Moses el muhta fin acn Midian ke lusen yac 40. El pahyuckyak ac oasr tuhlihk nahtuhl uh. Sie lwen ah ke el karihngihn sheep nahtuhl uh sisken finohl Sinai, el liyacack sie ma na usrnguck. Sahk soko fihrihr, tuhsruhktuh tiac na fihrihrlac! Ke pacl se ma Moses el kihluckyang in liye lah efuh, el lohngack sie puhsra ma tuhkuh kac me ac fahk: ‘Moses! Nikmet tuhkuh fototo. Eislah fahluhk lom an mweyen kom tu fin fohk muhtahl.’ Jeova pa sramsram ke inkacnek luhn lipufacn sac.

Moses el sahngweng, pwacnacng el afihnyac muhtahl. Puhsra sac fahk: ‘Nga liye luhpan kweok luhn mwet Israel. Nga ac fah molweltahllah liki mwet Egypt ac usacltahllah nuhke sie acn wo. Kom pa ac fah kol mwet luhk inge liki acn Egypt.’ Pwacye lah Moses el lut ke ma inge!

Moses el siyuck: ‘Meac nga ac fahk fin mwet inge siyuck sihk lah suc suhpweyuc uh?’ God el tohpohkuhl fahk: ‘Fahk nuh seltahl lah Jeova, God lal Abraham, God lal Isaac, God lal Jacob pa suhpwekom uh.’ Na Moses el fahk: ‘Ac fin mwet inge tiac lohngyuc?’ Jeova el sang mwe ahkpwacyeye se nuh sel Moses lah El ac kahsrel. El fahk nuh sel Moses elan sisyac sikacl soko lal ah nuh infohk uh. Na sikacl soko ah eklac wet soko! Ke Moses el sruokyac puhluhn wet soko inge, sifwilpac na eklac sikacl soko. Jeova el fahk: ‘Ke pacl se ma kom oruh mwenmwen se inge, ac fah ahkpwacyeye lah nga pa suhpwekomlac uh.’

Moses el fahk: ‘Nga tiac arlac pah ke sramsram uh.’ Jeova el wuhlelah nuh sel: ‘Nga ac fah fahk nuh sum ma kom in fahk ac nga ac fah suhpwacllah Aaron tamuhlwel wiyom elan kahsre kom.’ Ke Moses el etuh lah Jeova el weluhl, el us muhtwacn kiyacl ac wen nahtuhl uh fohlohk nuh Egypt.