1-2. Һʹәзкьрьна һьндава Йаһоԝа чьва гьредайи йә, у ча Иса да кʹьфше, ԝәки әԝ бь тʹәмамийа һʹьше хԝә Баве хԝә һʹәз дькә?

 «ЙАҺОԜА Хԝәдайе хԝә бь тʹәмамийа дьле хԝә, бь тʹәмамийа щанийа хԝә у бь тʹәмамийа һʹьше хԝә һʹәз бькә» (Луԛа 10:27). Иса нишан кьр, кӧ Ԛануна Мусада әва тʹәмийа лапә фәрз ә. Дина хԝә бьдьне, кӧ һʹәзкьрьна Йаһоԝа дьле мәва гьредайи йә, демәк хԝәстьн, һәст у емосийед мәва. Хенщи ве йәке, һʹәзкьрьна Йаһоԝа һʹьше мәва, демәк ньһерʹандьнед мәва жи гьредайи йә. Сәва кӧ әм фькьред Йаһоԝа дьһа баш фәʹм кьн, әм гәрәке һин бьн мина Иса бьфькьрьн, чьмки ньһерʹандьна ԝи бь тʹәмами мина ньһерʹандьна Йаһоԝа йә (1 Корьнтʹи 2:16).

² Иса бь тʹәмамийа һʹьше хԝә Йаһоԝа һʹәз дькьр. Әԝи заньбу кӧ нета Хԝәде бона ԝи чь йә, у сәва кӧ хԝәстьна Хԝәде бьанийа сери, әԝ һазьр бу бьчәрчьрийа жи. Иса дина хԝә бь тʹәмами дьда хԝәстьна Баве хԝә у изьн нәдьда, ԝәки тьштәк рʹийа ԝи бьгьрә.

3. (а) Пәтрусе шанди жь Иса чь һин бу? (б) Пәтрус хушк-бьрарʹа гот кӧ әԝана чь бькьн? (1 Пәтрус 4:1)

³ Гава Пәтрус у шандийед дьн щәм Иса бун, мәщала ԝан һәбу кӧ хԝәха жь Иса һин бьн у ньһерʹандьна  ԝи пебьһʹәсьн. Чахе Пәтрус жь бина бәр Хԝәде нәма хԝәйә пешьн ньвиси, әԝи Мәсиһийа һелан кьр ԝәки бь нет-фькьре Иса «сильһʹкьри бьн», демәк чʹәккьри бьн (Бьхунә 1 Пәтрус 4:1). Ве рʹезеда Пәтрус гьлийед әскәри да хәбате: «Сильһʹкьри бьн». Ләма жи һәрге Мәсиһи һин бьн мина Иса бьфькьрьн, бал ԝана ԝе һәр тьшт һәбә, ԝәки мьԛабьли хԝәстьнед хьраб шәрʹ кьн. Бәле, һәрге әм чʹәʹв бьдьнә ньһерʹандьн у фькьред Иса, әме бьбьнә хԝәйе чʹәке ԛәԝи. Бь ви щурʹәйи, әме бькарьбьн мьԛабьли хԝәстьнед нәрʹаст у мьԛабьли дьнйа Мире-щьна сәркʹәвьн (2 Корьнтʹи 10:3-5; Әфәси 6:12).

4. Әва готара ԝе ча али мә бькә, ԝәки әм ль гора ширәта Пәтрус бьжин?

⁴ Ве готареда әме ньһерʹандьна Иса лекʹолин кьн у бьвиньн, кӧ әм ча дькарьн чʹәʹв бьдьнә ԝи. Жь мәсәла ԝи әме пебьһʹәсьн кӧ әм ча дькарьн (1) чʹәʹв бьдьнә ньһерʹандьна Йаһоԝа, бь сайа чь жи әме бькарьбьн йәктийе хԝә кьн, (2) мьлук бьн, (3) сәрԝахт бьн у бь сайа дӧа итʹбарийа хԝә Йаһоԝа биньн.

ЧʹӘʹВ БЬДӘ НЬҺЕРʹАНДЬНА ЙАҺОԜА

5. Пәтрус чьрʹа ньһерʹандьна Йаһоԝа нәда кʹьфше?

⁵ Щарәке Пәтрус ль гора ньһерʹандьна Йаһоԝа һәрәкʹәт нәкьр. Иса шандийед хԝәрʹа готьбу, кӧ әԝ гәрәке һәрʹә Оршәлиме у ԝе ԝи бьдьнә дәсте сәрԝеред религи, әԝе щәфа бькʹьшинә у паше бе кӧштьне (Мәтта 16:21). Пәтрус фәʹм нәдькьр, кӧ Йаһоԝа ԝе ча изьн бьдә ԝәки Мәсиһе создайи, йе кӧ гәрәке хьзмәткʹаред Хԝәде хьлаз кьра, бе кӧштьне (Мәтта 16:16). Ләма жи Пәтрус Иса да алики у гот: «Һьндава хԝәда ԛәнщ бә, Хӧдан! Әв һʹәму тьшт ԝе нәйе сәре тә» (Мәтта 16:22). Пәтрус дәрһәԛа ве дәрәще мина Йаһоԝа нәдьфькьри, ләма жи ньһерʹандьна ԝи жь йа Иса щӧдә дьбу.

6. Иса Мәсиһ ча да кʹьфше ԝәки әԝ мина Йаһоԝа дьфькьрә?

⁶ Иса бь тʹәмами мина Баве хԝә дьфькьри. Ләма жи әԝи Пәтрусрʹа гот: «Жь мьн дур кʹәвә, Шәйтʹан! Тӧ бона мьн кәвьре лькʹӧмандьне йи, чьмки тӧ нә кӧ мина Хԝәде дьфькьри, ле мина инсана» (Мәтта 16:23). Иса заньбу, сәва кӧ хԝәстьна Хԝәде бинә сери, әԝ гәрәке щәфа бькʹьшинә у бьмьрә. Дьԛәԝьмә нета Пәтрус баш бу, ле йәкә Иса ширәт да ԝи. Жь ве сәрһатийе Пәтрус һин бу, кӧ әԝ гәрәке чʹәʹв бьдә ньһерʹандьна Йаһоԝа. Әм жи гәрәке ӧса бькьн!

7. Ԝәхт шунда Пәтрус ча һазьр бу ньһерʹандьна Йаһоԝа ԛәбул кә? (Бьньһерʹә шькьл.)

⁷ Ԝәхт шунда Пәтрус һазьр бу чʹәʹв бьдә ньһерʹандьна Йаһоԝа. Ида ԝәʹдә бу, ԝәки мәрьвед жь мьләтед дьн жи бьбьнә хьзмәткʹаред Хԝәде. Ләма жи Пәтрусрʹа һатә готьне, ԝәки һәрʹә бал мерәки бь наве Корʹнелйо. Жь мьләтед дьн әԝ мәрьве пешьн бу, йе кӧ бу шагьрте Иса. Щьһуйа тʹәви мәрьвед жь мьләтед дьн һәвалти нәдькьрьн, ләма жи Пәтрус гәрәке ньһерʹандьна хԝә бьгӧһаста, ԝәки шәʹдәти бьдә ԝан. Гава Пәтрус фәʹм кьр, кӧ ньһерʹандьна Хԝәде дәрһәԛа ве йәке чь йә, әԝи ньһерʹандьна хԝә гӧһаст. У чахе гази ԝи кьрьн, әԝ бе «газьн» чу (Кʹаред Шандийа 10:28, 29). Пәтрус шәʹдәти  да Корʹнелйо у малийед ԝи, у әԝана һатьнә ньхӧмандьне (Кʹаред Шандийа 10:21-23, 34, 35, 44-48).

8. Әм ча дькарьн бьдьнә кʹьфше, ԝәки әм мина Йаһоԝа дьфькьрьн? (1 Пәтрус 3:8)

⁸ Чәнд сал шунда, Пәтрус хушк-бьра һелан кьр, ԝәки «һʹәму жи сәр нетәке бьн» (Бьхунә 1 Пәтрус 3:8). Сәва кӧ әм һʹәму жи сәр нетәке бьн, әм гәрәке ньһерʹандьна Йаһоԝа ԛәбул кьн, йа кӧ әм жь Кʹьтеба Пироз педьһʹәсьн. Мәсәлә, Иса шагьртед хԝәрʹа гот, кӧ әԝана әʹмьре хԝәда жь һәр тьшти зедәтьр дина хԝә бьдьнә Пʹадшатийа Хԝәде (Мәтта 6:33). Дьбәкә ль гора ве ширәте хушк йан бьраки жь щьвата тә сафи кә ча мьзгинване һәртʹьм хьзмәт кә. Дәԝса кӧ әм жерʹа бежьн, ԝәки әԝ рʹекә һеса хԝәрʹа бьжберә, әм гәрәке пʹайе ԝи бьдьн у али ԝи бькьн.

МЬЛУК БӘ

9-10. Иса ча мьлукти да кʹьфше?

⁹ Евара пешийа кӧ Иса бьһата кӧштьне, әԝи дәрһәԛа мьлуктийе дәрсәкә фәрз да Пәтрус у шандийед дьн. Иса пешийа ве йәке Пәтрус у Йуһʹәнна шандьбу, кӧ әԝана шива пашьн һазьр кьн. Ль гора әʹдәт, ԝана гәрәке бона шуштьна ньгед мевана, тʹәшт у пʹешгир жи һазьр кьрана. Ле кʹе гәрәке мьлукти бьда кʹьфше у ньгед мевана бьшушта?

¹⁰ Гава ԝәʹде шиве һат, Иса бь мьлукти дәстпекьр ви шьхӧли бькә, чь кӧ хӧламе мале гәрәке бькьра. Әԝи чӧхе хԝә да алики, пʹешгир һьлда пьшта хԝәва гьреда, ав кьрә тʹәште у дәстпекьр ньгед шандийед хԝә бьшо (Йуһʹәнна 13:4, 5). Бона шуштьна ньгед һʹәму 12 шандийа, ԝәʹдә лазьм бу. Щьһуда жи нава ԝанда бу, йе кӧ паше нәмамийа Иса кьр. Диса жи Иса бь мьлукти шьхӧле хԝә ани сери. Паше әԝи гот: «Һун фәʹм дькьн кӧ мьн бона ԝә чь кьр? Һун мьнрʹа ‹Дәрсдар› у ‹Хӧдан› дьбежьн, у һун рʹаст ьн, һәма ӧса жи һәйә. Әз ԝәки Хӧдан у Дәрсдар ьм, у мьн ньгед ԝә шушт, гәрәке һун жи ньгед һәвдӧ бьшон» (Йуһʹәнна 13:12-14).

11. Пәтрус ча да кʹьфше, ԝәки әԝ ида йәки мьлук ә? (1 Пәтрус 5:5) (Бьньһерʹә ӧса жи шькьл.)

¹¹ Пәтрус жь мьлуктийа Иса дәрс станд. Чахе Иса вәгәрʹийа әʹзмана, Пәтрус мерәки кӧ жь буйине сәԛәт бу, ԛәнщ кьр (Кʹаред Шандийа 1:8, 9; 3:2, 6-8). Әв кʹәрәмәт бәр чʹәʹве гәләк мәрьва һатә кьрьне (Кʹаред Шандийа 3:11). Култура Щьһуйада мәрьв пәй наве хԝә дькʹәтьн, у Пәтрус жи ве културеда мәзьн бьбу. Диса жи әԝи пʹайе хԝә нәда, ле бь мьлукти дина мәрьва кʹьшандә сәр Йаһоԝа у Иса. Әԝи гот: «Пе наве Иса у бь сайа баԝәрийа мәйә һьндава наве ԝи, ньгед ԝи мәрьви шьдийан» (Кʹаред Шандийа 3:12-16). Чәнд сал шунда, Пәтрусе шанди нәʹмәкә хԝәда готә Мәсиһийа, ԝәки әԝана шкәсти у мьлук бьн, чь кӧ сәр зьмане орижинале рʹастә-рʹаст те һʹәсабе, мьлуктийе ль хԝә кьн. У әԝ йәк дькарә бинә бира мә, гава Иса пʹешгир пьшта хԝәва гьреда у дәстпекьр ньгед шандийед хԝә бьшо (Бьхунә 1 Пәтрус 5:5).

12. Әм ча дькарьн чʹәʹв бьдьнә мьлуктийа Пәтрус?

 ¹² Мина Пәтрус әм жи гәрәке мьлуктийе нав хԝәда пешда биньн. Бир нәкьн, ԝәки мьлуктийа рʹаст нә тʹәне әв ә, кӧ әм рʹастийе бежьн. Пәтрус хәбәра «шкәсти» да хәбате, у әв те һʹәсабе ԝәки шкәстибун нет у фькьред дьле мә дьдә кʹьфше, демәк әм дәрһәԛа хԝә у мәрьва чь дьфькьрьн. Әм һазьр ьн али мәрьва бькьн нә кӧ сәва ве йәке, ԝәки кәсед дьн пʹайе мә бьдьн, ле чьмки әм Йаһоԝа Хԝәде у мәрьва һʹәз дькьн. Һәрге әм бь рʹасти мьлук бьн, әме һазьр бьн бона Йаһоԝа у хушк-бьра ван шьхӧла жи бькьн, чь кӧ кәсед дьн навиньн (Мәтта 6:1-4).

СӘРԜАХТ БӘ

13. Әм ча дькарьн «сәрԝахт» бьн?

¹³ Әм ча дькарьн «сәрԝахт» бьн? (1 Пәтрус 4:7) Әм гәрәке сафикьрьнед ӧса бькьн, йед кӧ дьле Йаһоԝа хԝәш тен. Әм заньн ԝәки достийа тʹәви Йаһоԝа әʹмьре мәда тьштәки лапи фәрз ә. Әм гәрәке бь зедәйи дәрһәԛа  хԝә нәфькьрьн у ԛәбул кьн ԝәки әм һәр тьшти ньзаньн. Ӧса жи әм гәрәке бь мьлукти Йаһоԝарʹа дӧа бькьн у бь ве йәке бьдьнә кʹьфше, ԝәки әм хԝә дьсперьн ԝи. a

14. Щарәке Пәтрус чь шаши кьр?

¹⁴ Евара пешийа мьрьна хԝә, Иса шагьртед хԝәрʹа ӧса гот: «Ишәв һун һʹәмуйе мьн бьһельн». Ле Пәтрус бь баԝәри ӧса гот: «Һәрге һʹәму тә бьһельн жи, әзе тʹӧ щар тә нәһельм!» Ԝе шәве, Иса һьнә шагьртед хԝәрʹа гот: «Һʹьшйар бьминьн у тʹьме дӧа бькьн» (Мәтта 26:31, 33, 41). Һәрге Пәтрус гӧһ бьда ширәта Иса, дьбәкә әԝи мерхаси бьда кʹьфше у инкʹар нәкьра кӧ әԝ шагьрте Иса йә. Ле паше әԝ жь бо кьред хԝә гәләк пʹошман бу (Мәтта 26:69-75).

15. Шәва пешийа мьрьна хԝә Иса чь кьр?

¹⁵ Иса хԝә бь тʹәмами дьспартә Йаһоԝа. Рʹаст ә Иса беԛьсур бу, ле йәкә әԝи гәләк щар дӧа дькьр. Әв йәк ԝи ԛәԝи дькьр кӧ нета Йаһоԝа бинә сери (Мәтта 26:39, 42, 44; Йуһʹәнна 18:4, 5). Бе шьк Пәтрус тʹӧ щар бир нәдькьр, кӧ Иса ԝе шәве чьԛас дӧа кьрьбу.

16. Пәтрус ча нишан кьр, кӧ әԝ ида буйә йәки сәрԝахт? (1 Пәтрус 4:7)

 ¹⁶ Ԝәʹдә шунда Пәтрус һин бу кӧ чьԛас фәрз ә, ԝәки әԝ дӧа бькә у хԝә бьсперә Йаһоԝа. Чахе Иса жь мьрьне һатә рʹакьрьне, әԝи Пәтрус у шандийед дьнрʹа гот, кӧ ԝе рʹӧһʹе пироз бьдә ԝан, ԝәки әԝана бькарьбьн мьзгинийе һʹәму щийа бәла кьн. Иса гот ԝәки әԝана Оршәлимеда һивийе бьн, һʹәта кӧ рʹӧһʹе пироз бьстиньн (Луԛа 24:49; Кʹаред Шандийа 1:4, 5). Һʹәта кӧ Пәтрус һивийе бу, әԝи чь дькьр? Әԝи тʹәви хушк-бьред дьн «һәр гав тʹәвайи дӧа дькьрьн» (Кʹаред Шандийа 1:13, 14). Ԝәʹдә шунда, Пәтрус нәʹма хԝәйә пешьнда хушк-бьра һелан кьр кӧ «сәрԝахт» бьн, Йаһоԝарʹа дӧа кьн у итʹбарийа хԝә ԝи биньн (Бьхунә 1 Пәтрус 4:7). Бәле, Пәтрусе шанди һин бу итʹбарийа хԝә Йаһоԝа бинә у ида дькарьбу хушк-бьра ԛәԝи кә (Галати 2:9).

17. Һәрге әм һьнә тьштада щерʹьбанди нә жи, әм гәрәке чь бькьн? (Бьньһерʹә ӧса жи шькьл.)

¹⁷ Сәва кӧ әм сәрԝахт бьн, әм гәрәке тʹьме Йаһоԝарʹа дӧа кьн. Әм гәрәке бәрдәԝам кьн Йаһоԝарʹа дӧа кьн у аликʹарийе бьхԝазьн, һәрге әм дьфькьрьн, кӧ һьнә тьштада щерʹьбанди нә жи. Ләма жи илаһи гава әм сафикьрьнед фәрз дькьн, әм гәрәке жь Йаһоԝа рʹебәрийе бьхԝазьн у баԝәр бьн, кӧ әԝ занә әм һʹәԝще чь нә.

18. Әм ча дькарьн чʹәʹв бьдьнә ньһерʹандьна Йаһоԝа?

¹⁸ Әм жь Йаһоԝа рʹази нә, чьмки әԝи әм ӧса әʹфьрандьнә, кӧ әм дькарьн чʹәʹв бьдьнә һʹӧнӧред ԝи (Дәстпебун 1:26). Һәмьки әм нькарьн ве йәке бь щурʹе беԛьсур бькьн (Ишайа 55:9). Ле мина Пәтрус, ԝәрә әм жи һәр тьшти бькьн, ԝәки чʹәʹв бьдьнә ньһерʹандьна Йаһоԝа у ӧса жи мьлук у сәрԝахт бьн!