ಕೀರ್ತನೆ 73:1-28
ಆಸಾಫನ ಮಧುರ ಗೀತೆ.+
73 ಶುದ್ಧ ಮನಸ್ಸಿರೋ ಇಸ್ರಾಯೇಲ್ಯರಿಗೆ ದೇವರು ನಿಜವಾಗ್ಲೂ ಒಳ್ಳೇದನ್ನೇ ಮಾಡ್ತಾನೆ.+
2 ಆದ್ರೆ ನನ್ನ ಕಾಲು ಇನ್ನೇನು ದಾರಿ ತಪ್ಪಿ ಹೋಗ್ತಿತ್ತು,ನನ್ನ ಪಾದ ಜಾರಿ ಇನ್ನೇನು ಬೀಳ್ತಿದ್ದೆ.+
3 ಯಾಕಂದ್ರೆ ಕೆಟ್ಟವರು ಆರಾಮಾಗಿ ಜೀವಿಸ್ತಾ ಇರೋದನ್ನ ನೋಡಿ,ಆ ಗರ್ವಿಷ್ಠರ* ಮೇಲೆ ನನಗೆ ಹೊಟ್ಟೆಕಿಚ್ಚಾಯ್ತು.+
4 ಅವರು ಗಟ್ಟಿಮುಟ್ಟಾಗಿದ್ದಾರೆ.*
ಸಾವಿನಲ್ಲೂ ಅವ್ರಿಗೆ ನೋವು ಇಲ್ಲ.+
5 ಬೇರೆಯವ್ರಿಗೆ ಇರೋ ತೊಂದರೆಗಳು ಅವ್ರಿಗಿಲ್ಲ,+ಬೇರೆಯವ್ರ ತರ ಅವರು ಕಷ್ಟಪಡಲ್ಲ.+
6 ಹಾಗಾಗಿ ಅಹಂಕಾರನೇ ಅವ್ರ ಕತ್ತಿನ ಸರ,+ಹಿಂಸೆನೇ ಅವ್ರ ಬಟ್ಟೆ.
7 ಅವ್ರ ಸಮೃದ್ಧಿಯಿಂದ* ಅವ್ರ ಕಣ್ಣು ಉಬ್ಬಿಕೊಂಡಿದೆ,ಅವರು ಮನಸ್ಸಲ್ಲಿ ನೆನಸಿದ್ದಕ್ಕಿಂತ ಹೆಚ್ಚು ಯಶಸ್ಸನ್ನ ಪಡ್ಕೊಂಡಿದ್ದಾರೆ.
8 ಅವರು ಬೇರೆಯವ್ರನ್ನ ಕೀಳಾಗಿ ನೋಡ್ತಾ, ಕೆಟ್ಟಕೆಟ್ಟ ಮಾತು ಆಡ್ತಾರೆ,+ಜನ್ರನ್ನ ಹೆದರಿಸಿ ಬೆದರಿಸಿ ಜಂಬದಿಂದ ಅವ್ರ ಮೇಲೆ ದಬ್ಬಾಳಿಕೆ ಮಾಡ್ತಾರೆ.+
9 ಅವರು ಕೊಚ್ಚಿಕೊಳ್ಳೋ ಮಾತುಗಳು ಆಕಾಶ ಮುಟ್ಟುತ್ತೆ,ಅವರು ಇಷ್ಟಬಂದ ಹಾಗೆ ಮಾತಾಡ್ತಾ ಭೂಮಿಯಲ್ಲೆಲ್ಲ ತಿರುಗ್ತಾರೆ.
10 ಹಾಗಾಗಿ ದೇವ್ರ ಜನ್ರು ಅವ್ರ ಕಡೆ ವಾಲ್ತಾರೆ,ಉಕ್ಕಿ ಹರೀತಿರೋ ಅವ್ರ ನೀರನ್ನ ಕುಡಿತಾರೆ.
11 “ದೇವರಿಗೆ ಇದೆಲ್ಲಾ ಹೇಗೆ ಗೊತ್ತಾಗುತ್ತೆ?+
ಸರ್ವೋನ್ನತನಿಗೆ ನಿಜವಾಗ್ಲೂ ಇದ್ರ ಬಗ್ಗೆ ಗೊತ್ತಾ?” ಅಂತ ಅವರು ಕೇಳ್ತಾರೆ.
12 ಹೌದು, ಈ ಕೆಟ್ಟವರಿಗೆ ಜೀವನ ಯಾವಾಗ್ಲೂ ಆರಾಮಾಗಿ ಇರುತ್ತೆ.+
ಅವ್ರ ಆಸ್ತಿ ಜಾಸ್ತಿ ಆಗ್ತಾನೇ ಇರುತ್ತೆ.+
13 ನಾನು ನನ್ನ ಹೃದಯನ ಶುದ್ಧವಾಗಿ ಇಟ್ಕೊಂಡು,ನಾನು ನನ್ನನ್ನೇ ನಿರಪರಾಧಿ ಅಂತ ಸಾಬೀತು ಮಾಡಿದ್ದು ಎಲ್ಲ ವ್ಯರ್ಥ ಆಯ್ತು.+
14 ಇಡೀ ದಿನ ನಾನು ಕಷ್ಟಪಡ್ತಿದ್ದೆ,+ದಿನಾ ಬೆಳಿಗ್ಗೆ ದೇವರು ನನಗೆ ಶಿಕ್ಷೆ ಕೊಡ್ತಿದ್ದ.+
15 ಆದ್ರೆ ಈ ವಿಷ್ಯಗಳನ್ನ ನಾನು ಹೇಳ್ಕೊಂಡಿದ್ರೆ,ನಾನು ನಿನ್ನ ಜನ್ರಿಗೆ ದ್ರೋಹಮಾಡಿದ ಹಾಗೆ ಆಗ್ತಿತ್ತು.
16 ನಾನದನ್ನ ಅರ್ಥಮಾಡಿಕೊಳ್ಳೋಕೆ ಪ್ರಯತ್ನಿಸಿದಾಗ,ಅದ್ರಿಂದ ನನಗೆ ನೋವಾಗ್ತಿತ್ತು.
17 ದೇವರ ಆರಾಧನಾ ಸ್ಥಳಕ್ಕೆ ಹೋಗಿಕೆಟ್ಟವರ ಭವಿಷ್ಯದ ಬಗ್ಗೆ ಯೋಚಿಸಿದ ಮೇಲೆನೇ ನನಗೆ ಆ ನೋವು ಕಮ್ಮಿ ಆಯ್ತು.
18 ನೀನು ಖಂಡಿತ ಅವ್ರನ್ನ ಜಾರಿ ಬೀಳೋ ದಾರಿಯಲ್ಲಿ ನಿಲ್ಲಿಸ್ತೀಯ.+
ಹಾಗಾಗಿ ಅವರು ಬಿದ್ದು ನಾಶ ಆಗ್ತಾರೆ.+
19 ಎಷ್ಟು ಬೇಗ ಅವರು ಹಾಳಾಗಿ ಹೋದ್ರು!+
ಇದ್ದಕ್ಕಿದ್ದ ಹಾಗೆ ವಿಪತ್ತು ಬಂದು ಅವರು ಭಯಂಕರ ಅಂತ್ಯ ಕಂಡ್ರು!
20 ಯೆಹೋವನೇ, ಒಬ್ಬ ವ್ಯಕ್ತಿ ನಿದ್ದೆಯಿಂದ ಎದ್ದಾಗ ಕನಸನ್ನ ಮರಿಯೋ ತರ,ನೀನು ಎದ್ದಾಗ, ಅವ್ರನ್ನ ಮರೆತುಬಿಡ್ತೀಯ.
21 ಆದ್ರೆ ನನ್ನ ಹೃದಯ ನೊಂದುಹೋಗಿತ್ತು,+ನನ್ನ ಅಂತರಾಳದಲ್ಲಿ* ತುಂಬ ನೋವಿತ್ತು.
22 ನಾನು ಮೂರ್ಖನಾಗಿದ್ದೆ, ನನಗೆ ತಿಳುವಳಿಕೆ ಇರಲಿಲ್ಲ,ಬುದ್ಧಿಯಿಲ್ಲದ ಮೃಗದ ತರ ಇದ್ದೆ.
23 ಆದ್ರೆ ಈಗ ನಾನು ಯಾವಾಗ್ಲೂ ನಿನ್ನ ಜೊತೆ ಇರ್ತಿನಿ,ನೀನು ನನ್ನ ಬಲಗೈಯನ್ನ ಹಿಡ್ಕೊಂಡು ಇರ್ತಿಯ.+
24 ನೀನು ಸಲಹೆ ಕೊಟ್ಟು ನನಗೆ ದಾರಿ ತೋರಿಸ್ತೀಯ,+ಆಮೇಲೆ ನೀನು ನನಗೆ ಸನ್ಮಾನ ಮಾಡಿಸ್ತೀಯ.+
25 ಸ್ವರ್ಗದಲ್ಲಿ ನಿನ್ನನ್ನ ಬಿಟ್ರೆ ನನಗೆ ಬೇರೆ ಯಾರಿದ್ದಾರೆ?
ನೀನು ನನ್ನ ಜೊತೆ ಇದ್ರೆ ಭೂಮಿ ಮೇಲಿರೋ ಯಾರೂ ನನಗೆ ಬೇಕಾಗಿಲ್ಲ.+
26 ನನ್ನ ದೇಹ, ನನ್ನ ಮನಸ್ಸು ಸುಸ್ತಾಗಿ ಹೋದ್ರೂ,ದೇವರು ನನ್ನ ಹೃದಯವನ್ನ ಕಾಪಾಡ್ತಾನೆ, ಆತನೇ ನನ್ನ ಬಂಡೆ.
ಯಾವಾಗ್ಲೂ ಆತನೇ ನನ್ನ ಪಾಲು.+
27 ನಿನ್ನಿಂದ ದೂರ ಇರೋರು ನಿಜವಾಗ್ಲೂ ನಾಶವಾಗಿ ಹೋಗ್ತಾರೆ.
ನಂಬಿಕೆದ್ರೋಹ ಮಾಡಿ* ನಿನ್ನನ್ನ ಬಿಟ್ಟು ಹೋಗೋರ ಮೇಲೆ ನೀನು ಅಂತ್ಯ ತರ್ತಿಯ.*+
28 ಆದ್ರೆ ನನ್ನ ಪ್ರಕಾರ, ದೇವರಿಗೆ ಹತ್ತಿರ ಆಗೋದೇ ಒಳ್ಳೇದು.+
ವಿಶ್ವದ ರಾಜ ಯೆಹೋವನ ಕೈಕೆಲಸಗಳನ್ನೆಲ್ಲ ಹೇಳೋಕೆ ಆತನನ್ನ ಆಶ್ರಯ ಮಾಡ್ಕೊಂಡಿದ್ದೀನಿ.+
ಪಾದಟಿಪ್ಪಣಿ
^ ಅಥವಾ “ಕೊಚ್ಚಿಕೊಳ್ಳೋರ.”
^ ಅಥವಾ “ಅವರಿಗೆ ದೊಡ್ಡ ಹೊಟ್ಟೆ ಇದೆ.”
^ ಅಕ್ಷ. “ಕೊಬ್ಬಿಂದ.”
^ ಅಕ್ಷ. “ನನ್ನ ಮೂತ್ರಪಿಂಡದಲ್ಲಿ.”
^ ಅಕ್ಷ. “ವೇಶ್ಯೆರ ತರ ನಡ್ಕೊಂಡು.”
^ ಅಕ್ಷ. “ನಿಶಬ್ದ ಮಾಡ್ತೀಯ.”
