Әм Биранина Мьрьна Иса Мәсиһ, демәк «шива Хӧдан» ль гора рʹебәрийа Кʹьтеба Пироз дәрбаз дькьн (1 Корьнтʹи 11:20). Ле гәләк религийа әве щәжьне нә ль гора Кʹьтеба Пироз, ле ль гора әʹрф-әʹдәтед хԝә дәрбаз дькьн.

 Нета дәрбазкьрьна Шива Хӧдан әԝ ә, ԝәки әм Иса Мәсиһ биньн бира хԝә у шекьрдарийа хԝә бона ԛӧрбанбуна ԝи бьдьнә кʹьфше (Мәтта 20:28; 1 Корьнтʹи 11:24). Пе дәрбазкьрьна шива Хӧдан, гӧнед мә найенә бахшандьне. Кʹьтеба Пироз дьбежә, ԝәки гӧнед мә нә кӧ бь дәрбазкьрьна щәжьнәкә религи тенә бахшандьне, ле бь сайа баԝәрийа мә һьндава Иса Мәсиһ (Рʹомайи 3:25; 1 Йуһʹәнна 2:1, 2).

 Иса Мәсиһ тʹәми да шагьртед хԝә, ԝәки әв Шива Хӧдан дәрбаз кьн. Ле әԝи рʹастә-рʹаст нәгот чәнд щара дәрбаз кьн (Луԛа 22:19). Һьнәка тʹьре гәрәке әве щәжьне һәр мәһ, йан һәр һʹәфте, һәр рʹож, йан жи чьԛас дьхԝазьн һаԛас щар дәрбаз кьн. Ле лазьм ә чәнд тьшта һьлдьн һʹәсаб.

 Иса Мәсиһ Шива Хӧдан, рʹожа Щәжьна Дәрбазбуне дәрбаз кьр, у һьнә ԝәʹдә шунда, һәма ве рʹоже әԝ мьр (Мәтта 26:1, 2). Әв йәк тьштәки ньшкева нибу. Кʹьтеба Пироз ԛӧрбанбуна Иса Мәсиһ бәрамбәри бәрхе Щәжьна Дәрбазбуне дькә (1 Корьнтʹи 5:7, 8). Щәжьна Дәрбазбуне сале щарәке дьһатә дәрбазкьрьне (Дәркʹәтьн 12:1-6; Ԛануна Кʹаһинтийе 23:5). Мәсиһийед ԛьрʹна йәке жи Биранина Мьрьна Иса Мәсиһ сале щарәке дәрбаз дькьрьн. a Шәʹдед Йаһоԝа жи пәй ви ԛәйдәйи дьчьн, йа кӧ сәр һʹиме Кʹьтеба Пироз ә.

 Ԛәйде кӧ Иса Мәсиһ данибу, ӧса жи али мә дькә, ԝәки фәʹм бькьн кӧ Евара Биранине чь чах дәрбаз кьн. Иса әв щәжьн ль гора салнәмайа һивейә Кʹьтеба Пироз, 14 Нисане, сала 33 Д.М.-да чахе рʹож чу ава, дәрбаз кьр (Мәтта 26:18-20, 26). Шәʹдед Йаһоԝа жи мина Мәсиһийед пешьн, Биранина Мьрьна Мәсиһ һәр сал ве рʹоже дәрбаз дькьн. b

 Сала 33 Д.М., 14 Нисане рʹожа Инийе бу. Һәр сал әв рʹож дькарә бькʹәвә щурʹә-щурʹә рʹожед һʹәфтийе. Сәва кӧ тедәрхьн кʹижан рʹож дькʹәвә 14 Нисане, әм нә кӧ пәй метода Щьһуйед модерн дьчьн, ле пәй метода кӧ ԝәʹде Исада дьданә хәбате. c

 Бона ве щәжьне Иса Мәсиһ нане бе һәвиртьрʹшк у шәрава сор, кʹижан кӧ бәр Щәжьна Дәрбазбуне мабу, да хәбате (Мәтта 26:26-28). Мина Иса, Шәʹдед Йаһоԝа жи нане бе һәвиртьрʹшк у бе тьштәки дьн дьдьнә хәбате. Ӧса жи шәрава сор дьдьнә хәбате, нав кʹижанеда шәкьр йан жи бьһарәт тʹӧнә нә.

 Һьнә религийа нане бь һәвиртьрʹшк дьдьнә хәбате, ле Кʹьтеба Пирозда хәбәра һәвиртьрʹшк гәләк щар те хәбьтандьне ча симбола гӧнә у хьрабийе (Луԛа 12:1; 1 Корьнтʹи 5:6-8; Галати 5:7-9). Ләма жи нане бе һәвиртьрʹшк у бе бьһарәт, дькарә бе һʹәсабе бәдәна Исайә бе гӧнә (1 Пәтрус 2:22). Һьнә дерада дәԝса шәраве дьдьнә хәбате ньша тьрийа, чьмки әԝана ичʹке ԛәдәхә дькьн, ле әв йәк сәр һʹиме Кʹьтеба Пироз нинә (1 Тимотʹейо 5:23).

 Нане бе һәвиртьрʹшк у шәрава сор, кӧ ԝәʹде Евара Биранине дьдьнә хәбате, симбола бәдән у хуна Иса нә. Һьнә мәрьв дьфькьрьн ԝәки нан у шәрав бь кʹәрәмәти дьбьнә бәдән у хуна Иса Мәсиһ. Ле ԝәрә әм бьньһерʹьн, кʹа Кʹьтеба Пироз дәрһәԛа ве йәке чь дьбежә.

•   Һәрге Иса тʹәми бьда шагьртед хԝә, ԝәки хуна ԝи вәхԝарана, әв ԝе бьһата һʹәсабе, кӧ әԝ ԝана һелан дькә ԛануна Хԝәдейә дәрһәԛа хәбьтандьна хуне, бьтʹәрʹьбиньн (Дәстпебун 9:4; Кʹаред Шандийа 15:28, 29). Ле Иса ԝе тʹӧ щар кәсәкирʹа нәгота, ԝәки ԛануна Хԝәдейә дәрһәԛа пирозийа хуне бьтʹәрʹьбиньн (Йуһʹәнна 8:28, 29).

•   Һәрге шанди бь рʹасти хуна Иса Мәсиһ вәхԝарана, әԝи ԝе нәгота ԝана, кӧ хуна ԝи ԝе бе «рʹетьне». Әв гьлийе Иса дьда кʹьфше, ԝәки әԝ һе нәбьбу ԛӧрбан, ле гәрәке бьбуйа (Мәтта 26:28).

•   Ԛӧрбанбуна Иса тʹәне «щарәке бона һәр тʹьм» һатә дайине (Ибрани 9:25, 26). Һәрге ԝәʹде Шива Хӧдан нан у шәрав бь рʹасти бьбуна бәдән у хун, ӧса дәрдькʹәт ԝәки әԝед кӧ жь ԝан симбола дьхԝьн у вәдьхԝьн, гәләк щар Иса дькьнә ԛӧрбан.

•   Иса гот: «Ве йәке бона биранина мьн бькьн», нә кӧ «бона ԛӧрбанкьрьна мьн ве бькьн» (1 Корьнтʹи 11:24).

 Әԝед кӧ баԝәр дькьн, ԝәки нан у шәрав рʹастә-рʹаст дьбьн бәдән у хуна Иса, әв ньһерʹандьна хԝә сәр һʹиме һьнә рʹезед Кʹьтеба Пироз һʹимли дькьн. Мәсәлә гәләк ԝәлгәрʹандьнед Кʹьтеба Пирозда, гьлийе Иса дәрһәԛа шәраве ӧса һатьнә ньвисаре: «Әва хуна мьн ә» (Мәтта 26:28). Ле гьлийе Иса дькарьн ӧса жи ԝәлгәрʹиньн: «Әва те һʹәсабе хуна мьн». d Чахе Иса мәрьв һин дькьрьн, гәләк щар мәсәлед симболик дьда хәбате (Мәтта 13:34, 35).

 Чахе Шәʹдед Йаһоԝа Шива Хӧдан дәрбаз дькьн, тʹәне һьнә мәрьв жь симбола дьхԝьн у вәдьхԝьн. Гәло чьма?

 Ль сәр һʹиме хуна Иса Мәсиһ кӧ һатьбу рʹетьне, «Пәймана Ну» һатә гьредане, кʹижан кӧ кʹәтә дәԝса ԝе пәймане, йа кӧ ортʹа Йаһоԝа у мьләте Исраелда һатьбу гьредане (Ибрани 8:10-13). Сәр Евара Биранине жь ԝан симбола дькарьн бьхԝьн у вәхԝьн тʹәне әԝ кәс, тʹәви кʹижана әв пәймана ну һатә гьредане. Һʹәму Мәсиһи накʹәвьнә нава ԝан кәса, ле тʹәне «йед газикьри» (Ибрани 9:15; Луԛа 22:20). Әԝана ԝе ль әʹзмана тʹәви Иса Мәсиһ сәрԝертийе бькьн. Кʹьтеба Пироз дьбежә, ԝәки тʹәне 144 000 мәрьв ԝе әви ԛәдьри бьстиньн (Луԛа 22:28-30; Әʹйанти 5:9, 10; 14:1, 3).

 Әԝед кӧ ԝе тʹәви Иса ль әʹзмен сәрԝертийе бькьн, сәр ԝан те готьне «кәрийе пези бьчʹук». Ле әԝед кӧ ԝе сәр әʹрде һʹәта-һʹәтайе бьжин тенә навкьрьне «әʹлаләтәкә . . . мәзьн» (Луԛа 12:32; Әʹйанти 7:9, 10). Әԝед кӧ һивийа жийина сәр әʹрде нә, жь симбола нахԝьн у вәнахԝьн. Ле әԝана бь һатьна хԝә сәр Евара Биранине, дьдьнә кʹьфше ԝәки ԛӧрбанбуна Иса Мәсиһ дьшекьриньн (1 Йуһʹәнна 2:2).