Psalm 45:1-17
[Kusen On lun Tulik natul Korah su Onkakin Lungse]
On In Marut Lun Mwet Leum
45 Kas wolana oan in nunak luk
Ke nga kinala on soko inge nu sin tokosra.
Louk akola tari nu ke on soko inge,
Oana pen in sim nutin sie mwet etu sim.
2 Kom pa oasku emeet inmasrlon mukul uh.
Kom mwet na pah in sramsram se.
God El akinsewowoye kom pacl e nukewa.
3 Tokosra kulana, losya cutlass nutum pupom;
Kom wolana ac fulatlana.
4 Kasrusr nu meet in wal fulat lom, nu ke kutangla,
Tuh kom in karinganang ma pwaye ac suwoswos!
Ku lom ac fah asot kutangla lulap!
5 Mwe pisr nutum an kosroh,
Elos fakisya insien mwet lokoalok lom;
Mutunfacl elos putatla nu ye niom.
6 Tokosrai su God El sot nu sum
Ac fah oan nwe tok ma pahtpat.
Kom leum fin mwet lom ke suwoswos;*
7 Kom lungse ma suwohs ac srunga ma koluk.
Ke sripa se inge God, su God lom, El sulekomla
Ac okoaot mwe engan nu fom
Yohk liki kutena tokosra saya.
8 Nuknuk lom keng ke foulin myrrh ac aloes;
Mwet srital ke mwe on elos akpwarye kom in lohm su yunla ke ivory.
9 Inmasrlon mutan fusr su muta inkul sum, oasr acn nutin tokosra,
Ac kasra el tu layen layot ke tron lom
Ac naweyukla ke mwe yun gold.
10 O kom, mutan pisrla kien tokosra, porongo ma nga fahk uh.
Mulkunla mwet lom ac sou lom.
11 Oasku lom ac fah oru tuh tokosra elan lungse kom;
El leum lom, ke ma inge kom enenu in aksol.
12 Mwet in acn Tyre elos ac fah use mwe lung nu sum;
Mwet kasrup elos ac fah suk ohi ye motom.
13 Fisrak mutan el muta in lohm sin tokosra—el arulana oasku!
Nuknuk lal orekla ke turet gold.
14 El nuknukyang ke sie nuknuk na kato, ac kokola el nu yurin tokosra.
Mutan kulansap lal su welul
Elos oayapa utukyak nu yurin tokosra.
15 Ke engan ac insewowo elos tuku
Ac utyak nu in lohm sin tokosra.
16 Ac kom, O Tokosra, ac fah pus wen nutum
Tuh elos in aol mwet matu lom in tokosra,
Ac kom ac fah oru tuh elos in mwet kol fin faclu nufon.
17 On soko inge ac fah oru tuh inem in esamyuk nwe tok,
Ac mwet nukewa ac fah kaksakin kom ma pahtpat.
Footnotes
^ 45:6–7; Heb 1:8–9
