Psalm 102:1-28
[Pre lun sie Mwet Totola, su Fahkak Mwe Keok lal nu sin LEUM GOD]
Pre Lun Sie Mwet Fusr Su Muta In Ongoiya
102 Porongo pre luk, O LEUM GOD,
Ac lohng tung luk ke nga suk kasru sum!
2 Nikmet ngetla likiyu
In pacl in ongoiya nu sik.
Lipsreyu,
Ac sa in topukyu ke nga pang nu sum.
3 Moul luk fahsr in wanginla oana kulasr,
Ac monuk folla oana sie e firir.
4 Futungyuki nga oana mah paola,
Ac wanginla pwar luk in mongo.
5 Nga sasao ke pusra lulap,
Ac wanginla ma keik sayen sri na kolo.
6 Nga oana sie won lemnak yen mwesis,
Ac oana sie won owl yen ma musalla ac wangin ma fac.
7 Nga oanna tia motul;
Nga oana sie won mukaimtal su muta fin mangon sie lohm.
8 Mwet lokoalok luk elos akkolukyeyu ke len fon;
Elos su aksruksrukyeyu elos orekmakin inek oana sie mwe selnga.
9 Nga mongo apat oana bread,
Ac karyak ma nimuk ke sroninmutuk.
10 Ke sripen sulung ac mulat lom
Oru kom srukyuyak ac sisyula.
11 Moul luk oana lul in eku,
Ac nga mongeni oana mah paola.
12 Tusruktu kom, O LEUM GOD, fah tokosra ma pahtpat,
Ac fwil nukewa fah esam kom.
13 Kom ac fah tuyak ac pakomuta Zion,
Tuh pacl fal kom in pakomutal—
Nuna pacl fal la pa inge.
14 Mwet kulansap lom elos lungse el,
Finne kunausyukla el.
Elos pakomutal,
Finne el musalla.
15 Mutunfacl uh fah sangeng sin LEUM GOD;
Tokosra nukewa fin faclu fah sangeng ke ku lal.
16 Ke LEUM GOD El sifil musaeak Zion,
El ac fah akkalemye fulat lal.
17 El ac fah porongo pusren mwet sisila lal,
Ac lohng pre lalos.
18 Simusla ma LEUM GOD El oru inge nu sin fwil tok uh,
Tuh mwet ma soenna isusla in mau wi kaksakin LEUM GOD.
19 LEUM GOD El ngeti liki acn mutal sel lucng,
El ngeti inkusrao me nu faclu.
20 El lohng sasao lun mwet kapir
Ac tulalosla su wotyang nu ke misa.
21 Ouinge Inel ac fah fwackyuk in Zion;
Ac fah kaksakinyuk El in Jerusalem
22 Ke mutanfahl uh ac tokosrai nukewa ac fah tukeni
Ac alu nu sin LEUM GOD
23 LEUM GOD El oru nga munasla ke nga srakna fusr;
El akfototoyela moul luk.
24 O God, nikmet eisyula inge
Meet liki nga matuoh.
O LEUM GOD, kom moul ma pahtpat.
25 In pacl loeloes somla kom orala faclu,
Ac ke poum sifacna kom orala kusrao.*
26 Ma inge ac wanginla, a kom fah mutana;
Ma inge ac mahi oana nuknuk;
Kom fah sisla oana nuknuk,
Na elos fah wanginla.
27 A kom ac nuna oaya ah,
Ac moul lom ac tiana safla.
28 Tulik natusr elos ac fah moul in misla;
Na ke karinginyuk lom
Fwil natulos ac fah oakwuki in misla.
Footnotes
^ 102:25–27; Heb 1:10–12
