Çaxê Yûhenna girtin, wî şandin ser girava Patmosê. Wêderê Îsa derheqa axiriyê 16 xewn-xeyal wîra eyan kir. Wan xewn-xeyalada Yûhenna dît, wekî wê ça navê Yehowa bê rûmetkirinê, Padşatiya wî bê, qirara wî bê sêrî ser ezmana û ser erdê.

Xewn-xeyalekêda Yûhenna dît ça Yehowayê Himzor ser textê xwe rûniştibû. Û dor-berê wî 24 rûspî pê kincên sipî rûniştibûn û ser serê wan kofiyên zêrîn bûn. Ji text birûsk û dengê gurîniya erd-ezmana derdiket. Ew 24 rûspî ber Yehowa çok dan û serê xwe daxistin. Xewn-xeyalên dinda Yûhenna divîne elaleta mezin ji her mileta, bereka û zimana, yê ku serê xwe ber Yehowa datanîn. Berx, dêmek Îsa, şivantiyê dike û wana berbi ava jîyînê dibe. Paşî ewî dît, wekî Îsa ser ezman bû Padşa, û destpêkir tevî 24 rûspiya serwêrtiyê bike. Paşê wê yekê, Yûhenna dît ça Îsa tevî zîya, dêmek Şeytan, û cinên wî şer dikir û wan jorda avîtine ser erdê.

 Paşê Yûhenna divîne, ça Îsa tevî 144 000 kifşkiriya ser Çiyayê Siyonê sekinî ye. Usa jî ewî dît çawa melek ezmênda difirî û digote meriva: “Ji Xwedê bitirsin û şikiriyê bidine wî”.

Xewn-xeyalên dinda ewî şerê Harmegedonê dît. Wî şerîda Îsa û ordiya wî, Şeytan û serwêrtiya wî alt dikin. Xewn-xeyalên paşinda, Yûhenna divîne, wekî ser erdê û ser ezmana dibe edilayî. Şeytan û peyçûyên wî hatine kutakirinê. Hemû efirîna, ça ser erdê usa jî ser ezman destpêkirin navê Yehowa rûmet kin, û tenê wîra xizmet kin.