Мәсиһи баԝәр дькьн, кӧ Иса Мәсиһ сәва гӧне тʹәмамийа инсанәте әʹмьре хԝә да (1 Пәтрус 3:18). Ле сәва кӧ әм хьлаз бьн, бәс нинә тʹәне баԝәрийа хԝә Иса биньн ча Хьлазкʹар. Мәсәлә, щьн жи баԝәр дькьн кӧ Иса «Кӧрʹе Хԝәде» йә, ле әԝана ԝе хьлаз нәбьн (Луԛа 4:41; Щьһуда 6).

•  Чь лазьм ә бькьн ԝәки хьлаз бьн?

•  Гәло «Дӧайе Мәрьве Гӧнәкʹар» дькарә әԝ хьлаз кә?

•  «Дӧайе Мәрьве Гӧнәкʹар» ча пешда һат?

• Гәрәке баԝәр кьн, ԝәки Иса бона гӧне мә әʹмьре хԝә кьрә ԛӧрбан (Кʹаред Шандийа 16:30, 31; 1 Йуһʹәнна 2:2). Әв те һʹәсабе баԝәр кьн, кӧ Иса кәсе реали бу у чь кӧ Кʹьтеба Пирозда дәрһәԛа ԝи ньвисийә, һәр тьшт рʹаст ә.

• Гәрәке бьзаньбьн, кӧ бь рʹасти Кʹьтеба Пироз чь һин дькә (2 Тимотʹейо 3:15). Кʹьтеба Пирозда ньвисийә, кӧ Паԝлосе шанди у Силас мәрьвәки гьртирʹа готьн: «Баԝәрийа хԝә Хӧдан Иса бинә, те ... хьлаз би». Паши ве йәке, ԝана «хәбәра Йаһоԝа»  a ԝирʹа шьровәкьрьн (Кʹаред Шандийа 16:31, 32, ДТʹ). Әв те һʹәсабе, кӧ әв гьрти сәва кӧ баԝәрийа хԝә Иса бьанийа, гәрәке рʹастийед сәрәкә жь Хәбәра Хԝәде фәʹм кьра у занәбуна рʹаст бьстанда (1 Тимотʹейо 2:3, 4).

• Гәрәке гӧне хԝә тʹобә кьн (Кʹаред Шандийа 3:19). Әв те һʹәсабе кӧ пʹошман бьн бона фькьр у кьред хԝәйә хьраб. Тʹобәкьрьн ве йәкеда әʹйан дьбә, гава мәрьв кьред хԝәйә хьраб, йед кӧ Хԝәде хԝәш найен, дьһельн у дәстпедькьн «кьред ԛәнщ бькьн, ԝәки бе кʹьфше әԝ жь гӧнәкьрьне вәгәрʹийанә» (Кʹаред Шандийа 26:20).

• Гәрәке бенә ньхӧмандьне (Мәтта 28:19). Иса гот кӧ һәр кәсе кӧ дьхԝазә бьбә шагьрте ԝи гәрәке бе ньхӧмандьне. Әԝ гьрти бәʹса кʹижани мә жоре кьр, һатә ньхӧмандьне (Кʹаред Шандийа 16:33). Ӧса жи паши ве йәкә гава Пәтрусе шанди бәр әʹлаләте дәрһәԛа Иса хәбәр да, «әԝед кӧ хәбәред ԝи ԛәбул кьрьн, пе аве һатьнә ньхӧмандьне» (Кʹаред Шандийа 2:40, 41).

• Гәрәке гӧһдарийа тʹәмийед Иса бькьн (Ибрани 5:9). Шагьртед Иса гәрәке һәр тʹәмийед ԝи биньн сери (Мәтта 28:20). Әԝана гәрәке пе готьн у кьред хԝә «хәбәре бьԛәдиньн, нә кӧ тʹәне бьбьһен» (Аԛуб 1:22).

• Гәрәке һʹәта хьлазийе тәйах кьн (Марԛос 13:13). Сәва кӧ хьлаз бьн шагьртед Исарʹа «сәбьр лазьм ә» (Ибрани 10:36). Паԝлосе шанди ве йәкеда мәсәләкә баш мәрʹа һишт. Әԝи гӧрʹа тʹәмийед Иса дькьр у бь тʹәмами Хԝәдерʹа амьн ма. Паԝлос жь ве рʹожа кӧ бу шагьрте Иса, һʹәта мьрьна хԝә бь сәбьр хԝә ль ве рʹе дьгьрт (1 Корьнтʹи 9:27).

Һьнә религийада дӧайед мәхсус һәнә, мәсәлә «Дӧайе Мәрьве Гӧнәкʹар» у «Дӧайе бона Хьлазкьрьне». Ван дӧада мәрьв гӧне хԝә дьдьн рʹуйе хԝә, у баԝәрийа хԝә әʹйан дькьн, кӧ Иса сәва гӧнед ԝан мьр. Әԝана ӧса жи жь Иса лава дькьн кӧ әԝ бькʹәвә дьле ԝан йане жийина ԝан. Ле Кʹьтеба Пирозда дӧайед ӧса тʹӧнә нә, у теда найе готьне кӧ бь әзбәри дӧа бькьн, йан жи тʹьме дӧаки бьдьнә хәбате.

Һьнә мәрьв баԝәр дькьн кӧ «Дӧайе Мәрьве Гӧнәкʹар» дькарә әԝ хьлаз кә. Ле бь рʹасти хԝәха дӧа нькарә мәрьва хьлаз кә, чьмки мәрьве гӧнәкʹар тʹьме гӧна дькә (1 Йуһʹәнна 1:8). Ләма жи Иса шагьртед хԝә һин дькьр кӧ тʹьме бона бахшандьна гӧна дӧа бькьн (Луԛа 11:2, 4). Хенщи ве йәке, һьнә Мәсиһийед ԛьрʹна йәке мәщала жийина һʹәта-һʹәтайе ӧнда кьрьн, чьмки пьшта хԝә данә Хԝәде (Ибрани 6:4-6; 2 Пәтрус 2:20, 21).

Дәрһәԛа ве йәке фькьред тʹәрихзана жь һәв щӧдә дьбьн. Һьнәк жь ԝан дьфькьрьн, ԝәки ԛәйде ве дӧайе жь һена Реформасийе пешда һатийә. Ле йед дьн дьфькьрьн кӧ әв жь ԛьрʹнед XVIII—XIX-да пешда һат, чахе религийа һинкьрьнед тʹәзә пешда дьанин. Чь жи һәбә әв ԛәйд нә ль сәр һʹиме Кʹьтеба Пироз ә, у һәла һе мьԛабьли һинкьрьнед ве йә жи.