НӘХԜӘШИЙЕД КӦ НАЙЕНӘ ԚӘНЩКЬРЬНЕ У СӘԚӘТИ, ГӘЛӘК ЛЬ СӘР ЖИЙИНА МӘРИЙА ҺʹӦКӦМ ДЬКЬН. Надьр * ԝәхтәки йәки сәрхԝә у ԛәԝат бу, ле паше әԝ кʹьшийа. Әԝ дьбежә: «Әз кʹәтьмә депресийайе. Ԛәԝат мьнда нәма у мьн мерхасийа хԝә жи ӧнда кьр. . . . Мьн тʹьре кӧ жийина мьн ‹хьлаз бу›».

Мәсәла Надьр дьдә кʹьфше, ԝәки тʹӧ кәс жь мә нькарә педа сьһʹәт-ԛәԝата хԝә контрол бькә. Ле чь жи һәбә әм дькарьн һьнә тьшт һьлдьн һʹәсаб, бь сайа чь жи риска нәхԝәшийед мә, ԝе кем бә. Ле һәрге сьһʹәта мә даһа хьраб дьбә? Әв те һʹәсабе кӧ бәхтәԝарийа мә, жь дәст рʹәви? Һәмьки на. Кʹа пешийе әм шеԝьр кьн һьнә принсипа, чь кӧ ԝе али мә бькә сьһʹәт-ԛәԝата хԝә баш кьн.

«ХԜӘГЬРТИ» БЬН. (1 Тимотʹейо 3:2, 11). Бь тʹәбйәти бона сьһʹәт-ԛәԝате нәбаш ә, чахе мәрьв гәләк дьхԝьн у вәдьхԝьн, һьм жи әв бьһа сәр ԝана рʹудьне! «Нәчә нава вәхԝарийа, нә жи нава пʹьрʹхӧред гошт. Чьмки йе вәхԝари у пʹьрʹхӧри бәләнгаз дьбьн» (Мәтʹәлок 23:20, 21).

БӘДӘНА ХԜӘ ԚЬРЕЖ НӘКӘ. «Әм кӧ хԝәйе ван соза нә дәлално, дә әм хԝә жь һʹәму кʹьретийа ԛальб у рʹӧһʹе хԝә паԛьж кьн» (2 Корьнтʹи 7:1). Мәрьв бәдәна хԝә ԛьреж дькьн, чахе тʹутʹуне дьщун йан дькʹьшиньн, хԝә дәрзийа дькьн у нәрʹаст ичке дьдьнә хәбате. Мәсәлә, Мәркʹәза Америкайе «Disеasе Control and Prеvеntion» дәрһәԛа щихарәкʹьшандьне дьбежә: «Ԝәки жь бо ве мәʹнийе нәхԝәши пешда тен, мәрьв сәԛәт дьбә у һәр әʹндәме бәдәна ԝи зийане дьстинә».

БӘДӘНА ХԜӘ У ЖИЙИНА ХԜӘ ԜӘК ПʹЕШКʹЕШЕД ԚИМӘТ ҺʹӘСАБ КӘ. «Чьмки ‹әм бь ԝи [Хԝәде] дьжин, дьмәшьн у һәнә›» (Кʹаред Шандийа 17:28). Чахе әм әве йәке дьшекьриньн, әм һелан дьбьн хԝә дур бьгьрьн жь һʹәму щурʹә хофе сәр хәбате, ԝәʹде ажотьна авто йан чахе һеса дьбьн. Һәмьки нәһежайи йә бона дәмәки ләзәтстандьне, тʹәмамийа жийина хԝә сәԛәт ки!

ЕМОСИЙЕД ХԜӘЙӘ НӘРʹАСТ, КОНТРОЛ БЬКӘ. Һʹьш у бәдәна тә гәләк һәвгьредайи нә. Ләма жи хԝә дур бьгьрә жь бәрхԝәкʹәтьна зедә, һерсе, чʹәʹвнабарийе у емосийед дьнә хьраб. Дь Зәбур 37:8-да әм дьхуньн: «Һерс нәкʹәвә, нәԛьлԛьлә». Әм ӧса жи дьхуньн:  «Бона рʹожа сьбе хәма нәкьн, чьмки рʹожа сьбе ԝе бона хԝә хәма бькә» (Мәтта 6:34).

ДИНА ХԜӘ БЬДӘ ФЬКЬРЕД РʹАСТ. «Дьле рʹьһʹәт жийина бәдәне йә» те готьне Зәбура 14:30-да. Кʹьтеба Пироз ӧса жи дьбежә: «Дьле ша мина дәрмане керһати йә» (Мәтʹәлок 17:22). Әв ширәт алийе зандарийеда избаткьрийә. Дохдьрәки жь Скотләндайе ӧса дьбежә: «Әԝед кӧ бәхтәԝар нинин, гәләк нәхԝәш дькʹәвьн, ле һәрге тӧ бәхтәԝар и, ль ахьрийе нәхԝәшийед тә ԝе кем бьн».

ХԜӘГЬРТЬНЕ ПЕШДА БИНӘ. Анәгори Надьр дәрһәԛа кʹижани кӧ дәстпека готареда һатьбу готьне, дьԛәԝьмә бьжартьна мә щарна тʹӧнә у әм гәрәке һин бьн нава чәтьнайед хԝәда тәйах кьн. Әм дькарьн бьфькьрьн кӧ чь бькьн, сәва бькарьбьн тәйах кьн. Һьнәка һаԛас бәрхԝәдькʹәвьн бона нәхԝәшийед хԝә, кӧ дьлтәнг бунә у һʹале хԝә жи бь ԝе йәке даһа хьраб кьрьн. Дь Мәтʹәлок 24:10-да ӧса те готьне: «Һәгәр тӧ тәнгасийеда дьлсьст би, кӧ ӧса йә тӧ нә хӧрт и».

Йед дьн жи паше ԝе йәке ча пешийе дьлтәнг бунә, карьбун хԝә дәсте хԝәда бьгьрьн у һʹале хԝә һәвәки сьвьк кьн. Әԝана һини дәрәще хԝә бун. Ԝана дит мәщала кӧ бькарьбьн тәйах кьн. Надьр жи һәма ӧса кьр. Әԝи гот кӧ зәʹф дӧа дькьр у дьфькьри сәр мьзгинийа Кʹьтеба Пироз. Әԝ «дәстпекьр һʹале хԝәда тьштед баш бьвинә, нә кӧ тʹәне чәтьнайа». Мина гәләк мәрийа, йед кӧ рʹасти щерʹьбандьнед ӧса мәзьн тен, Надьр һин бу дьлрʹәмийе, дьлшәԝатийе бьдә кʹьфше, чь кӧ әԝ һелан кьрьн, ԝәки мьзгинийа Кʹьтеба Пироз мәрьвед дьнрʹа жи әʹйан кә.

Мәрьвәки дьн жи, бь наве Стив, рʹасти чәтьнайед ви щурʹәйи һатьбу. 15 салийа хԝәда, әԝ жь бах кʹәтьбу жь бо чь жи, жь стийе хԝә һʹәта ньга әԝ кʹьшийа. Ле ԝәʹдә шунда, 18 салийа хԝәда, ԛәԝат диса кʹәтьбу дәсте ԝи у әԝ дькарьбу ԝана бьвә-бинә. Паше әԝ чубу заньнгәһе, кʹидәре кӧ дәстпекьр хԝә дәрзийа бькә, гәләк ичке вәхԝә у бенамусийе бькә. Һевийа ԝи тʹӧнә бу, һʹәта кӧ әԝ дәстпекьр Кʹьтеба Пироз һин бә. Бь сайа ԝе йәке әԝ карьбу ньһерʹандьнәкә рʹаст сәр жийине, нав хԝәда пешда бинә, у тʹәрка хәйсәтед хԝәйә хьраб бьда. Әԝ дьбежә: «Әв валайи кӧ мьн нава һаԛас салада дьле хԝәда тʹәхмин дькьр, ида тʹӧнә бу. Ньһа жийина мьн әʹдьлайева тʹьжә йә, әз бәхтәԝар ьм у ләзәте жь жийина хԝә дьстиньм».

Мәсәла Стив у Надьр, дькьнә бира мә гьлийед жь Зәбура 19:7, 8: «Һинкьрьна Хӧдан кʹамьл ә . . . мәрьв әԝ нуйәжийин дькә. Ԛанунед Хӧдан рʹаст ьн, дьле мәрьв ша дькьн. Фәрманед Хӧдан зәлал ьн, чʹәʹвед мәрьв рʹонайи дькьн».