Lot el weluhl Abraham, suc ma wiyen pahpah tuhmwacl, muhta fin acn Canaan. Tiac paht, puhseni kosro nahtuhl Abraham ac Lot pwacnacng wacngihnlac acn luhn ma inge nohfohn. Oruh Abraham elan fahk nuh sel Lot: ‘Kuht tilac kuh in tuhkweni muhta ke acn sefanna. Nuhnak muhnahs sulaclah lacyen se ma kom luhngse in som nuh we an na nga fah som nuhke lacyen se sahyac an.’ Kom liye tuh ma Abraham el oruh inge ahkkahlwemye lah el tiac nuhnkuh kacl sifacna?

Lot el liyacack sie ipin acn na kahto apkuhran nuhke siti se pahngpahng Sodom. Arlacna yohk kof ac mah folfol sra we. Pwacnacng, el sulaclah acn sac ac uslah sucu lal nuh we.

Mwet Sodom ac mwet ke sie pac siti ma pahngpahng Gomorrah eltahl koluk. Ke srihpen eltahl arlacna koluk pwacnacng Jeova el sulaclah elan kuhnahoslah siti inge. God el luhngse in molwellah Lot ac sucu lal uh, pwacnacng el suhpwaclah lipufacn luo lal in sensenkuhnuhltahl: ‘Suhlahklahk! Som liki siti inge! Jeova el ac kuhnahoslah acn uh.’

Lot el tiac suhlahklahk in kahing. Pwacnacng, lipufacn inge sruokyac pahol Lot, muhtwacn kiyacl, ac tuhlihk muhtwacn luo nahtuhltahl inge ac kohluhltahllah nuh lihkihn siti uh. Ac fahk nuh seltahl: ‘Kahsruhsr! Suk moul lomtacl ac nikmet tahpuhllac. Kowos fin tahpuhllac, kowos ac fah misac!’

Ke pacl se ma eltahl sun sie siti pahngpahng Zoar, Jeova el oraclah yot sulfur fihrihr oacna af uh puhtat inkuhsrao me nuh fin acn Sodom  ac Gomorrah. Siti luo inge kuhnanuclac na pwacye. Ke pacl se ma muhtwacn kiyacl Lot ah seahkos Jeova ac el tahpuhllac, el eklac sru in sohl soko! Tuhsruhktuh, Lot ac tuhlihk muhtwacn nahtuhl inge moullac ke srihpen eltahl ahkos Jeova. Eltahl arlac ahsor ke muhtwacn kiyacl Lot uh tiac ahkos. Tuhsruhktuh, eltahl engan ke srihpen eltahl ahkos ma Jeova el fahk uh.