•  Хԝә бьщерʹьбинә

•  Чьма щарна рʹәзилкьрьн керһати йә?

•  Чаԝа һин бьм рʹәзилкьрьне рʹаст ԛәбул кьм?

•  Һьнә щаһьл чь дьбежьн

Щарна һәр кәс жь мә һʹәԝще рʹәзилкьрьн у ширәтед ԝан ә, йед кӧ дькарьн али мә бькьн, ԝәки алийе башда бенә гӧһастьне. Һәла бьфькьрә, ԝәки ԝан дәрәщада тәйе чь бькьра.

1. Дәрсдаре тә дьбежә, ԝәки тә дәрсед хԝә рʹьнд нәкьрийә. Әԝ ширәте дьдә тә: «Тӧ гәрәке рʹьнд хԝә һазьр ки».

   Тӧйе чь бьки?

   1. Гӧһ нәди («Әз бәр чʹәʹве ԝи рʹәш ьм».)

   2. Гӧһ бьди («Әзе әве ширәте һьлдьм һʹәсаб».)

2. Тә отʹаха хԝә дайә һәв, ле дийа тә дьбежә, ԝәки отʹаха тә һәвкʹәти йә.

   Тӧйе чь бьки?

   1. Гӧһ нәди («Әԝ тʹьме рʹази нинә».)

   2. Гӧһ бьди («Мьн дькарьбу һе баш бькьра».))

3. Хушка тәйә бьчʹук дьбежә, ԝәки тӧ тʹьме һьндава ԝеда сәрт и.

   Тӧйе чь бьки?

   1. Гӧһ нәди («Әԝе ида зәйла мьн бьрийә»)

   2. Гӧһ бьди («Рʹасти жи әз гәрәке һе зедә һьндава ԝеда һʹьзкьрьне бьдьмә кʹьфше».)

Сәр һьнә щаһьла дьбежьн «хәйидок», чьмки сәр һәр тьшти, һәла һе бона ширәтәкә бьчʹук жи дьхәйидьн. Тӧ жи йәки ӧса ни? Һәрге бәле, ԝе баш бә тьштәки бьки. Зани чьма? Чьмки чахе тӧ рʹәзилкьрьн у ширәта ԛәбул дьки, әв фәрәсәтәкә ԛимәт ә у дькарә һьм ньһа һьм жи ахьрийеда али тә бькә.

• Чьмки тӧ беԛьсур нини. Кʹьтеба Пироз дьбежә: «Әм һʹәму жи гәләки шашийа дькьн» (Аԛуб 3:2). Ләма жи мә һʹәмуйарʹа ширәт лазьм ьн.

  «Әз тʹьме тиньм бира хԝә, ԝәки һʹәму мәрьв гӧнәкʹар ьн, у шаши пʹара жийина мә нә. Ләма жи гава кәсәк ширәте дьдә мьн, әз сәр хԝә дьхәбьтьм кӧ тьштәки жь ве йәке һин бьм у диса шашийа нәкьм» (Давид).

• Чьмки тӧ тʹьме дькари тьштәки дьһа баш бьки. Кʹьтеба Пироз дьбежә: «Йе сәрԝахт ширәт кә у әԝе һе сәрԝахт бә» (Мәтʹәлок 9:9). Ширәтәкә баш ԝе һьнге тәрʹа керһати бә, гава тӧ ԛәбул ки.

  «Бәре ньһерʹандьна мьн сәр ширәта, нәрʹаст бу. Мьн тʹьре дьхԝазьн мьн ньмьз кьн. Ле ньһа әз гӧһ дьдьмә ширәта у һәла һе жи дьхԝазьм кӧ мьн ширәт кьн, чьмки нета мьн әв ә кӧ тьштәки дьһа баш бькьм» (Селена).

Һәмьки һеса йә ширәта кӧ тә хԝәха хԝәстийә, ԛәбул ки. Ле чәтьн ә ширәта кӧ тӧ һивийе нибуйи, ԛәбул ки. Кәчʹькәкә бь наве Натали, нәʹмәк стандьбу, кʹидәре кӧ чәнд ширәт ԝерʹа һатьбун дайине. Әԝ дьбежә: «Әз әʹщебмайи мам. Мьн чьԛас ԛәԝат дьда хәбате, ле дәԝса рʹазибуне, әз нәһәԛ кьрьм!»

Дьбәк тьштәкә ӧса тʹәви тә жи ԛәԝьмийә. Дәрәщәкә ӧсада ԝе ча рʹаст буйа хԝә бьдьнә кʹьфше?

• Гӧһ бьдә.

  Кʹьтеба Пироз дьбежә: «Йе зьмане хԝә дькарә занә йә у йе бәрбьһер билан ә» (Мәтʹәлок 17:27). Һәрге кәсәк ширәте дьдә тә, рʹьнд гӧһе хԝә бьдә ԝи, сәва кӧ бьн емосийада тьштәки ӧса нәбежи, жь бо чь жи паше пʹошман би!

  «Чахе кәсәк ширәте дьдә мьн, әз дәрберʹа дьхԝазьм хԝә рʹаст дәрхьм. Ле ԝе баш бә ширәте ԛәбул кьм, ԝәки щарәкә дьн шашийа нәкьм» (Сара).

• Дина хԝә бьдә ширәте, нә кӧ ль сәр ԝи мәрьви, кʹижан кӧ ширәте дьдә.

  Дьбәкә щарна дьхԝази хԝәха ширәтәке бьди ԝи мәрьви, кʹижан кӧ тә ширәт дькә. Ле ԝе баш бә гӧһ бьди ширәта Кʹьтеба Пироз: «Бьһистьнеда сәрхԝә бә, ле хәбәрдан у һерск′әтьнеда гьран бә» (Аԛуб 1:19). Гава тә ширәт дькьн, гәләк щар ве йәкеда рʹасти жи һәйә. Һәрге ширәтәк тә хԝәш найе, диса жи пьшт гӧһе хԝәва нәвежә, әве йәке чь кӧ тӧ гәрәке бьбьһейи.

  «Бәре гава де-баве мьн әз ширәт дькьрьм, әз һерс дькʹәтьм у мьн дьгот: ‹Әз заньм!› Мьн фәʹм кьр: һәрге рʹьнд гӧһ бьди ширәта у ԛәбул ки, әв йәк ԝе кʹарәкә мәзьн тәрʹа бинә» (Едуард).

• Ньһерʹандьна рʹаст һьндава хԝәда хԝәйи кә.

  Һәрге кәсәк ширәт дайә тә, әв найе һʹәсабе кӧ тӧ бекер и. Кемасийед мә һʹәмуйа жи һәнә. Һәла һе әв мәрьв жи, кʹижан кӧ ширәте дьдә тә, щарна һʹәԝще рʹәзилкьрьн у ширәте йә. Кʹьтеба Пироз дьбежә: «Ль рʹуйе әʹрде зьламе сальһ тʹӧнәйә кӧ, һәртʹьм ԛәнщийе бькә» (Ԝаиз 7:20).

  «Һәваләкә мьн ширәт да мьн, ле мьн тʹьре әз һʹәԝще ве ширәте нибум. Рʹаст ә мьн рʹазибун жь ԝе хԝәст, кӧ әԝе пе дьле сах һәр тьшт мьнрʹа гот, ле диса жи әз дьлтәнг бум. Ԝәʹдә шунда мьн фәʹм кьр, ԝәки әԝе рʹаст дьгот. Бь сайа ширәта ԝе, мьн тедәрхьст кӧ сәр чь гәрәке бьхәбьтьм, чьмки пешда мьн әԝ кемаси нав хԝәда нәдьдит» (Софиа).

• Нете бьдә пешийа хԝә.

  Кʹьтеба Пирозда те готьне, ԝәки «йе гӧһ дьдә һьлатьне, фьрасәта ԝи зедә дьбә» (Мәтʹәлок 15:5). Һәрге тӧ ширәте ԛәбул ки, тӧйе дәԝса кӧ бьхәйиди, дәстпеки сәр хԝә бьхәбьти. Хԝәрʹа гьрафике саз кә кӧ ча нета хԝә бини сери, у дина хԝә бьде кӧ чаԝа тӧ пешда дьчи.

  «Сәва кӧ ширәта ԛәбул кьн, лазьм ә ньһерʹандьна рʹаст һьндава хԝәда хԝәйи ки. Ӧса тӧйе бькарьби кемасийед хԝә тедәрхи, бахшандьне бьхԝази у хԝә рʹаст ки» (Емма).

Тʹәмамкьрьн: Кʹьтеба Пирозда те готьне: «Чаԝа һʹәсьн бь һʹәсьн те тужкьрьне, ӧса жи мәрьв һʹәсьне һәвале хԝә йә» (Мәтʹәлок 27:17). Ширәт мина һащәта нә кӧ али тә дькьн хԝә алийе башда бьгӧһези. Ԛәбулкьрьна ширәта ԝе кери тә бе чаԝа ньһа ӧса жи чахе тӧ әʹмьрда мәзьн би.