ದೇವರ ಸಹಾಯದಿಂದ ದ್ವೇಷ ಅನ್ನೋ ಸರಪಳಿಯನ್ನು ಕಿತ್ತು ಹಾಕೋಕೆ ಆಗುತ್ತೆ. ಅದಕ್ಕೆ ಸಹಾಯ ಮಾಡೋ ಗುಣಗಳನ್ನು ಬೆಳೆಸಿಕೊಳ್ಳಲು ದೇವರ ಪವಿತ್ರ ಶಕ್ತಿ ನಮಗೆ ಸಹಾಯ ಮಾಡುತ್ತೆ. ನಾವು ನಮ್ಮ ಸ್ವಂತ ಶಕ್ತಿಯಿಂದ ದ್ವೇಷವನ್ನ ಜಯಿಸೋಕೆ ಆಗಲ್ಲ. ಅದಕ್ಕೆ ದೇವರ ಸಹಾಯ ಪಡೆಯಬೇಕು. ಹೀಗೆ ಮಾಡೋದಾದ್ರೆ ನಾವು ಅಪೊಸ್ತಲ ಪೌಲನ ತರ ಹೇಳಬಹುದು. ಅವನು ಹೇಳಿದ್ದು: “ದೇವರಿಂದಾನೇ ನನಗೆ ಎಲ್ಲ ಮಾಡೋಕೆ ಆಗ್ತಿದೆ. ಯಾಕಂದ್ರೆ ನನಗೆ ಬೇಕಾದ ಶಕ್ತಿ ಕೊಡೋದು ಆತನೇ.” (ಫಿಲಿಪ್ಪಿ 4:13) ಅಷ್ಟೇ ಅಲ್ಲ, ಕೀರ್ತನೆಗಾರ ಹೇಳಿದಂತೆ “ಯೆಹೋವನಿಂದ ನನಗೆ ಸಹಾಯ ಸಿಗುತ್ತೆ” ಅಂತ ನಾವೂ ಹೇಳಬಹುದು.—ಕೀರ್ತನೆ 121:2.

ಪವಿತ್ರ ಶಕ್ತಿಯ ಸಹಾಯ ಪಡೆಯೋಕೆ ಯೆಹೋವನ ಹತ್ತಿರ ಪ್ರಾರ್ಥಿಸಿ. (ಲೂಕ 11:13) ದ್ವೇಷವನ್ನು ಕಿತ್ತೆಸೆಯಲು ಸಹಾಯ ಮಾಡೋ ಒಳ್ಳೆ ಗುಣಗಳನ್ನು ಬೆಳೆಸಿಕೊಳ್ಳಲು ಸಹ ಆತನ ಸಹಾಯ ಕೇಳಿ. ಇದಕ್ಕೆ ಸಹಾಯ ಮಾಡೋ ಆ ಗುಣಗಳು ಯಾವುದಂದ್ರೆ ಪ್ರೀತಿ, ಶಾಂತಿ, ತಾಳ್ಮೆ ಮತ್ತು ಸ್ವನಿಯಂತ್ರಣ. ಬೈಬಲ್‌ ಈ ಗುಣಗಳ ಬಗ್ಗೆ ಏನು ಹೇಳುತ್ತೆ ಅಂತ ಕಲಿತು ಅದನ್ನ ನಿಮ್ಮ ಜೀವನದಲ್ಲಿ ತೋರಿಸಿ. ಅಷ್ಟೇ ಅಲ್ಲ, ಅದನ್ನು ತೋರಿಸುವವರ ಜೊತೆ ಸ್ನೇಹ ಮಾಡಿ. ಇಂಥ ಸ್ನೇಹಿತರು “ಪ್ರೀತಿ ತೋರಿಸೋಕೆ, ಒಳ್ಳೇ ಕೆಲಸಗಳನ್ನ ಮಾಡೋಕೆ [ನಿಮಗೆ] ಪ್ರೋತ್ಸಾಹ ಕೊಡಬಹುದು.”—ಇಬ್ರಿಯ 10:24.