Гӧнә те һʹәсабе һʹәму һәст, фькьр йан кьрен, кӧ пешбәри принсипед Йаһоԝа дәртен. Гӧнә ӧса жи әԝ ә, гава ԛанунед Йаһоԝа дьтʹәрʹьбиньн у тьштед ӧса дькьн, йед кӧ бәр чʹәʹве Хԝәде нәрʹаст ьн (1 Йуһʹәнна 3:4; 5:​17). Жь Кʹьтеба Пироз ӧса жи те кʹьфше, кӧ чахе мәрьв дькарә тьштед рʹаст бькә ле накә, әԝ йәк те һʹәсабе гӧнә (Аԛуб 4:17).

 Зьмане орижиналеда йа Кʹьтеба Пироз, хәбәра гӧнә те һʹәсабе нәгьһижьн нета хԝә йан жи шаш бьн. Мәсәлә, ԝәде Исраела бәре, әскәр ӧса бь һостәти кәвьр давитьн, кӧ тʹӧ кәс жь ԝана «шаш нәдьбу» у рʹастә-рʹаст ԝи щийи дьхьстьн, кʹидәре лазьм бу. Әԝ хәбәр ӧса жи дькарә бе һʹәсабе «гӧнә нәдькьр» (Һʹакьмти 20:16). Ләма жи, гӧнәкьрьн те һʹәсабе шаш бьн, демәк нәгьһижьн ве нете, кӧ пе принсипед Йаһоԝа бьжин.

 Хԝәде Әʹфьрандар ә у тʹәне әԝ дькарә принсип у ԛануна бьдә мәрьва (Әʹйанти 4:​11). Ләма жи әм бона кьред хԝә бәр Хԝәде щабдар ьн (Рʹомайи 14:12).

Гәло әм дькарьн бь тʹәмами хԝә жь гӧнәкьрьне дур бьгьрьн?

 На. Чьмки Кʹьтеба Пироз дьбежә, ԝәки «һʹәмуйа гӧнә кьр у нәгьһиштьнә рʹумәта Хԝәде» (Рʹомайи 3:​23; 1 Пʹадшати 8:46; Ԝаиз 7:​20; 1 Йуһʹәнна 1:8). Гәло чьма?

 Мәрьвед пешьн, Адәм у Һеԝа сәре-серида бегӧнә бун. Чьмки әԝана дьлԛе Хԝәдеда һатьбун әʹфьрандьне у беԛьсур бун (Дәстпебун 1:​27). Ле ахьрийе ԝана гӧрʹа Йаһоԝа нәкьр у беԛьсуртийа хԝә ӧнда кьр (Дәстпебун 3:​5, 6, 17-​19). Чахе зарʹ ԝанрʹа һатьн буйине, гӧнә у ԛьсуртийа ԝан дәрбази сәр зарʹед ԝан бу жи (Рʹомайи 5:​12). Ләма жи Даԝьд Пʹадша гот, ԝәки әз жи «нәһәԛийева дьне кʹәтьмә» (Зәбур 51:5).

Гәло һʹәму гӧнә мина һәв гьран ьн?

 На. Мәсәлә, Кʹьтеба Пирозда те готьне, ԝәки мәрьвед жь Содоме «гәләки хьраб у гӧнәкʹар бун» у гӧнед ԝан «гәләки гьран» бун (Дәстпебун 13:13; 18:20). Ԝәрен әм се дәрәща шеԝьр кьн у бьньһерʹьн һәла чь щурʹә гӧнә һәнә.

1.   Гӧнед гьран. Кʹьтеба Пирозда те готьне, ԝәки әм гәрәке хԝә дур бьгьрьн жь гӧнед ӧса гьран ча бенамуси, пʹутпʹарьсти, дьзи, сәрхԝәши, ԛачахти, кӧштьн у сербази (1 Корьнтʹи 6:​9-​11; Әʹйанти 21:8). Мәсәлә, Кʹьтеба Пироз щӧдәбун дькә ортʹа гӧнед гьран у ԝе йәке чахе тӧ беһʹәмде хԝә бь хәбәр йан кьред хԝә дьле кәсәки дешини (Мәтʹәлок 12:18; Әфәси 4:​31, 32). Ле диса жи Кʹьтеба Пироз һелан дькә кӧ гӧнед нә гьран жи пьшт гӧһе хԝәва нәвежьн, чьмки гӧнед бьчʹук дьбьнә бәрбь гӧнед мәзьн (Мәтта 5:​27, 28).

2.   Нет. Мәрьв щарна гӧна жь бо ве йәке дькьн, чьмки дәрһәԛа принсипед Хԝәде ньзаньн (Кʹаред Шандийа 17:30; 1 Тимотʹейо 1:​13). Рʹаст ә гӧнед бьчʹук жь гӧнед гьран щӧдә дьбьн, ле диса жи Кʹьтеба Пироз тʹӧ гӧнә ԛәбул накә. Ле гӧнед кӧ мәрьв һʹәмде хԝә дькьн, жь дьлед хьраб тен (Йерәмйа 16:12).

3.   Гӧнед кӧ гәләк щар тенә кьрьне. Кʹьтеба Пироз ӧса жи щӧдә дькә, гӧне кӧ щарәки һатьбу кьрьне у гӧне кӧ гәләк щар тенә кьрьне (1 Йуһʹәнна 3:​4-8). Мәрьве кӧ занә бәр чʹәʹве Хԝәде чь рʹаст ә, ле диса жи «бь һʹәмде хԝә нава гӧнада» дьминә, Хԝәде ԝе ԝи мәрьви сущдар кә (Ибрани 10:26, 27).

 Мәрьвед кӧ гӧнед гьран кьрьнә, дькарьн рʹьһʹәтийа дьл ӧнда кьн. Мәсәлә, Даԝьд Пʹадша гьлийед ӧса ньвиси: «Чьмки нәһәԛийед мьн жь сәре мьн бьльндтьр бунә, мина баре гьран әԝ ль сәр мьн гьран бунә» (Зәбур 38:4). Кʹьтеба Пироз һевийе дьдә мә: «Бьла кәсе хәраб дәв жь рʹийа хԝә, бьла кәсе нәһәԛ дәв жь фькред хԝә бәрʹдә. Бьла әԝ ль Хӧдан вәгәрʹьн кӧ әԝ ль ԝан бе рʹәʹһме. Бьла әԝ ль Хԝәдайе мә вәгәрʹьн, чьмки ԝе бь зедәбари бьбәхьшинә» (Ишайа 55:7, ИМ).