ದೇವರು ನಮ್ಮನ್ನ ಸೃಷ್ಟಿ ಮಾಡಿರೋದ್ರಿಂದ ನಮಗೇನು ಒಳ್ಳೇದು ಅಂತ ಆತನಿಗೆ ಚೆನ್ನಾಗಿ ಗೊತ್ತು. ಅದಕ್ಕೇ ಆತನು ಹೇಳೋ ತರನೇ ನಾವು ಜೀವನ ಮಾಡಬೇಕು ಅಂತ ಆತನು ಆಸೆಪಡ್ತಾನೆ. ನೀವು ಆ ತರ ಜೀವನ ಮಾಡಿದ್ರೆ ಮುಂದೆ ನಿಮಗೆ ಒಳ್ಳೇದಾಗುತ್ತೋ ಇಲ್ವೋ ಅನ್ನೋ ಸಂಶಯನೇ ಇರಲ್ಲ. ಯಾಕಂದ್ರೆ ನೀವು ಸರಿಯಾದ ತೀರ್ಮಾನನೇ ತಗೊಂಡಿರ್ತೀರ. ಅದ್ರಿಂದ ನೀವು ಗ್ಯಾರಂಟಿ ಖುಷಿಯಾಗಿ, ನೆಮ್ಮದಿಯಾಗಿ ಇರ್ತೀರ.

 ದೇವರ ನಿಯಮಗಳನ್ನ ಪಾಲಿಸುವಾಗ ನಾವು ಯೋಚ್ನೆ ಮಾಡೋ ರೀತಿಯಲ್ಲಿ, ನಡ್ಕೊಳ್ಳೋ ರೀತಿಯಲ್ಲಿ ಕೆಲವೊಮ್ಮೆ ಬದಲಾವಣೆ ಮಾಡ್ಕೊಬೇಕಾಗುತ್ತೆ. ಆದ್ರೆ ಯೆಹೋವ ನಮ್ಮಿಂದ ಆಗದೇ ಇರೋದನ್ನ ಯಾವತ್ತೂ ಕೇಳಲ್ಲ. ಆತನು ನಮ್ಮನ್ನ ಸೃಷ್ಟಿ ಮಾಡಿರೋದ್ರಿಂದ ನಮ್ಮಿಂದ ಏನು ಮಾಡಕ್ಕಾಗುತ್ತೆ, ಏನು ಮಾಡಕ್ಕಾಗಲ್ಲ ಅಂತ ಆತನಿಗೆ ಚೆನ್ನಾಗಿ ಗೊತ್ತು. ಅದಷ್ಟೇ ಅಲ್ಲ, ನಾವು ಯೆಹೋವ ದೇವರ ಬಗ್ಗೆ ತಿಳ್ಕೊಳ್ತಾ ಹೋದ ಹಾಗೆ ಆತನ “ಆಜ್ಞೆಗಳು ಅಷ್ಟೇನೂ ಕಷ್ಟ ಅಲ್ಲ” ಅಂತ ನಮಗೇ ಗೊತ್ತಾಗುತ್ತೆ.—1 ಯೋಹಾನ 5:3.

ಯೆಹೋವ ದೇವರ ನಿಯಮನ ಪಾಲಿಸೋಕೆ ನಮ್ಮಿಂದ ಆಗುತ್ತೆ. ಯಾಕಂದ್ರೆ ಅದಕ್ಕೆ ಆತನೇ ನಮಗೆ ಸಹಾಯ ಮಾಡ್ತಾನೆ. ಆ ಸಹಾಯನ ಬೈಬಲಿಂದ ಕೊಡ್ತಾನೆ. ಬೈಬಲನ್ನ ಓದಿದಾಗ ನಮಗೆ ಸರಿಯಾಗಿರೋದನ್ನ ಮಾಡೋಕೆ ಧೈರ್ಯ ಸಿಗುತ್ತೆ ಮತ್ತು ಮುಂದೆ ನಮ್ಮ ಜೀವನ ಚೆನ್ನಾಗಿರುತ್ತೆ ಅನ್ನೋ ನಂಬಿಕೆನೂ ಜಾಸ್ತಿ ಆಗುತ್ತೆ.

ಬೈಬಲಲ್ಲಿರೋ ಬುದ್ಧಿಮಾತುಗಳನ್ನ ಪಾಲಿಸಿದ್ರಿಂದ ಇವತ್ತು ನಮ್ಮ ಜೀವನ ತುಂಬ ಚೆನ್ನಾಗಿದೆ ಅಂತ ಲಕ್ಷಾಂತರ ಜನ್ರು ಹೇಳ್ತಿದ್ದಾರೆ. ನೀವೂ ಬೈಬಲಲ್ಲಿರೋ ಬುದ್ಧಿಮಾತುಗಳನ್ನ ಪಾಲಿಸಿ ನೋಡಿ. ಅದಕ್ಕೆ ನಿಮಗೆ ಎಂದೆಂದೂ ಖುಷಿಯಾಗಿ ಬಾಳೋಣ! ಅನ್ನೋ ಕಿರುಹೊತ್ತಿಗೆ ಸಹಾಯ ಮಾಡುತ್ತೆ. ಅದನ್ನ ನೀವು jw.orgನಲ್ಲಿ ಫ್ರೀಯಾಗಿ ಡೌನ್‌ಲೋಡ್‌ ಮಾಡ್ಕೊಬಹುದು. ಅದ್ರಲ್ಲಿ ಈ ಪಾಠಗಳನ್ನ ಓದಿ ನೋಡಿ:

• ದೇವರಿಂದ ಯಾಕೆ ಕಲಿಯಬೇಕು?

• ಸುಂದರ ಭವಿಷ್ಯದ ಬಗ್ಗೆ ಪವಿತ್ರ ಗ್ರಂಥ ಕೊಡೋ ಮಾತು

• ಪವಿತ್ರ ಗ್ರಂಥದಲ್ಲಿರೋ ಮಾತುಗಳನ್ನ ನಂಬಬಹುದಾ?

ನೀವು ಬೈಬಲನ್ನ ಜಾಸ್ತಿ ಕಲಿತಾ ಹೋದ ಹಾಗೆ ಅದ್ರಲ್ಲಿರೋ ವಿಷ್ಯಗಳು ಹಳೇ ಕಾಲದ್ದಲ್ಲ, ಅದ್ರಿಂದ ಇವತ್ತಿಗೂ ಪ್ರಯೋಜನ ಇದೆ ಅಂತ ನಿಮಗೆ ಗೊತ್ತಾಗುತ್ತೆ. ಅದನ್ನ “ಯಾವಾಗ್ಲೂ ನಂಬಬಹುದು, ಇಂದಿಗೂ ಎಂದೆಂದಿಗೂ ನಂಬಬಹುದು.” (ಕೀರ್ತನೆ 111:8) ಅದ್ರಲ್ಲಿರೋ ನಿಯಮಗಳನ್ನ ಪಾಲಿಸಿದ್ರೆ ನಿಮ್ಮ ಜೀವನ ತುಂಬ ಚೆನ್ನಾಗಿರುತ್ತೆ. ಆದ್ರೆ ನೀವು ಇದನ್ನ ಪಾಲಿಸಬೇಕು ಅಂತ ದೇವರು ನಿಮಗೆ ಒತ್ತಾಯ ಮಾಡಲ್ಲ. (ಧರ್ಮೋಪದೇಶಕಾಂಡ 30:19, 20; ಯೆಹೋಶುವ 24:15) ನೀವಾಗೇ ಪಾಲಿಸಬೇಕು ಅಂತ ಆತನು ಇಷ್ಟಪಡ್ತಾನೆ.