Psalm 25:1-22
[Psalm lal David]
Sie Pre Siyuk Ke Kolyuk Ac Karinginyuk
25 O LEUM GOD, nga sot insiuk nufon nu sum;
2 God luk, nga lulalfongi kom.
Nikmet lela in akmwekinyeyuk nga.
Nikmet lela mwet lokoalok luk in aksruksrukyeyu!
3 Elos su tupan kom fah tia akmwekinyeyuk,
A elos na su tuyak lain kom fah mwekin.
4 Fahkak inkanek lom nu sik, O LEUM GOD,
Luti nu sik innek lom.
5 Lutiyu in moul fal nu ke ma pwaye lom,
Tu kom God luk su moliyula.
Nga lulalfongi kom pacl e nukewa.
6 O LEUM GOD, esam pakoten ac lungse kawil lom
Su kom akkalemye oemeet me.
7 Nimet esam ma sutuu ac ma koluk luk in len in fusr luk.
A esamyu, O LEUM GOD,
Fal nu ke lungse kawil ac pakoten lom.
8 Ke sripen LEUM GOD el suwohs ac wo,
El luti mwet koluk ke inkanek elos in fahsr kac.
9 El kol mwet inse pusisel nu ke inkanek pwaye
Ac lotelos ke ma lungse lal.
10 Ke oaru ac lungse, El kololos su
Karinganang wuleang lal ac akos ma sap lal.
11 LEUM GOD, nunak munas ke ma koluk luk, fal nu ke Inem,
Tuh ma koluk luk arulana pus.
12 Elos su sunakin LEUM GOD
El ac fah luti nu selos inkanek su fal elos in fahsr kac.
13 Elos ac fah kapkapak,
Ac fwil natulos ac fah usrui facl selos.
14 LEUM GOD El mwet kawuk lalos su sunakunul
Ac El ac fah akpwayeye wulela lal nu selos.
15 Nga suk kasru sin LEUM GOD in pacl nukewa,
Ac El moliyu liki mwe sensen.
16 LEUM GOD, ngetma nu sik ac pakomutuk,
Tuh nga muku ac munas.
17 Akfisrasrye mwe fosrnga nu sik
Ac moliyula liki mwe ongoiya.
18 Akilen fosrnga ac keok luk
Ac nunak munas ke ma koluk luk nukewa.
19 Liye pusiyen mwet lokoalok luk,
Ac ke lupan srunga sulallal lalos nu sik.
20 Karinginyu ac moliyula:
Nikmet lela in akmwekinyeyuk nga,
Tuh nga tuku in moulla yurum.
21 Lela ma wo ac suwohs luk in akwoyeyu,
Mweyen nga lulalfongi in kom.
22 O God, molela Israel, mwet lom,
Liki mwe ongoiya lalos nukewa.
