye ac finsrak nuh sin mwet inse pwacye suc lohngohl. Jesus el inse muhlahlah in sun mwe kweok ac misac, ke srihpen luhngse lal nuh sin mwet nuhkewa. Tuhsruhktuh, el luhngse yohk mwet nuhkewa suc ahkos mwe luti lal uh.—Riti John 15:13, 14.
AHKYOHKYE LUTLUT LOM
Ahkyohkye etwacack ke ohiyac lal Jesus. Lotwelah pac lah fuhkah in etahi luhngse ac kuhlwacng lal.
4. Jesus el luhngse Pahpah tuhmwacl
Mwe srihkasrak lal Jesus luti nuh sesr lah fuhkah kuht kuh in ahkkahlwemye luhngse lasr nuh sin God. Riti Luke 6:12 ac John 15:10; 17:26. Tukun ritiyuck kais sie ma suhmuhslah, sramsramkihn kihsen siyuck se inge:
-
Jesus el ahkkahlwemye fuhkah lah el luhngse Jeova, ac kuht ac etahel fuhkah?
Jesus el luhngse Pahpah tuhmwacl inkuhsrao ac el sramsram nuh sel pacl nuhkewa ke puhruhe
5. Jesus el nuhnkuh ke mwet suc oasr enenuh la
Jesus el suk meet mwe enenuh luhn mwet sahyac liki mwe enenuh lal sifacna. Jesus el orekmakihn pacl ac kuh lal in kahsruh mwet uh, finne el tohtohlah. Riti Mark 6:30-44, ac tohkohyang sramsramkihn kihsen siyuck inge:
-
Ke fuhs inge, meac kuhtuh inkacnek ma Jesus el ahkkahlwemye lah el nuhnkuh ke mwet sahyac uh?—Liye fuhs 31, 34, 41, ac 42.
-
Efuh Jesus el kahsruh mwet uh?—Liye fuhs 34.
-
Ke srihpen Jesus el etahi ohiyac wo luhn Jeova, meac ma inge luti nuh sum kacl Jeova?
-
Meac kuhtuh inkacnek kuht kuh in etahel Jesus in nuhnkuh yohk ke mwet sahyac uh?
6. Jesus el insewowo in sang
Finne tiac puhkantwen mani ac ma oasr yohrohl Jesus, el insewowo in sang nuh sin mwet sahyac. El fahk pac nuh sesr in insewowo in sang. Riti Orekma 20:35, ac tohkohyang sramsramkihn kihsen siyuck se inge:
-
In fal nuhke ma Jesus el fahk, kuht kuh in insewowo fuhkah?
Liye VIDEO se, ac tohkohyang sramsramkihn kihsen siyuck se inge.
-
Meac kuhtuh inkacnek ma kuht kuh in ahkkahlwemye orekma kuhlwacng, finne tiac puhkantwen mani ac ma oasr yohrohsr?
Yac kom etuh?
Bible uh luti kuht in puhruhe nuh sin Jeova ke inen Jesus. (Riti John 16:23, 24.) Ke kuht puhruhe ke inkacnek ohinge, kuht ahkkahlwemye lah kuht sruhi ma Jesus el oruh in kahsre kuht in eklac kawuck luhn Jeova.
KUHTUH MWET UH FAHK: “Mwe kweok mwet uh sun ma pakiyucki sin God.”
-
Ke srihpen Jesus el ahkkahlwemye ohiyac wo luhn Pahpah tuhmwacl, ma el oruh uh ahkpwacyeye fuhkah lah Jeova el tiac oruh kuht in kweok?
MA KUHT LOTWELAH
Jesus el luhngse Jeova, ac el luhngse pac mwet uh. Ke srihpen Jesus el oacna Pahpah tuhmwacl, pwacnacng ke kuht etwacllah Jesus, kuht ac kuh in etwacllah pac Jeova yohk liki na meet ah.
Kalweni
-
Kuht ac ahkkahlwemye fuhkah luhngse lasr nuh sin Jeova, oacna ma Jesus el oruh?
-
Kuht ac ahkkahlwemye fuhkah luhngse lasr nuh sin mwet uh, oacna ma Jesus el oruh?
-
Ohiyac fuhkah lal Jesus kom luhngse yohk?
LIYE PAC MA INGE
Lutlutkihn kuhtuh sin ohiyac lal Jesus ma kuht kuh in etahi.
“To Imitate Jesus, Be . . .” (Jesus—The Way, the Truth, the Life, page 317)
Lotwelah lah efuh kuht in puhruhe ke inen Jesus.
“Why Pray in Jesus’ Name?” (The Watchtower, February 1, 2008)
Yac Bible uh fahk kuhtwena ma ke luhmahl Jesus ac atacl?
Meac kuht kuh in lotwelah ke ohiyac ma Jesus el ahkkahlwemye nuh sin muhtwacn uh?
“Respect and Dignity Under God’s Care” (The Watchtower, September 1, 2012)
