Кәсәки пьштева хԝә авитә сәр Анете, гава ле авитьнә әʹрде, Анете паше фәʹм кьр чь дьԛәԝьмә. Әԝ дьбежә: «Мьн һәр тьшт дькьр сәва кӧ хԝә жь дәсте ԝи хьлаз кьм, мьн дькьрә ԛарә-ԛар, ле дәнге мьн ӧнда бу, мьн пе кʹӧлма ԝи дьхьст, ԝи дәʹф дьда у дьһʹәрьшанд. Паши ԝе йәке мьн тʹәхмин кьр ча әԝи кʹер дәрхьст у незики мьн кьр, у мьн ида тʹӧ тьшт нькарьбу бькьра».

Һәрге тӧ ԝе дәрәщеда буйайи, тәйе чь бькьра?

Дьԛәԝьмә тӧ фәсал и, гава еваре рʹекә хьлә-валирʹа дьчи, ле диса жи тӧ дькари рʹасти дәрәщәкә нәбаш бейи. Кʹьтеба Пирозда те готьне: «Пешбази нә бона мьровед кӧ льнгед ԝан ләз ьн . . . нә бона зьламед бь занин ьн; жь бәр кӧ ԝәхт у дӧһәм пергинийа вана һәмуйан дькьн» (Ԝаиз 9:11).

Һьнә щаһьл, мина Анете зийан стандьнә жь мәрьвед нәнас. Ле һәнә йед ӧса кӧ зийан стандьнә жь мәрьвед нас, йан жь нәфәред мала хԝә. Мәсәлә, гава Натали 10 сали бу, гәде щаһьл йе кӧ пешбәри мала ԝе дьжит, ле хьраб кьр. Әԝ гьли дькә: «Әз ӧса дьтьрсийам у шәрм дькьр, ԝәки сәрида мьн тʹӧ кәсирʹа тьштәк гьли нәдькьр».

Анет һʹәта ньһа хԝә нәһәԛ дькә сәва ԝе йәке кӧ чь ԛәԝьми. Әԝ дьбежә: «Әз һәр гав тиньм бира хԝә ԝе йәке, чь кӧ ԝе шәве ԛәԝьми. Әз дьфькьрьм, ԝәки мьн дьһа зедә ԛәԝат гәрәке бьда хәбате, сәва кӧ жь ԝи хьлаз бума. Ле паши ԝе йәке, ча әԝи кʹер дәрхьст, әз тьрсийам у мьн ида тьштәк нәкьр, йазьх ле мьн гәрәке тьштәк бькьра».

Натали жи хԝә нәһәԛ дькә. Әԝ дьбежә: «Әз гәләк йәкә дьле хԝә сах ьм, һәр тьшти зу баԝәр дькьм. Де-баве мьн дьготьнә мьн у хушка мьн, ԝәки гава әм дәрва дьлизьн, жь һәв дур нәчьн, ле мьн гӧрʹа ԝан нәкьр. Ӧса ԛәԝьми, ԝәки әз хԝәха бумә сәбәбе кӧл-дәрде хԝә, чьмки мьн мәщале да щинарʹе хԝә дәст бавежә мьн. Әԝ чь кӧ һатә сәре мьн, бу дәрдәки гьран бона нәфәред мала мьн. Әз хԝә нәһәԛ дькьм у нькарьм бир кьм дәрһәԛа ԝе йәке».

Һәрге әԝ чь кӧ Анет у Натали дьбежьн бона тә нас ә, бир нәкә, нәһәԛийа тә ԝе йәкеда тʹӧнә, тӧ жи мина ԝан нә бь хԝәстьна хԝә рʹасти ԝе дәрәще һати. Ле һьнәк ӧса дьбежьн, ԝәки бона мера кьред ӧса нормал ә у әԝ кәчʹьк хԝәха нәһәԛ ьн. Ле бь рʹасти әԝ готьн ԝана һәԛ дәрнахә, чьмки тʹӧ мәрьвәк һежа нинә, ԝәки һьндава ԝи зорбәтийа ԝи щурʹәйи бькьн. Һәрге тӧ рʹасти зӧлмийа ӧса һати, әԝ йәк найе һʹәсабе, ԝәки тӧ нәһәԛ и!

Рʹаст ә һеса йә бежи, «тӧ нәһәԛ нини», ле дькарә чәтьн бә баԝәрийа хԝә ԝе йәке бини. Һьнә мәрьв тʹӧ кәсирʹа гьли накьн дәрһәԛа ԝе йәке, чь һатә сәре ԝан у хԝәда хԝә дьхԝьн. Ле бь ԝе йәке әԝана кьред ԝи мәрьве зӧлм вәдьшерьн. Ләма ԝе баш бә щурʹәки дьн хԝә бьди кʹьфше.

Кʹьтеба Пирозда те готьне, ԝәки чахе Ибо рʹасти ԛәзийе һат, әԝи гот: «Бь еша щане хԝәва дьбежьм» (Ибо 10:1). Чʹәʹв бьдә мәсәла Ибо. Дьле хԝә ԝи мәрьвирʹа вәкә, кʹижанида тӧ баԝәр и. Әԝ йәк ԝе али тә бькә еша дьле хԝә бьтәмьрини.

Анет дькарә ԛайил бә тʹәви ԝан готьна. Әԝ дьбежә: «Мьн дьле хԝә һәвала хԝәйә незикрʹа вәкьр у әԝе мьн һелан кьр, тʹәви рʹуспийа хәбәр дьм. Әз ша мә, ԝәки мьн гӧрʹа ԝе кьр. Рʹуспи гәләк щар тʹәви мьн хәбәр дьдан у әԝана һәма әԝ дьготьнә мьн, чь кӧ мьнрʹа лазьм бу. Ԝана дьготьнә мьн, ԝәки әз нәһәԛ ниньм ԝе йәкеда, чь кӧ һатә сәре мьн».

Наталийе дьле хԝә де-баве хԝәрʹа вәкьр. Әԝ дьбежә: «Әԝана гәләк пьштгьрийа мьн дькьрьн. Ӧса жи готьнә мьн, ԝәки әз дькарьм нәтьрсьм у һәр тьшти ԝанарʹа гьли кьм. Әԝе йәке али мьн кьр, нәбьмә йәкә зӧлм у нәкʹәвьмә депресийайе».

Наталийе ӧса жи дьлбини жь дӧакьрьне станд. Әԝ дьбежә: «Чахе мьн тʹәви Хԝәде хәбәр дьда, әԝе йәке али мьн дькьр, илаһи ԝи чахи гава мьнрʹа чәтьн бу дьле хԝә мәрьварʹа вәкьм. Дӧакьрьнеда мьн аза дькарьбу дәрһәԛа һәр тьшти хәбәр дьм. Чахе мьн дӧа дькьр, дьле мьн бь әʹдьлайе тʹьжә дьбу».

Тӧ жи дькари ԝе йәкеда избат би, ԝәки «ԝәхта авакьрьне һәйә» (Ԝаиз 3:3). Хәм бькә бона сьһʹәт-ԛәԝата хԝәйә физики у емосийали. Ԝәʹдә ԝәԛәтинә бона һесабуне. Йа лапә фәрз, итʹбарийа хԝә Йаһоԝа, Хԝәдайе дьлбинийе бинә (2 Корьнтʹи 1:3, 4).

Һәрге тӧ кәчʹьк и у дьлкʹәтийе тә, тә һелан дькә, ԝәки тӧ кьред нәрʹаст бьки, нәтьрсә у бежә: «Мьн бьһʹәԝә!» йан «Дәсте хԝә нәдә мьн». Нәтьрсә, ԝәки тӧйе дьлкʹәтийе хԝә ӧнда ки. Һәрге әԝ пәй ԝе йәкерʹа тә бьһелә у һәрʹә, демәк әԝ лайиԛи тә нинә! Тӧ һежайи йәки баш и, кʹе ԝе бь рʹасти ԛәдьре тә бьгьрә у ньһерʹандьна тә һʹьлдә һʹәсаб.

«Мәкʹтәбеда, гәда дәсте хԝә давитьнә бәне липчике мьн у мьнрʹа гьлийед хьраб дьготьн, мәсәлә ԝана дьгот, ԝәки ԝе мьн хԝәш бьһата, һәрге мьн сәре хԝә ԝанарʹа данийа» (Карета).

Бь ньһерʹандьна тә, ԝан гәда:

1. А. Һʹәнәк дькьрьн?

2. Б. Дькʹәтьнә флирте?

3. В. Зорбәтийа сексуали дьданә кʹьфше?

«Отобуседа, гәдәки дәстпекьр мьнрʹа гьлийед хьраб бежә у хԝәст мьн һʹәмез кә. Мьн дәсте ԝи дур хьст у готе, ԝәки әԝ дур кʹәвә жь мьн. Әԝи ӧса сәр мьн ньһерʹи те бежи әз дин ьм» (Кендис).

Чаԝа тӧ дьшьрмиш дьби, әԝ гәдә:

1. А. Һʹәнәк дькьр?

2. Б. Дькʹәтә флирте?

3. В. Зорбәтийа сексуали дьда кʹьфше?

«Саләк пешда, гәдәки тʹьме мьнрʹа дьгот, ԝәки әз ԝи хԝәш тем у әԝ дьхԝазә, ԝәки әм рʹасти һәв бен, ле мьн ԝирʹа дьгот на. Щарна әԝи дәсте хԝә дьда дәсте мьн. Мьн ԝирʹа дьгот кӧ әԝ мьн бьһʹәԝә, ле әԝи жь мьн нәдьһʹәԝийа. Рʹожәке, чахе мьн хԝә ԛуз кьр, ԝәки соле хԝә пʹәв хьм, әԝи дәсте хԝә авитә щийе рʹуньштандьна мьн» (Бетани).

Бь тʹәхмина тә, әԝ гәдә:

1. А. Һʹәнәк дькьр?

2. Б. Дькʹәтә флирте?

3. В. Зорбәтийа сексуали дьда кʹьфше?

Щаба рʹаст сәр һәрсе пьрса В йә.

Зорбәтийа сексуали чь щурʹәйи щӧдә дьбә жь флирте йан һʹәнәка?

Зорбәтийа сексуали тʹәне йәке хԝәш те. У әԝ мәрьве зорбә сәр йа хԝә дьсәкьнә, һәла һе ԝи чахи жи гава йе дьн нахԝазә.

Зӧлмийа ԝи щурʹәйи гәләк хоф ә, чьмки ахьрийе мәрьв дькарә зоре дәст бавежә кәсәки у хьрабийе бькә.