1-2. (a) Hin xwendekarên Kitêba Pîroz çima ditirsin ku bibin xizmetkarên Yehowa? (b) Di vê meqaleyê de, emê çi hîn bibin?

 GAVA tu Kitêba Pîroz hîn dibûyî, gelo te xwe di serî de paş digirt ku bibî Şahidê Yehowa? Belkî tu ditirsiyayî ku malbata te û dost û hevalên te wê çi bibêjin. Yan jî, tu belkî difikirî ku pir zor e ku tu li gor qanûnên Yehowa bijî. Eger halê te wisa bû, tuyê rind fehm bikî ku li hin xwendekarên Kitêba Pîroz çima zor tê ku qerarê bidin ku bibin Şahidên Yehowa.

² Îsa Mesîh dizanibû ku tirsên wisa dikarin bibin sebeb ku kesek di rêya rastiyê de bi pêş ve neçe (Meta 13:20-22). Dîsa jî, wî hêviya xwe ji kesên ku xwe hazir hîs nedikir ku li pey wî herin, nedibirî. Ji ber vê yekê, wî şagirtên xwe hîn dikirin ku ew çawa dikarin alî kesên wisa bikin ku ew (1) pê derxin ka çi ji wan re dibe asteng, (2) ji Yehowa zêdetir hez bikin, (3) ji her tiştî zêdetir bala xwe bidin daxwaza Yehowa û (4) li hemberî astengan bi ser bikevin. Gava em bi destê kitêba Heta Bi Hetayê Dilşad Be! alî xwendekarên xwe dikin ku ew bibin xizmetkarên Yehowa, em çawa dikarin li gor gotinên Îsa Mesîh hereket bikin?

ALÎ XWENDEKARÊ XWE BIKE KU EW PÊ DERXE KU ÇI JI WÎ RE DIBE ASTENG

3. Dibe ku çi bû sebeb ku Nîkodêmos hemen nebû şagirtê Îsa Mesîh?

³ Nîkodêmos di nav Cihûyan de mirovekî bi nav û deng bû. Li wî zor dihat ku bibe şagirtê Îsa Mesîh. Piştî ku Îsa Mesîh dest bi xizmeta xwe kiribû, bi tenê şeş meh derbas bûn heta ku Nîkodêmos fehm kir ku Îsa bi rastî jî Mesîhê sozdayî ye (Yûhena 3:1, 2). Lê belê, ji ber ku wî ji Cihûyan ditirsiya, wî xwest bi dizîka bi Îsa re sohbetê bike (Yûhena  7:13; 12:42). Ew belkî difikirî ku eger ew bibe şagirtê Îsa Mesîh, ewê gelek tiştan winda bike. a

4. Îsa Mesîh çawa alî Nîkodêmos kir ku ew daxwaza Xwedê fehm bike?

⁴ Nîkodêmos Qanûna Mûsa rind dizanibû, lê jê re alîkarî lazim bû ku ew fehm bike ku Yehowa ji wî çi dixwaze. Gelo Îsa Mesîh çawa alî wî kir? Ew hazir bû ku wexta xwe ji bo Nîkodêmos xerc bike, heta di nîvê şevê de jî. Wekî din, Îsa Mesîh ji Nîkodêmos re bi eşkereyî got ku gerek ew çi bike ku bibe şagirtê wî: Gerek ew tobe bike, vaftîz bibe û baweriya xwe bi Kurê Xwedê bîne (Yûhena 3:5, 14-21).

5. Tu çawa dikarî alî xwendekarê xwe bikî ku ew pê derxe ku çi ji pêşveçûna wî re dibe asteng?

⁵ Eger xwendekarekî te Kitêba Pîroz rind fehm kiriye jî, belkî jê re alîkarî lazim e ku ew pê derxe ku çi ji wî re dibe asteng. Belkî karê wî bi zêdeyî wexta wî dixwe yan malbata wî naxwaze ku ew bibe Şahidê Yehowa. Loma, bi xwendekarê xwe re wextê derbas bike. Belkî hûn dikarin bi hev re qehwe vexwin yan li derve bimeşin, da ku ew dilê xwe veke û bibêje ku çi rêya wî digire. Xwendekarê xwe teşwîq bike ku ew guhertinan bike, ne ji bo ku dilê te xweş bike, lê ji bo ku nîşan bide ku ew ji Yehowa hez dike.

6. Tu çawa dikarî cesareta xwendekarê xwe zêde bikî ku ew qerarê bide ku bibe xizmetkarê Xwedê? (1. Korîntî 16:13)

⁶ Baweriya xwendekarê xwe xurttir bike ku Yehowa wê destekê bide wî ku ew li gor Kitêba Pîroz bijî. Ev yek wê alî wî bike ku ew tiştên ku ew hîn dibe di jiyana xwe de pêk bîne (1. Korîntî 16:13 bixwîne). Wezîfeya te dişibe wezîfeya mamosteyekî mektebê. Ka bîne bîra xwe: Gava tu biçûk bûyî, te herî zêde ji kîjan mamosteyan hez dikir? Bi îhtimaleke mezin, te herî zêde ji mamosteyên wisa hez dikir, ên ku dilê te xurt dikir ku tu dikarî bi ser bikevî. Mîna vê, lazim e ku mamosteyekî Kitêba Pîroz ne tenê hîn bike ku Yehowa ji wî çi dixwaze, lê baweriya xwendekarê xwe xurttir bike ku bi alîkariya Yehowa, ew dikare bi ser bikeve. Gelo tu çawa dikarî vêya bikî?

ALÎ XWENDEKARÊ XWE BIKE KU EW JI YEHOWA ZÊDETIR HEZ BIKE

7. Îsa Mesîh çawa alî guhdarên xwe dikir ku ew ji Yehowa zêdetir hez bikin?

⁷ Îsa Mesîh dizanibû ku eger şagirtên wî ji Xwedê hez bikin, ewê bixwazin li gor tiştên ku ew hîn bûne, bijîn. Loma, wî gelek caran tiştên wisa hîn dikirin, ên ku alî şagirtên wî dikir ku ew ji Bavê xweyî ezmanî zêdetir hez bikin. Mesela, wî got ku Yehowa dişibe zilamekî ku tiştên baş dide zarokên xwe (Meta 7:9-11). Bavên hin guhdarên Îsa Mesîh belkî ne ew qas dilovan bûn. Ka bîne ber çavê xwe ku çîroka Îsa Mesîh a li ser bavê dilovan, ê ku kurê xweyî jirêderketî ji nû ve qebûl kir, çawa ser dilê wan tesîr kir. Belê, Îsa Mesîh nîşanî mirovan dida ku Yehowa ji wan çi qas hez dike (Lûqa 15:20-24).

8. Tu çawa dikarî alî xwendekarê xwe bikî ku ew ji Yehowa zêdetir hez bike?

⁸ Ji bo ku xwendekarê te ji Yehowa zêdetir hez bike, bala wî bikişîne ser sifetên wî yên xweş. Di her dersê de, nîşanî wî bide ku tiştên ku ew hîn dibe çawa bi hezkirina Yehowa ve girêdayî ne. Mesela, gava tu li ser fîdyeyê xeber didî, nîşan bide ku ew bi xwe çawa ji fîdyeyê feydeyê distîne (Romayî 5:8; 1. Yûhena  4:10). Eger xwendekarê te fehm bike ku Yehowa ji wî çi qas hez dike, ewê jî ji wî zêdetir hez bike (Galatî 2:20).

9. Çi alî Michael kir ku ew jiyana xwe biguherîne?

⁹ Serpêhatiya zilamekî bi navê Michael, ê ku li Endonezyayê dijî, bîne ber çavê xwe. Di biçûktiya xwe de, wî rastiya Kitêba Pîroz dizanî, lê ew vaftîz nebû. Gava ew 18 salî bû, ew çû welatekî din ku wek şoforê kamyonê bixebite. Paşê, ew zewicî, lê wî malbata xwe hişt û dîsa ji bo xebatê çû xerîbiyê. Gava ew li derveyî welêt bû, jina wî û qîza wî dest bi kursa Kitêba Pîroz kir û rind bi pêş ve çûn. Piştî ku diya Michael wefat kir, wî qerar da ku vegere welatê xwe ku li bavê xwe binêre, û wî jî dest bi kursa Kitêba Pîroz kir. Qismê “Hûr û Kûr Bifikire” yê dersa 27an a kitêba Heta Bi Hetayê Dilşad Be! ser dilê wî tesîr kir. Gava Michael dianî ber çavê xwe ku gava Îsa hat kuştin, Yehowa çi qas xemgîn bû, ew kelegirî bû. Ew ji bo fîdyeyê pir şikirdar bû, û wî dest pê kir ku jiyana xwe biguherîne û paşê vaftîz bû.

ALÎ XWENDEKARÊ XWE BIKE KU EW JI HER TIŞTÎ ZÊDETIR BALA XWE BIDE DAXWAZA YEHOWA

10. Îsa Mesîh çawa alî şagirtên xwe kir ku ew zêdetir bala xwe bidin xizmetê? (Lûqa 5:5-11) (Li resim jî binêre.)

¹⁰ Şagirtên pêşîn zû fehm kir ku Îsa bi rastî jî Mesîhê sozdayî ye, lê ji wan re alîkarî lazim bû ku ew ji tiştên din zêdetir bala xwe bidin xizmetê. Gava Îsa Mesîh gazî Petrûs û Andreas kir ku ew her tim bi wî re bin, ew jixwe şagirtên wî bûn (Meta 4:18, 19). Wisa tê fehmkirin ku wan bi Aqûb û Yûhena re di îşê masîgiriyê de dixebitîn, û îşê wan baş diçû (Marqos 1:16-20). Gava Petrûs û Andreas “torên xwe hiştin” û bi Îsa Mesîh re çûn, wan bi îhtimaleke mezin ji bo debara malbata xwe plan çêkirin. Gelo wan çima êdî ji îşê xwe zêdetir bala xwe da xizmetê? Kitêba Lûqa dibêje ku Îsa Mesîh bi destê mucîzeyekê alî wan kir ku ew bawer bikin ku Yehowa dikare hewcedariyên wan tedarek bike (Lûqa 5:5-11 bixwîne).

11. Tu çawa dikarî alî xwendekarê xwe bikî ku baweriya wî xurttir bibe?

 ¹¹ Em nikarin wek Îsa Mesîh mucîzeyan çêkin, lê em dikarin behsa serpêhatiyên xweş bikin, ên ku nîşan didin ku Yehowa çawa destekê dide kesên ku ji her tiştî zêdetir bala xwe didin daxwaza wî. Mesela, tu dikarî behsa jiyana xwe jî bikî. Gelo tê bîra te ku gava te nû dest bi çûyîna civînan kir, Yehowa çawa alî te kir? Belkî lazim bû ku tu ji patronê xwe re bibêjî ku ji bo ku tu dixwazî herî civînan, tu êdî nikarî heta dereng bixebitî. Nîşanî xwendekarê xwe bide ku gava te qerar dabû ku ji her tiştî zêdetir bala xwe bidî daxwaza Yehowa, te destê Yehowa çawa didît û vê yekê baweriya te çawa xurttir dikir.

12. (a) Wê çima baş be ku em mizgînvanên cuda gazî kursa xwe bikin? (b) Tu çawa dikarî vîdeoyan bi kar bînî? Mîsalekê bide.

¹² Wekî din, wê ji bo xwendekarê te bifeyde be ku ew bibihîze ku xwişk û birayên din di jiyana xwe de çi guhertin kirine, da ku ew bikarin bala xwe bidin daxwaza Yehowa. Loma, xwişk û birayên cuda gazî kursa xwe bike. Bila ew ji xwendekarê te re bibêjin ku ew çawa bûn Şahidên Yehowa û wan çi kir ku ji her tiştî zêdetir bala xwe bidin xizmeta Yehowa. Ji xeynî vê, bi xwendekarê xwe re li vîdeoyên li qismên “Hûr û Kûr Bifikire” û “Zêdetir Hîn Bibe” yên kitêba Heta Bi Hetayê Dilşad Be! temaşe bike. Mesela, gava hûn dersa 37an lêkolîn dikin, tu dikarî bala wî bikişînî ser prensîpên ji vîdeoya Yehowa wê li Me Xwedî Derkeve.

ALÎ XWENDEKARÊ XWE BIKE KU EW LI HEMBERÎ ASTENGAN BI SER BIKEVE

13. Îsa Mesîh şagirtên xwe çawa ji bo muxalefetê hazir kirin?

¹³ Îsa Mesîh çend caran ji şagirtên xwe re got ku ewê rastî muxalefetê bên, heta ji aliyê merivên xwe ve jî (Meta 5:11; 10:22, 36). Berî mirina xwe, Îsa Mesîh ji şagirtên xwe re got ku ew dikarin bên kuştin ji ber ku ew ji Yehowa re îbadetê dikin (Meta 24:9; Yûhena 15:20; 16:2). Loma, lazim bû ku ew bi muxalifan re nekevin minaqeşeyê û bi dîqat xeber bidin û hereket bikin.

14. Em çawa dikarin alî xwendekarên xwe bikin ku ew xwe li hemberî muxalefetê hazir bikin? (2. Tîmotêyos 3:12)

¹⁴ Gerek em xwendekarên xwe ji berê ve ji bo muxalefeta hevalkar, dost û merivên wan hazir bikin (2. Tîmotêyos 3:12 bixwîne). Mesela, dibe ku hin hevalkarên wan qerfên xwe bi wan bikin ji ber ku ew dixwazin li gor Kitêba Pîroz bijîn. Hin kes, heta merivên wan jî, wê belkî baweriya wan rexne bikin. Loma, gerek em zû nîşanî wan bidin ku gava ew rastî muxalefetê bên, ew dikarin çi bikin.

15. Li hemberî muxalefeta malbatê, wê baş be ku xwendekarê te çi bike?

¹⁵ Bila xwendekarê te ji xwe bipirse ka sebebê reaksiyona merivên wî çi ye. Ew belkî difikirin ku ew hatiye xapandin, yan belkî li dijî Şahidên Yehowa pêşhukimên wan hene. Hin merivên Îsa Mesîh jî difikirîn ku ew dîn bûye (Marqos 3:21; Yûhena 7:5). Xwendekarê xwe hîn bike ku ew sebra xwe winda neke û bi merivên xwe û kesên din re bi nezaket xeber bide.

16. Gava xwendekarê te behsa rastiyê bike, gerek ew vêya çawa bike?

¹⁶ Eger merivên xwendekarê te li ser tiştên ku ew hîn dibe, pirsan bipirsin jî, wê baş be ku ew her tiştî di derbekê de ji wan re şîrove neke. Eger ew wisa bike, dibe ku merivên wî aciz bin û êdî nexwazin sohbetê bikin. Loma, bila xwendekarê te bi awayekî xweş û kin behsa rastiyê bike û fersendê bihêle ku careke din dîsa  sohbet çêbe (Kolosî 4:6). Belkî ew dikare bala merivên xwe bikişîne ser malpera jw.org. Li wê derê, ew dikarin li gor dilê xwe di heqê Şahidên Yehowa de zêdetir melûmatê bistînin.

17. Tu çawa dikarî xwendekarê xwe perwerde bikî ku ew cewabên xweş bide kesên ku Şahidên Yehowa rind nas nakin? (Li resim jî binêre.)

¹⁷ Nîşanî xwendekarê xwe bide ku ew çawa dikare bi alîkariya melûmata ku li ser jw.org di rêza meqaleyan a bi navê “Pirsên Pir Tên Pirsîn” de tê nîşandayîn, ji bo pirsên meriv û hevalkarên xwe cewabên hêsan hazir bike (2. Tîmotêyos 2:24, 25). Di dawiya her dersê de, li ser qismê “Hinek Wisa Dibêjin” ê kitêba Heta Bi Hetayê Dilşad Be! sohbetê bikin. Ji xwendekarê xwe re bibêje ku bila ew cewaban bi gotinên xwe hazir bike. Eger lazim be, nîşanî wî bide ku ew çawa dikare cewabên xwe bi awayekî zelaltir bîne zimên. Sohbetên wisa wê alî wî bikin ku ew bikare bi piştrastî ji kesên din re zelal bike ku ew çima bi tiştekî bawer dike yan nake.

18. Tu çawa dikarî dilê xwendekarê xwe xurt bikî ku ew mizgîniyê belav bike? (Meta 10:27)

¹⁸ Îsa Mesîh ji şagirtên xwe re gotibû ku gerek ew mizgîniyê bidin mirovan (Meta 10:27 bixwîne). Gava xwendekarek dest bi belavkirina mizgîniyê bike, ewê desteka Yehowa bibîne, û ev yek wê alî wî bike ku ew xwe bispêre Yehowa. Gelo tu çawa dikarî alî xwendekarê xwe bikî ku ew vê yekê ji xwe re bike hedef? Mesela, eger di civata te de bê îlankirin ku kampanyayeke ji bo belavkirina mizgîniyê wê hebe, ji xwendekarê xwe re bibêje ku bila ew bifikire ka ew hazir e ku bibe mizgînvan yan na. Jê re bibêje ku bi gelemperî hêsantir e ku mirov di dema kampanyayan de mizgîniyê belav bike. Wekî din, belkî xwendekarê te dikare dest pê bike ku li ser sehneyê wezîfeyan bistîne. Ev yek wê alî wî bike ku ew baweriya xwe bi zelalî bîne zimên.

BAWERIYA XWE BI XWENDEKARÊ XWE BÎNE

19. Îsa Mesîh çawa baweriya xwe bi şagirtên xwe dianî, û em çawa dikarin mîna wî bikin?

¹⁹ Berî ku Îsa Mesîh vegeriya ezmanan, wî ji şagirtên xwe re got ku ewê dîsa bi wî re bin. Lê belê, wan fehm nedikir ku ev yek tê maneya ku ewê jî herin ezmanan. Şagirtan her çi qas her tişt fehm nedikir jî, Îsa Mesîh bawer bû ku ew ji dil dixwazin li pey wî herin (Yûhena 14:1-5, 8). Wî dizanibû ku ji wan re wext lazim e ku ew hin tiştan fehm bikin – mesela vê yekê  ku ewê herin ezmanan (Yûhena 16:12). Bila em jî bawer bin ku xwendekarên me dixwazin dilê Yehowa şa bikin.

20. Li Malawiyê, xwişkekê çawa baweriya xwe bi xwendekara xwe anî?

²⁰ Em hêviya xwe winda nakin ku xwendekarên me dixwazin ya rast bikin. Mesela, serpêhatiya xwişka me Chifundo, ya ku li Malawiyê dijî, bîne ber çavê xwe. Wê bi jinikeke ciwan a bi navê Alinafe, ya ku Katolîk bû, bi alîkariya kitêba Heta Bi Hetayê Dilşad Be! dest bi kursa Kitêba Pîroz kir. Gava wan dersa 14an xelas kir, Chifundoyê ji xwendekara xwe pirsî ka ew li ser bikaranîna pûtan çi difikire. Alinafe pir aciz bû, û wê got: “Ev yek qerareke şexsî ye!” Chifundo ditirsiya ku ev jinik wê dev ji kursa Kitêba Pîroz berde. Lê belê, wê dev jê berneda. Chifundoyê kursa bi Alinafeyê re bi sebir dewam kir û hêvî kir ku rojekê, ewê vê rastiya muhîm fehm bike. Çend meh bi şûn de, gava wan dersa 34an lêkolîn dikir, Chifundoyê ev pirs xwend: “Heta niha, çi feydeya van tiştên ku tu li ser Yehowa Xwedê û Kitêba Pîroz hîn bûyî, ji bo te heye?” Gelo Alinafeyê çawa cewab da vê pirsê? Chifundo wisa dibêje: “Wê behsa gelek nuqteyên muhîm kir. Mesela, wê got ku Şahidên Yehowa xwe ji tiştên ku Kitêba Pîroz mehkûm dike, dûr digirin.” Piştî vê, pir wext derbas nebû ku Alinafeyê dev ji pûtan berda û vaftîz bû.

21. Em çawa dikarin daxwaza xwendekarên xwe zêde bikin ku ew bibin xizmetkarên Yehowa?

²¹ Em dizanin ku “yê ku mezin dike” Yehowa ye. Lê belê, em jî dikarin alî xwendekarên xwe bikin ku ew bi pêş ve herin (1. Korîntî 3:7). Ne bes e ku em ji wan re hîn bikin ku Xwedê ji wan çi dixwaze. Gerek em alî wan bikin ku ew ji Yehowa hez bikin. Wekî din, gerek em alî wan bikin ku ew ji her tiştî zêdetir bala xwe bidin daxwaza Yehowa û bi vî awayî nîşan bidin ku ew ji wî hez dikin. Ji xeynî vê, gerek em wan hîn bikin ku gava ew rastî tengasiyan tên, ew çawa dikarin xwe bispêrin Yehowa. Gerek em baweriya xwe bi xwendekarên xwe bînin ku ew jî dikarin li gor qanûnên Yehowa bijîn û bibin xizmetkarên wî.