Де-бавед кӧ мәсәләкә баш дьдьнә зарʹед хwә, дьжин ль гора wе йәке, чь кӧ хwәха һин дькьн. Мәсәлә һивийе нибә, кӧ зарʹа тә тʹьме рʹастийе хәбәр дә, һәрге тӧ wирʹа дьбежи: «Бежә wи әз мал ниньм» чахе нахwази тʹәви кәсәки бь телефоне хәбәр ди.

Давид дьбежә: «Де-бав гәрәке һивийе нибьн кӧ зарʹед wан wе бькьн еw, чь кӧ әwана хwәха накьн. Зарʹ wәк пәмбу нә, йед кӧ һьлдьчʹьньн хwә һʹәму тьштед кӧ әм дьбежьн у дькьн. Һәрге әм тьштәки зарʹа һин дькьн у щарна ль гора гьлийе хwә хwәха накьн, һьнге зарʹ wе әwе йәке тедәрхьн у бьдьнә рʹуйе мә».

ПРИНСИПА КʹЬТЕБА ПИРОЗ: «Даннасин дьки, кӧ нәдьзьн, ле тӧ дьдьзи?» (Рʹомайи 2:21).

Сәр зарʹа у щаһьлед дьн дьһа зәʹф һʹӧкӧм дькьн де-бавед wан, нә кӧ һәвал йан кәсәки дьн. Әw те һʹәсабе, кӧ щәм wә мәщаләкә баш һәйә, кӧ рʹебәрийа рʹаст бьдьне зарʹед хwә, у әwе йәке бькьн чь кӧ мәрьварʹа жи дьбежьн.

Никол дьбежә: «Дьqәwьмә әм сәд щари тьштәки бежьнә зарʹе у әwе гӧһе хwә нәдә мә, ле һәрге щарәке әм ӧса нәкьн чаwа кӧ дьбежьн, зарʹ wе әwе йәке дәрберʹа бьдә рʹуйе мә. Зарʹ дина хwә дьдьн сәр һʹәму тьштед кӧ әм дькьн, һәла һәрге әм дьфькьрьн кӧ әwана навиньн жи, йәкә әwана дьвиньн».

ПРИНСИПА КʹЬТЕБА ПИРОЗ: «Сәрwахтийа жорьн, бәре пешьн паqьж ә . . . бе һʹьләкʹари йә» (Аqуб 3:17).

Нормед хwә һьлдә һʹәсаб. Кʹижан wәʹдәдәрбазкьрьна тӧ дьжбери? Тӧ һьндава мер йан жьн у зарʹед хwә, чаwа хwә кʹьфш дьки? Тʹәви кʹе тӧ һәвалтийе дьки? Тӧ дәрһәqа мәрийа хәм дьки? Тӧ дьхwази кӧ зарʹед тә мина тә бьн?

Кристен дьбежә: «Әз мере хwәва зоре нәкьнә сәр зарʹед хwә, кӧ әwана хwә ль wан норма бьгьрьн, бь кʹижана кӧ әм хwәха нажин».

Бона шашийед хwә бахшандьне бьхwазә. Зарʹед тә ида заньн, wәки тӧ жи дькари щарна шашийа бәрди. Чахе тӧ һәвалзәwащ у зарʹед хwәрʹа дьбежи «бьбахшинә мьн» гава кӧ әw лазьм ә, ӧса тӧ зарʹед хwә һин дьки, кӧ бьбьнә мәрьвнә рʹаст у мьлук.

Робин дьбежә: «Зарʹед мә гәрәке бьбьһен, кӧ чаwа әм гӧне хwә дьдьнә рʹуйе хwә у бона шашийед хwә бахшандьне дьхwазьн. Һәрге әм ӧса нәкьн әwана wе һини wе йәке бьн, кӧ шашийед хwә вәшерьн».