Кʹьтеба Пироз Жийина Мәрьва Дьгӧһезә

ЧЬРʹА кʹӧлфәтәкә 60 сали тʹәрка пʹутпʹарьстийе да? Чь кʹәшишәки һелан кьр ԛӧльхийа хԝә бьһелә у бьбә Шәʹде Йаһоԝа? Чаԝа кʹӧлфәтәк, де-баве кʹижане жь буйина ԝеда ле һиштьбун, карьбу жь һәсте тʹәнебуне аза бә? Бьхуньн кӧ әԝ мәрьв чь дәрһәԛа хԝә гьли дькьн.

«Ида Пʹута Наһʹәбиньм». АБА ДАНСУ

САЛА БУЙИНЕ: 1938

ԜӘЛАТ: БЕНИН

БӘРЕ: ПʹУТПʹАРЬСТ БУ

ЖИЙИНА МЬНӘ БӘРЕ: Әз һатьмә буйине Со-Чахувида, гӧндәки бәр дәве голе. Гӧнде мәда мәрьв мәʹсийа дьгьрьн, һʹәйԝан хԝәй дькьн, демәк пәз, бьзьн, хьнзир у тәйрәдә. Вьра рʹе тʹӧнәнә у мәрьв бь ԛәйька дьчьнә щийа. Бьнәлийед гӧнде мә һʹәчʹи зәʹф хԝәрʹа мала пе дара у гиһе чедькьн, ле һьнәк жи пе кʹәлпича. Һʹәчʹи зәʹф мәрьв вьра дәсттәнг ьн. Ле диса жи ԛачахти ԝьра ӧса бәлабуйи нинә ча шәһәрада.

Чахе әз һе зарʹо бум, баве мьн әз у хушка мьн шандьнә мәкʹтәбәкә религи, кʹидәре кӧ әм әʹйд-ԛәйдед дине хԝә һин дьбун. Чахе әз мәзьн бум, мьн сафи кьр хӧдан Дудуа (Одудуа) бьһʹәбиньм. Мьләте Йоруба әв хӧдан дьһʹәбандьн. Мьн сәва ԝи зийарәтәк чекьр у һәргав ԝирʹа ԛӧрбан дьанин. Мәсәлә мьн ԝирʹа йамс (мина картоле ширьн), бьзьре дара хӧрме, гӧһшәйтан, мьришк, тәйрәдә, у щурʹә-щурʹә һʹәйԝанед дьн. Әв ԛӧрбанкьрьн сәр мьн гәләк бьһа рʹудьньшт у гәләк щар мьн пʹәре хԝә гьшк сәр ԝан хәрщ дькьр.

ЧАԜА КʹЬТЕБА ПИРОЗ ЖИЙИНА МЬН ГӦҺАСТ: Чахе мьн дәстпекьр Кʹьтеба Пироз һин бьм, әз пеһʹәсийам ԝәки тʹәне Йаһоԝа йә Хԝәдайе рʹаст. Әз ӧса жи пеһʹәсийам, ԝәки ԝи хԝәш найе гава һʹәбандьнеда пʹута дьдьнә хәбате (Дәркʹәтьн 20:4, 5; 1 Корьнтʹи 10:14). Мьн фәʹм кьр ԝәки әз чь гәрәке бькьм. Ләма жи мьн һʹәму тьштед пʹутпʹарьстийева гьредайи авит. Мьн тʹәрка кʹочʹәка, әʹйд-ԛәйдед мьләтийе у әʹрф-әʹдәтед чʹәʹлкьрьна мьрийава гьредайи, да.

Бона мьн, ча кʹӧлфәта 60 сали, һеса нибу гӧһастьнед ԝи щурʹәйи бькьм. Һәвал, мәрьвед мьнә незик у щинаред мьн пәй мьн дькʹәтьн у ԛәрфе хԝә мьн дькьрьн. Ле мьн жь Йаһоԝа лава дькьр, ԝәки ԛәԝате бьдә мьн сәва кӧ ԝе йәке бькьм, чь кӧ бәр чʹәʹве ԝи рʹаст ә. Гьлийе жь Мәтʹәлок 18:10 дьлбини дьда мьн, кʹидәре кӧ ньвисар ә: «Наве Йаһоԝа бьрща ԛәԝи йә, йед һәԛ дьрʹәԝьнә һьндӧрʹ у хьлазбуне дьстиньн, (ДТʹ)».

Диса тьштәк кӧ али мьн кьр әв бу, ԝәки әз дьчумә сәр щьватед Шәʹдед Йаһоԝа. Ԝедәре мьн тʹәхмин кьр чь йә һʹьзкьрьна Мәсиһити у әз һʹәйр-һʹӧжмәкʹар дьмам сәр ԝан мәрьва, чьмки әԝана һәр тьшт дькьрьн сәва кӧ ль гора нормед Кʹьтеба Пироз бьжин. Ԝе йәке чь кӧ мьн дит, әз дамә баԝәркьрьне ԝәки һʹәбандьна Шәʹдед Йаһоԝа рʹаст ә.

ЧЬ КʹАР МЬН СТАНД: Принсипед Кʹьтеба Пироз али мьн кьрьн һәләԛәтийа ортʹа хԝә у зарʹед хԝә баш кьм. Ӧса жи әз тʹәхмин дькьм, ԝәки барәки гьран жь стуйе мьн һатә һьлдане. Бәре мьн һʹәму пʹәре хԝә сәр пʹутед бекер хәрщ дькьр. Ле ньһа әз Йаһоԝа дьһʹәбиньм, кʹижан кӧ ԝе һʹәму чәтьнайед мә бьдә һьлдане (Әʹйанти 21:3, 4). Әз гәләк бәхтәԝар ьм, ԝәки ида сәре хԝә бәр пʹута данайньм, ле Йаһоԝарʹа хьзмәт дькьм! Ньһа әз хԝә бехофийеда у хԝәйкьри тʹәхмин дькьм.

«Мьн Һе Зарʹотийеда Хԝәде Дьгәрʹийа». СИНДЗИ САТО

САЛА БУЙИНЕ: 1951

ԜӘЛАТ: ЖАПОНЙА

БӘРЕ: КʹӘШИШЕ ШИНТО

ЖИЙИНА МЬНӘ БӘРЕ: Әз бажарәки бьчʹукда һәрема Фукуокеда һатьмә буйине. Де-баве мьн баԝәрмәнд бун у жь бьчʹуктайе әз һин дькьрьм, ԝәки хӧданед Шинтойе бьһʹәбиньм. Әз ида жь бьчʹуктайа хԝәда гәләк щар дьфькьрим дәрһәԛа хьлазбуна хԝә. Мьн ӧса жи гәләк дьхԝәст али ԝан мәрийа бькьм, йед кӧ дькʹәтьнә чәтьнайа. Те бира мьн ча щарәке мәкʹтәбеда дәрсдар жь мә пьрси, кӧ чахе әм мәзьн бьн, дьхԝазьн чь пʹешәйи бькьн. Һәвалед мьн дәрһәԛа нетед хԝәйә конкрет дьготьн, мәсәлә кӧ дьхԝазьн бьбьнә зандар. Ле мьн гот, ԝәки дьхԝазьм Хԝәдерʹа хьзмәт кьм. Гьшк сәр мьн кʹәнийан.

Паши хьлазкьрьна мәкʹтәбе, әз кʹәтьмә мәкʹтәба бона дәрсдаред религи. Ԝәʹде һинбуне әз тʹәви кʹәшишәки бумә нас, кʹижан кӧ тʹьме чахе ԝәʹде ԝи һәбу кʹьтебәкә рʹәш дьхԝәнд. Щарәке әԝи жь мьн пьрси: «Сато, тӧ зани әва чь кʹьтеб ә?» Ль гора рʹуйе ве кʹьтебе мьн тедәрхьст әв чь кʹьтеб ә, ләма жи мьн готе: «Кʹьтеба Пироз ә». Һьнге әԝи гот: «Һәр кәсе кӧ дьхԝазә бьбә кʹәшише Шинто, гәрәке әве кʹьтебе бьхунә».

Һьнге әз дәрберʹа чум у мьн Кʹьтеба Пироз кʹьрʹи. Мьн әԝ дани сәр дараке щийе бәрчʹәʹв у тʹьме мьԛат дьбум. Ле ԝәʹде мьн тʹӧнә бу ве кʹьтебе бьхуньм, чьмки дәрсед мьнә мәкʹтәбе зәʹф бун. Чахе мьн һинбуна хԝә хьлаз кьр, мьн дәстпекьр пирозгәһеда ԛӧльх кьм ча кʹәшише Шинто. Ӧса нета мьнә зарʹотийе һатә сери.

Зутьрәке мьн фәʹм кьр, ԝәки ԛӧльхкьрьн пʹарьстгәһеда ӧса нибу, чаԝа кӧ мьн дьда бәр чʹәʹве хԝә. Һʹәчʹи зәʹф жь кʹәшиша ԛә хәм нәдькьрьн бона һʹалхԝәшийа мәрийа. Баԝәрийа һьнәка жи ԛә тʹӧнә бу. Һәла һе жи сәрәккʹаһинәки мьнрʹа гот: «Һәрге дьхԝази вьра пешдачуйи би, тӧ гәрәке тʹәне дәрһәԛа пьрсед философи хәбәр ди. Хәбәрдана дәрһәԛа баԝәрийе ԛәдәхәкьри йә».

Жь бо гьли-готьнед ԝан әз религийа Шинтойида пʹошман бум. Мьн һьм бәрдәԝам дькьр пирозгәһеда ԛӧльх кьм, һьм жи религийед дьн леколин дькьр. Ле тʹӧ религийа дьле мьн нәгьрт у мьнрʹа бекер һатьнә кʹьфше. Чьԛас һе зедә әз дәрһәԛа щурʹә-щурʹә религийа педьһʹәсийам, һаԛас һе зәʹф әз дьлтәнг дьбум. Әз дьфькьрим ԝәки ԛә религийәкә рʹаст тʹӧнә.

ЧАԜА КʹЬТЕБА ПИРОЗ ЖИЙИНА МЬН ГӦҺАСТ: Сала 1988-да Будистәки әз һелан кьрьм Кʹьтеба Пироз бьхуньм. Һатә бира мьн, ԝәки бәре кʹәшише Шинто жи әз ве йәкеда һелан дькьрьм, ләма жи мьн әв ширәт ԛәбул кьр. Әз педа кʹәтьмә нава хԝәндьна Кʹьтеба Пироз. Щарна мьн тʹәмамийа шәве һʹәта бәрбанге дьхԝәнд.

Чь кӧ мьн дьхԝәнд әз һелан дькьрьм, Хԝәдайе Кʹьтеба Пирозрʹа дӧа бькьм. Мьн дәстпекьр дӧайе жь Мәтта 6:9-13 бежьм. Мьн әв дӧа дӧ сьһʹәта щарәке дьԝәкʹьланд, һәла һе ԝәʹде ԛӧльхийа хԝәйә пирозгәһа Шинтойида жи.

Ԝәʹде хԝәндьне гәләк пьрс щәм мьн пешда дьһатьн. Һьнге әз ида зәԝьщи бум. Мьн заньбу ԝәки Шәʹдед Йаһоԝа али мәрийа дькьн, кӧ Кʹьтеба Пироз һин бьн, чьмки әԝана ԝәʹдәки дьһатьнә щәм жьна мьн. Мьн дәстпекьр ԝана бьгәрʹьм у гава рʹасти йәке һатьм, мьн гәләк пьрс данә ԝе. Әз әʹщебмайи мам, кӧ әԝ ча щаба һʹәму пьрсед мьн бь Кʹьтеба Пироз дьдә. Әԝе хәм кьр ԝәки Шәʹдәки Йаһоԝа тʹәви мьн һинбуна Кʹьтеба Пироз дәрбаз кә.

Һьнә ԝәʹдә шунда мьн дәстпекьр һәрʹьм сәр щьватед Шәʹдед Йаһоԝа. Мьн чʹәʹве хԝә баԝәр нәкьр, чахе ԝедәре мьн әԝ мәрьв жи дитьн, һьндава кʹижанада әз бәре гәләк сәрт бум. Ле ԝана бь дьл у щан әз сьлав дькьрьм у дьлгәрмийа хԝә мьнрʹа данә кʹьфше.

Сәр ԝан щьвата әз пеһʹәсийам, ԝәки Хԝәде жь мера дәʹԝа дькә, кӧ һьндава нәфәред хԝәда һʹьзкьрьне у ԛәдьр бьдьнә кʹьфше. Пешийа ԝе йәке мьн һʹьш-аԛьле хԝә педа дьда сәр ԛӧльхийа хԝәйә пирозгәһеда у ԛә дина хԝә нәдьда жьн-зарʹед хԝә. Ле һьнге мьн ида фәʹм кьр, ԝәки рʹаст ә мьн бь дьл у щан гӧһ дьда мәрьвед кӧ дьһатьнә пирозгәһе, ле мьн ԛә щарәке гӧһ нәда гьлийе жьна хԝә.

Ԝәʹде һинбуна Кʹьтеба Пироз әз дәрһәԛа Йаһоԝа гәләк тьшт педьһʹәсийам, чь кӧ дьле мьн дьгьрт у әз гәләк незики ԝи кьрьм. Илаһи гәләк дьле мьн гьрт гьлийе жь Рʹомайи 10:13, кӧ дьбежә: «Кʹи гази наве Хӧдан [Йаһоԝа, ДТʹ] кә, ԝе хьлаз бә». Мьн жь зарʹотийа хԝәда Хԝәде дьгәрʹийа у ахьрийеда мьн әԝ дит!

Мьн ида тʹәхмин дькьр, ԝәки пирозгәһа Шинтойи һеди-һеди бона мьн дьбә щики хәриб. Пешийе әз бәрхԝә дькʹәтьм, кӧ мәрьв ԝе чь бежьн, һәрге әз тʹәрка религийа Шинтойи бьдьм. Ле мьн тʹьме хԝәрʹа дьгот, кӧ һәрге әз Хԝәдайе рʹаст бьвиньм, әзе тʹәрка религийа Шинтойи бьдьм. Ләма жи бьһаре сала 1989-да мьн гӧһ да дәнге исафа хԝә, пирозгәһ һишт у хԝә тʹәсмили Йаһоԝа кьр.

Һеса нибу пирозгәһе бьһельм. Кʹәшишед ԛӧльхийа бьльнд сәр мьн дькьрьнә ԛарʹә-ԛарʹ у һәр тьшт дькьрьн кӧ мьн бьдьнә сәкьнандьне. Ле йа лапә чәтьн бона мьн әԝ бу, кӧ дәрһәԛа сафикьрьна хԝә, мьн гәрәке де-баве хԝәрʹа бьгота. Рʹева чахе әз дьчумә щәм ԝан, әз ӧса бәрхԝә дькʹәтьм кӧ синге мьн ԛайим ешийа у ньге мьн сьст бун! Әз гәләк щар рʹеда дьсәкьним у мьн Йаһоԝарʹа дӧа дькьр кӧ ԛәԝате бьдә мьн.

Чахе әз һатьмә мала де-баве хԝә, мьнрʹа чәтьн бу ԝанарʹа мәʹнийа һатьна хԝә бежьм. Чәнд сьһʹәт дәрбаз бун у ахьрийа-ахьрийе, мьн бь сайа гәләк дӧа дәрһәԛа сафикьрьна хԝә баве хԝәрʹа гьли кьр. Мьн гот, ԝәки әз тʹәрка религийа Шинтойи дьдьм, чьмки мьн Хԝәдайе рʹаст дитийә у дьхԝазьм ԝирʹа хьзмәт кьм. Баве мьн гәләк әʹщебмайи ма у дьлтәнг бу. Малда пьсмамед мәйи дьн жи щьвийан у дәстпекьрьн мьн ширәт кьн кӧ сафикьрьна хԝә бьгӧһезьм. Мьн нәдьхԝәст дьле малбәта хԝә бешиньм, ле мьн заньбу кӧ сафикьрьна мьн рʹаст ә. Ԝәʹдә шунда малбәта мьн һьндава сафикьрьна мьн бь ԛәдьр бу.

Һәмьки һеса нибу жь пирозгәһе дәрем, ле дьһа чәтьн бу ве жь һʹьше хԝә дәрхьм. Жийина кʹәшиши нав мьнда кʹур кʹок дабу. Мьн гәләк ԛәԝат дьда хәбате, сәва кӧ жийина хԝәйә бәре бир кьм, ле һʹәму тьштед дәр-доре мьн, әв жийин дькьрьнә бира мьн.

Дӧ тьшта али мьн кьрьн, кӧ жийина хԝәйә бәре бир кьм. Йа әʹԝльн, мьн малда һʹәму тьштед кӧ религийа Шинтойива гьредайи бун, гәрʹийа, дит у шәԝьтанд. Әԝ бун кʹьтеб, шькьл у һәла һе һәйкәлед бьһа жи. Йа дӧда, мьн һʹәму мәщал дьда хәбате, сәва кӧ һе зедә ԝәʹдә тʹәви Шәʹдед Йаһоԝа дәрбаз кьм. Һәвалти у пьштгьрийа ԝан гәләк али мьн кьрьн. Һеди-һеди жийина мьнә бәре жь һʹьше мьн дәркʹәт.

ЧЬ КʹАР МЬН СТАНД: Бәре мьн ԛә дина хԝә нәдьда жьн у зарʹед хԝә, ләма жи ԝана хԝә тʹәне тʹәхмин дькьр. Ле чахе мьн дәстпекьр тʹәви ԝан һе зедә ԝәʹдә дәрбаз кьм, чаԝа кӧ Кʹьтеба Пироз малхед мале һин дькә, әм гәләк незики һәв бун. Ԝәʹдә шунда жьна мьн жи дәстпекьр Йаһоԝарʹа хьзмәт кә. Иро әз тʹәви жьна хԝә, кӧрʹе хԝә, ԛиза хԝә у зәʹве хԝә, Йаһоԝарʹа хьзмәт дькьм.

Чахе әз тиньм бира хԝә нета хԝәйә зарʹотийе, кӧ мьн чьԛас дьхԝәст Хԝәдерʹа хьзмәт кьра у али мәрийа бькьра, гәләк ша дьбьм кӧ әв нет һатә сери. Бь гьлийа чәтьн ә әʹйан кьм, кӧ әз чьԛас жь Йаһоԝа рʹази мә.

«Мьн Тʹәхмин Дькьр, кӧ Әʹмьре Мьнда Тьштәк Кем ә». ЛИНЕТ ХОКТИНГ

САЛА БУЙИНЕ: 1958

ԜӘЛАТ: АФРИКАЙА БАШУРЕ

БӘРЕ: ХԜӘ НӘЛАЗЬМ ТʹӘХМИН ДЬКЬР

ЖИЙИНА МЬНӘ БӘРЕ: Әз һатьмә буйине шәһәрәки әʹдьлда, Щермистонеда, кʹидәре кӧ мәрьвед дәсттәнг дьжитьн. Де-баве мьн фәʹм кьрьн, кӧ ԝе нькарьбьн мьн хԝәй кьн, ләма жи әз дамә мәрьвед дьн. Әз 14 рʹожи бум, чахе жьн-мерәки әз һьлдам у бь һʹьзкьрьн мәзьн дькьрьм. Мьн әԝана де-баве хԝә һʹәсаб дькьрьн. Ле чахе әз дәрһәԛа хԝә рʹастийе пеһʹәсийам, мьн хԝә нәлазьм тʹәхмин кьр. Мьн хԝә ӧса тʹәхмин кьр, кӧ әз нава демарʹи у зьрʹбаве хԝәда хәриб ьм у ԝәки әԝана бь рʹасти мьн фәʹм накьн.

Чахе әз бумә ԝәкә 16 сали, мьн дәстпекьр һәрʹьмә бара, кʹидәре кӧ мьн тʹәви һәвалед хԝә гӧһ дьда мьԛама у дьрʹәԛьсим. Һʹәфдәһ салийа хԝәда мьн дәстпекьр щьхаре бькʹьшиньм. Мьн дьхԝәст жар бьм, ча моделед жь рекламед щьхаре. Чахе әз бумә 19 сали, мьн шәһәре Йоһанесбургеда хԝәрʹа хәбат дит, у дәрберʹа кʹәтьмә нава һәвалед хьраб. Зутьрәке мьн дәстпекьр чʹерʹа бькьм, щьхаре зәʹфи бькʹьшиньм у Шәми-Ләʹда жи мьн беһʹәсаб ичʹкә вәдьхԝар.

Ле диса жи әз алийе физикида сәрхԝә бум. Әз аеробикева, футболева у спортед дьнва мьжул дьбум. Әз ӧса жи щурʹә-щурʹә кампанийед компотәрада дьхәбьтим у мьн һәр тьшт дькьр ԝәки пешдачуйи бьм. Мьн пʹәре ԛальм дьстанд у мәрьва сәр мьн дьньһерʹин ча сәр йәкә сәрхԝә у пешдачуйи. Ле бь рʹасти әз жь бо жийина хԝә дьлтәнг дьбум. Мьнрʹа ӧса дьһатә кʹьфше, кӧ әʹмьре мьнда тьштәк кем ә.

ЧАԜА КʹЬТЕБА ПИРОЗ ЖИЙИНА МЬН ГӦҺАСТ: Чахе мьн дәстпекьр Кʹьтеба Пироз һин бьм, әз пеһʹәсийам ԝәки Йаһоԝа Хԝәдайе һʹьзкьрьне йә. Әз ӧса жи пеһʹәсийам, ԝәки әԝи һʹьзкьрьна хԝә һьндава мәда дайә кʹьфше бь ве йәке, кӧ Хәбәра хԝә, демәк Кʹьтеба Пироз дайә мә. Әԝ ча бежи мә һәр кәсирʹа нәʹмә ньвисийә, сәва кӧ рʹебәрийе мә бькә (Ишайа 48:17, 18). Мьн фәʹм кьр, әз гәрәке гәләк тьшт жийина хԝәда бьгӧһезьм, ԝәки жь рʹебәрийа ԝийә бь һʹьзкьрьн кʹаре бьстиньм.

Йәк жь гӧһастьна кӧ мьн гәрәке бькьра, әԝ бу ԝәки мьн тʹәрка һәвалед хԝәйә хьраб бьда. Гьлийе жь Мәтʹәлок 13:20, гәләк дьле мьн гьртьн, кʹидәре кӧ ӧса те готьне: «Кʹи кӧ тʹәви билана рʹе дьчә, ԝе бьбә билан, ле кʹаре кʹе тʹәви беаԛьла йә, ԝе зьраре кʹәвә, (ДТʹ)». Әве принсипе әз һелан кьрьм, кӧ пьшта хԝә бьдьмә һәвалед хԝәйә бәре у нава Шәʹдед Йаһоԝада һәвалед тʹәзә бьвиньм.

Ле йа лапә чәтьн бона мьн әԝ бу, кӧ мьн гәрәке тʹәрка щьхаре бьда, чьмки әз пева гәләк һатьбумә гьредане. Рʹаст ә мьн карьбу тʹәрка ԝе йәке бьдьм, ле паше чәтьнайикә тʹәзә пешда һат. Әз 13.6 килограма хӧрʹт бум! Жь бо ве йәке әз бәр чʹәʹве хԝә рʹәш бум у мьнрʹа ԝәкә 10 сал лазьм һат, сәва кӧ килограмед зедә кем кьм. Ле диса жи мьн заньбу кӧ тʹәрʹькандьна щьхаре, сафикьрьна рʹаст бу. Мьн тʹьме Йаһоԝарʹа дӧа дькьр, у әԝи ԛәԝат дьда мьн, кӧ сәркʹәвьм.

ЧЬ КʹАР МЬН СТАНД: Ньһа сьһʹәт-ԛәԝата мьн баш ә у әз жь жийина хԝә рʹази мә. Әз ида пәй бәхтәԝарийа ԝәʹдәлу накʹәвьм, мәсәлә хәбата баш, нав-дәнги у һәбук. Дәԝсе гәләк мьн хԝәш те, кӧ рʹастийа Кʹьтеба Пироз мәрийарʹа гьли кьм. Ахьрийе се һәвалхәбатчийед мьн жи мьзгинийа хере ԛәбул кьрьн у ньһа тʹәви мьн у мере мьн Йаһоԝарʹа хьзмәт дькьн. Рʹаст ә ньһа демарʹи у зьрʹбаве мьн сах ниньн, ле мьн перʹа гиһанд ԝанарʹа гьли кьм дәрһәԛа жийина сәр әʹрде щьнәт у сахкьрьна мьрийа, кӧ Кʹьтеба Пироз соз дьдә.

Һәләԛәтийа незик тʹәви Йаһоԝа, али мьн кьр кӧ жь һәсте тʹәнебуне аза бьм. Йаһоԝа әз кьрьмә нава малбәта хԝәйә һʹәмдьнйайе, у әз нава хушк-бьред хԝәйә рʹӧһʹанида хԝә лазьм тʹәхмин дькьм. Вьра мьн гәләк де, бав, хушк у бьра ԛазанщ кьрийә (Марԛос 10:29, 30).

[Шькьл]

Нава Шәʹдед Йаһоԝада мьн һʹьзкьрьна рʹаст дит

[Шькьл]

Пирозгәһа Шинтойи, кʹидәре мьн бәре ԛӧльх дькьр