Psalm 18:1-50
[Kas ma David, mwet kulansap lun Leum God, el tu onkakin nu sin Leum ke len se ma Leum God El molella lukel Saul a kutu pa mwet lokoalok lal.]
On In Kutangla Lal David
(Luo Samuel 22:1–51)
18 Nga arulana lungse kom, LEUM GOD!
Kom ku luk.
2 LEUM GOD El eot ku luk,
El nien wikla luk.
God luk El mwe loeyuk luk,
Ke nga muta yorol nga moul.
El lisringyu oana sie mwe loeyuk;
El loangeyu tuh nga in moul.
3 Nga pang nu sin LEUM GOD,
Ac El moliyula liki mwet lokoalok luk.
Kaksakin LEUM GOD!
4 Mwe fosrnga lun misa apinyula,
Ac noa lun kunausten toki nu fuk.
5 Mwe fosrnga lun misa rauniyula,
Ac mwe kwasrip lun kulyuk sruokyuwi.
6 In ongoiya luk, nga pang nu sin LEUM GOD;
Nga pang nu sin God luk Elan kasreyu.
In Tempul lal El lohng pusrek,
Ac El porongo pusren tung in kwafe luk.
7 Na faclu rarrar ac usrusryak;
Pwelung lun eol uh mukuikui ac kusrusrsrusr,
Mweyen God El kasrkusrak.
8 Kulasr fofosryak liki infwacl.
Sie e in kunausten ac mulut fol sikyak liki oalul.
9 El ikaselik yen engyeng uh ac oatui
Wi sie pukunyeng lohsr ye nial.
10 El sohksok mui fin sie cherub,*
Ac eng uh okulla arulana mui, oana sohk lun sie won.
11 El nokmulla ke lohsr;
Pukunyeng matoltol, su sesesla ke kof, raunella.
12 Af yohk kosra ac e firir
Tuku liki sarom uh ye mutal
Ac kunauselik pukunyeng lohsr matoltol uh.
13 Na pusren LEUM GOD ngirla oana pusren pulahl inkusrao me,
Ac pusren El su Fulatlana lohngyuk.*
14 El pusrukla pisr natul, ac akfahsryelik mwet lokoalok lal;
Ke sarmelik lun sarom, El oru elos kaingelik.
15 Kapin meoa uh wanginla ma oan fac,
Ac pwelung in faclu ikakelik,
Ke kom mulat nu sin mwet lokoalok lom, O LEUM GOD,
Ac ngirla nu selos ke kom kasrkusrak.
16 LEUM GOD El saplakme lucngi ac sruokyuwi;
El amakinyuyak liki inkof loal.
17 El moliyula liki mwet lokoalok kulana luk
Ac lukelos nukewa su srungayu—
Elos arulana kula nu sik.
18 Ke nga muta in ongoiya, elos lainyu,
Tusruktu LEUM GOD El loangeyula.
19 El eisyula liki mwe fosrnga;
El moliyula mweyen El insewowo sik.
20 LEUM GOD El ase lacnen orekma suwohs luk;
El akinsewowoyeyu mweyen wangin mwetik.
21 Nga akos na ma sap lun LEUM GOD;
Nga tiana forla liki God luk.
22 Nga karinganang ma sap lal nukewa;
Nga tia seakos ma El sapkin.
23 El etu lah wangin ma sutuu luk,
Ac lah nga sifacna taranyu tuh nga in tia oru ma koluk.
24 Ke ma inge El ase lacnen orekma suwohs luk;
Mweyen El etu lah wangin mwetik.
25 O LEUM GOD, kom oaru nu selos su oaru nu sum;
Kom arulana wo nu selos su moul suwohs.
26 Kom nasnas nu selos su nasnas,
A kom kwaselos su koluk.
27 Kom molelos su inse pusisel,
Ac kom akpusiselyalos su inse fulat.
28 O LEUM GOD, kom ase kalem nu sik;
Kom sisla lohsr likiyu.
29 Kom ase ku luk in lain mwet lokoalok luk,
Ac akkeyeyu in fanyak ac sasla pot ku lalos.
30 God se inge—ma nukewa El oru arulana suwohs!
Kas lal uh arulana fal in lulalfongiyuk!
El oana sie mwe loeyuk
Nu selos nukewa su suk molela sel.
31 LEUM GOD El mukena God;
El mukena mwe molela nu sesr.
32 El pa God su oru tuh nga in ku,
El oru inkanek luk in misla ac wo.
33 El oru falkuk in okak oana falken kosro deer;
El karinginyu ke nga fahsr fineol.*
34 El akpahyeyu nu ke mweun,
Tuh nga in ku in orekmakin mwe pisr kulana.
35 O LEUM GOD, kom karinginyu ac moliyu,
Ac ku lom sruokyuwi in misla.
Kasru lom akmwetyeyu.
36 Kom karinginyu tuh in tia sruhu nga,
Ac nga soenna ikori.
37 Nga ukwe mwet lokoalok luk ac sruokolosi;
Nga tia tui nwe ke na nga kunauselosla.
38 Nga srunglulosi ac elos tia ku in tuyak;
Elos kutangyukla ac oan alapla ye mutuk.
39 Kom ase ku luk in mweun,
Ac se kutangla nu sik fin mwet lokoalok luk.
40 Kom oru tuh mwet lokoalok luk in kaing likiyu;
Nga kunauselosla su srungayu.
41 Elos tung ac siyuk kasru, a wangin mwet molelosla;
Elos pang nu sin LEUM GOD, a El tiana topuk.
42 Nga itungulosi, ac elos ekla oana kutkut
Su eng uh okla.
Nga fotongolosi oana fohk furarrar inkanek uh.
43 Kom moliyula liki mwet su lainyu
Ac kom oru tuh nga in kol mutanfahl uh;
Mwet su nga tia etu meet, inge elos orekma nu sik.
44 Mwetsac elos epasr ye mutuk;
Ke elos lohng pusrek elos akos.
45 Pulaik lalos wanginla
Ac elos rarrar ke elos tuku liki pot ku lalos.
46 LEUM GOD El moul! Kaksakin El su nien molela luk!
Sulkakinelik pwengpeng lun God su moliyula.
47 El ase kutangla fin mwet lokoalok luk;
El akpusiselye mutunfacl su oan ye ku luk,
48 Ac moliyula liki mwet lokoalok luk.
O LEUM GOD, kom ase kutangla nu sik fin mwet lokoalok luk,
Ac moliyula liki mwet sulallal.
49 Ke ma inge nga kaksakin kom inmasrlon mutunfacl uh;
Nga onkakin on in kaksak nu sum.*
50 God El sang kutangla lulap nu sin tokosra lal;
El akkalemye lungse kawil lal nu sel su El sulela,
Aok, nu sel David ac fwil natul nwe tok.
